1. Hachê uprant sonvsarachea char konnxeancher char devdut aslole hanvem pollele. Sonvsaracher vô doriacher, vô khõichea-i zhaddar varo marchoch nhoi mhonn, sonvsarache char-ui vare te addaun dhôrtale.
2. Ani jivea Devacho xik'ko gheun dusro êk devdut udenti thaun ietalo to hanvem pollelo. Sonvsarak ani somdirak vaitt korunk Devan podvi dil'li tea chovgam devdutank tannem vhoddlean oso ulo marlo:
3. "Amchea Devachea chakranchea kopalar êk xik'ko ami mari-sôr, tumi sonvsarak, vô somdirak, vô zhaddank vaitt korum nakat."
4. Ani zancher xik'ko marlo tanchi sonkia kitli ti hanvem aikoli: Israelachea putam-dhuvanchea soglleam kullantlim ekxem chovêchallis (144) hozar xik'ko marlolim aslim.
5. Judachea kullantlim bara hozar xik'ko marlolim; Rubenachea kullantlim bara hozar; Gadachea kullantlim bara hozar;
6. Asherachea kullantlim bara hozar; Naftalichea kullantlim bara hozar; Manas'sechea kullantlim bara hozar;
7. Simeonachea kullantlim bara hozar; Levichea kullantlim bara hozar; Isakarachea kullantlim bara hozar;
8. Zebulunachea kullantlim bara hozar; Juzechea kullantlim bara hozar; Benjaminachea kullantlim bara hozar xik'ko marlolim.
9. Hachê uprant ovchit êk bhov vhôdd lokachi urpônz hanvem polleli, konnachean mezunk zainasli titli! Sogllea desantli, sogllea kullantli, sogllea porzantli ani sogllea bhasanchi ti urpônz; ani dhovi nhesônn ghalun ani aplea hatamnim talliô dhôrun, xinvasona mukhar ani Menddrea mukhar ti ubi asli.
10. Tim arddun mhonnttalim: "Xinvasonar bosun aslolea amchea Devak zôi! Toxench Menddreak zôi! Tãnnim amchi soddvônn keli!"
11. Xinvasona, zannteam ani char jivea rochnnam bhonvtonnim ube asle te soglle devdut xinvasona mukhar saxttangim poddle ani Devak tãnnim bhôzlo;
12. tednam tãnnim oxem mhollem: "Amen! Vakhann'nni, mhoima, zannvikai, dhinvasnni, bhovman, podvi ani boll amchea Devak sasnnachea sasnnak! Amen!"
13. Zanntteam modlea eklean mhojê kodde vicharlem: "Dhovem nhesleant tim konn, ani khõi thaun tim aileant?"
14. Hanvem oso zobab dilo: "Tunch sang mhaka, dhonia." Tannem mhaka sanglem: "Nixttur dhumalleantlo solamoti pavlo to lôk ho. Tãnnim aplim vostram Menddreachea rogtan dhuleant ani dhovim keleant.
15. Hea pasot tim Devachea xinvasona mukhar ubim asat ani Tachea Gabhareant dis ani rat Tachi seva kortat. Xinvasonar bosun asa To tanchê modem tthikann korun tankam xeronna ghetolo.
16. Tankam anink kednanch bhuk lagchi na, tan-ui lagchi na; suriachem unet tankam hulpaunchem na, nhoi mhonn kosloch dusro zall;
17. kiteak xinvasonachea mazar asa to Menddro tancho Gonvlli zatolo, ani To tankam jivea udkachea zhorim-xim pavoitolo; ani Dev tanchea dolleantlim sogllim dukam pusun kadtolo."
