1. Tednam somdirantlem ek savoz voir sorta tem hanvem pollelem. Taka dha xingam ani sat tokliô asleô; tachea dor-eka xingacher êk mukutt ani dôr-êkê toklecher Devachi ninda kortolem ek nanv aslem.
2. Hanv dekhtalom tem savoz bibttea vaga sarkem distalem: tache pãi vansvelachea pãiam sarke asle ani tachem tondd xinvachea tondda sarkem. Aran tea savzak apli podvi dili ani tichê borabôr apli sodôr ani aplo vhôdd odhikar.
3. Savzachê êkê toklek êk mornnadik ghavo zala mhonn diso, punn to gombhir ghavo peklolo. Sogllo sonvsar ojaplo ani savza pattlean vochunk laglo.
4. Sogllo lôk arak saxttangim poddtalo, kiteak tannem aplo odhikar savzak dil'lo. Ani lôk savzak-ui saxttangim poddun oxem mhonnttalo: "Savza sarko anink konn asa? Tachê lagim zhuzunk konnak tankot?"
5. Savzak gorvan ulounk ani Devachi ninda korunk rojia dil'li, ani bavêchallis mhoine odhikar cholounk dil'lo.
6. Tem Devacher, Tachea Nanvacher, Tachea Tombucher ani sorgar ravtoleancher jastiô marunk laglem.
7. Bhoktancher add zhuzunk ani tankam harounk savzak rojia dil'li, ani sogllea kullancher, porzancher, bhasancher ani raxttrancher taka odhikar dil'lo.
8. Mhonnche, jivexim marlolea Menddreachea Jivitachea pustokar sonvsarachea orombak thaun zanchim nanvam boroil'lim nant, tim sogllim sonvsarantlim mon'xam tea savzak nomoskar kortolim.
9. Kan asloleamnim aikunchem!
10. Zankam bondkhônn nirmil'li asa, tankam bondkhônn chukchi na; zankam torvarin morunk nirmil'lem asa, tankam torvar chukchi na. Dekhun bhoktank thirai asunk zai ani ghôtt bhavarth.
11. Uprant anink ek savoz zomnintlem voir sortalem tem hanvem dekhlem. Taka eka menddrea vori don xingam aslim, ani tem eka ara bhaxen uloitalem.
12. Hem dusrem savoz poilea savzacho sogllo odhikar tachêch mukhar choloitalem, ani zacho mornnadik ghavo peklolo, tea poilea savzak bhôzunk prithumek ani ticher jietolea sogllea lokak boll kortalem.
13. Hem dusrem savoz mottim vismitam kortalem, soglleanchea dolleam mukhar tannem sorgar thaun uzo porian prithumer denvo-so kelo.
14. Poilea savza mukhar vismitam korunk dil'lim tanchê vorvim tannem prithumechea mon'xank fosoilim, ani torvarincho ghavo zal'lo ani tori jivem aslem tea poilea savzachi êk murti korunk sanglem.
15. Poilea savzachê murti bhitôr jivitacho svas ghalun tika ulounk porian diunk dusrea savzak podvi dil'li asli; ani jim konn dusrea savzachê murtik nomoskar korina zatit, tancho jiv-ui kaddunk taka podvi dil'li asli.
16. Lhanank toxem vhoddank, girestank toxem goribank, nagrikank toxem gulamank, hankam soglleank aplea uzvea hatar vô kopalar êk xik'ko marunk tem boll kortalem.
17. Ani savzachea nanvacho vô tachea nanvachea ankddeacho xik'ko aslea bogor konnakuch vikunk vô viktem gheunk rojia nasli.
18. Hem somzunk zannvaiechi goroz asa. Zannar mon'xamnim savzachea ankddeacho odmas korun gheuncho; to eka mon'xachea nanvacho ankddo. To ankddo soixim-sasoxtt (666).
