1. Tednam Devdutan mhaka Jivitachea Udkachi, konvchê porim jhigjhigit, êk nôd dakhoili: Devachea ani Menddreachea xinvasona thaun ti bhair sortali ani
2. Xarachea mukhêl rostea porian vhanvun pavtali. Nodichê dôr-êkê deger Jivitachem ek zhadd aslem; tankam vorsant bara pavtti, dôr mhoineant êk pavtt, follam zatat; raxttrancheô pidda kaddunk tanchea panank gunn asa.
3. Xirap-poddlolem thõi kãi aschench na. Xarant Devachem ani Menddreachem xinvason astolem; Tachim chakram Taka bhôztolim.
4. Tim Taka rup-rup polletolim ani tanchea kopalanr Tachem Nanv boroil'lem astolem.
5. Rat anink aschi na ani tankam diveanchea vô suriachea uzvaddachi goroz aschi na, kiteak khud Sorvespor Dev tancher Aplo uzvadd ghaltolo ani tim sasnnachea sasnnak razvôtt choloitolim.
6. Uprant devdutan mhaka sanglem: "Him utram visvas favo-aslolim ani khorim. Provadiank preronn dita tea Sorvespora Devan, vegim kitem ghòddchem asa tem Aplea chakrank dakhounk, Aplea dutak dhaddla."
7. "Polleiat- mhonntta Jezu- Hanv rokddo ieuncho zalom! Hea pustokantlim bhakitam samballtat tim subhagi!"
8. Hanvem, Juanvan, heô soglleô vostu aikoleat ani polleleat. Ani sogllem aikun ani polleun zaina fuddem, mhaka hem sogllem dakhoil'lem tea devdutak bhôzunk tachea pãiam saxttangim poddlom.
9. Punn tannem mhaka sanglem: "Oxem korum naka. Hanv-ui chakôr, tujê sarko, tujea bhavam provadiam sarko, ani hea pustokantlim utram samballtat tanchê sarko. Fokot Devak tunvem bhôzunk zai.!"
10. Ani tannem mhaka sanglem: "Hea pustokantlim bhakitam xik'ko marun dhampun dovrum naka; kiteak kall lagim pavla.
11. Khotteponn kortat tãnnim khotteponn korit ravchem, ani mhellim asat tim odik mhellim zaunchim; punn Devak manovlolea mon'xamnim Devak manta tench korit ravchem, ani bhoktivont mon'xamnim apli bhokti vaddounchi."
12. "Polleiat hanv porot ieuncho zalom! Soglleank, tanchea zonn ekleachea kornniam pormannem, farik korun Mhoji mozuri gheun Hanv ietam.
13. Hanv Alfa ani Omega, mhonngê Poilo ani Nimanno, Orômb ani Xevôtt!"
14. Aplim vostram dhutat tim subhagi; oxem korun Jivitachea Zhaddachem foll khaunk ani darvontteantlean Xarant provês korunk tankam hôk'k astolo.
15. Punn her sogllim Xara bhair astolim: khottim-noxttim mon'xam, ghaddiponn choloitat tim, pozoddponnak lobhdol'lim, khun korpi, kud'dea devank bhôzpi, ani utramnim toxench jivitachê chalin fottingponnam kortat tim.
16. Hanv Jezu: Povitr-Sobhank heô vostu kollit korunk Hanvem Mhojea dutak tumchê-xim dhaddla. Hanv Davidachê kulliechi Kombri, Hanv Fanteachem jhigjhigit Noketr!
17. Atmo ani Hokol oxem mhonnttat: "Ie!" Hem aikotat titleamnim-i mhonnchem: "Ie!" Konnank tan laglea? Ieiat lagim! Jivitachem udok zai tumkam? Ieiat ani funkea tem gheiat!
18. Jim konn hea pustokantlim bhakitam aikotat, tankam hanv Juanv hi xiddkavnni ditam: hea bhakitank kitem-i choddounk konnui fuddem sortit zalear, tankam favo ti khast lavchê lavun, hea pustokar boroil'lim asat tim-i noxttam Dev tanchea mathear denvoitolo.
19. Ani hea pustokantlea bhakitantlem konn-ui kitem-i unnem korunk fuddem sortit zalear, tankam Dev hea pustokar boroil'leô asat teô bhasavnniô bhogunk diuncho na: Jivitachea Zhaddachem foll khaunk ani Povitr Xarant tthikann korunk tumkam mellchem na.
20. Hea vostunchi sakxi dita To oxem sangta: "Hôi, Hanv veginch ietam!" Amen! Ie, Somia Jezu!
21. Somia Jezuchi doiallai tumam somestank bhôgunk mellum. Amen!
