1. Jezu Kristan prokasoilem tem hea pustokar boroil'lem asa: hi prokasovnni Tannem Deva koddchi ghetli. Rokddea-rokddem kitem-kitem ghòddchem asa, tem Aplea sevokank dakhounk Devan Taka ti keli. Aplea dutak dhaddun Jezun ti prokasovnni Aplea sevoka Juanvak kollit kelea.
2. Ho Juanv apnnem dekhlam titlem-i hanga sangta ani oxem Devachea utrak ani Jezu Kristan dil'lê govaikek sakxi dita.
3. Ieuncheô asat tea ghòddnniancho kall lagim pavla. Dekhun jim konn hem bhakit vachtat, ani jim konn tem aikotat ani tantum boroil'lem asa tem palltat, tim subhagi!
4. Aziechea Prantantlea sat Povitr Sobhank Juanv he sondêx dhaddta. Zo asa, Zo aslo ani Zo ieuncho asa, To, Tachea xinvasona fuddem asat tea sat atmeam borabôr, tumkam Aplo mogacho axirvad dium ani xantin bhôrum.
5. Toxench Zo khatrecho Sakxi, mel'leam modlo punorjivont zal'lo Poilo, sonvsarantlea patxaiancho Patxai, tea Jezu Kristacho môg ani xanti tumkam! To amcho môg korta ani Aplea rogtan Tannem amkam amchea patkantlim soddoileant,
6. ani Aplea Devachi ani Bapachi seva korunk Tannem amkam[razvôttki ani ladniki keleant]. Hea Jezu Kristak mhoima ani podvi sodam-sorvodam. Amen!
7. Ho polleiat kupam voir To ieta! Sogllim, Taka tôpla tim legun, Taka polletolim. Ani sonvsarantleô soglleô porza Tachem dukh kortoleô! Hem khorem! Amen!
8. Zo asa, Zo aslo ani Zo ieuncho asa, to Sorvpodvedar Sorvespor Dev mhonntta: "Hanv Orômb ani Xevôtt!"
9. Hanv Juanv, tumcho bhav; ani Jezuchea rajeachim asat tankam sõsnnikaien koxtt ani dukhi bhògchim poddtat, tantum hanv tumcho bhageli. Devachem utor hanvem porgôttlem ani Jezu Kristak hanvem sakxi dili dekhun, Patmos nanvachea zunvear mhaka koidi korun dovorlolo.
10. To Somiacho Dis aslo. Tea disa Povitr Atmeacho bhar mhojer ailo, ani mhojê fattlean tuturechea avaza sarko êk motto tallo hanvem aikolo;
11. to oxem mhonnttalo: "Tum polletai tem sogllem "eka pustokar boroi ani Efez, Smirna, Pergamum, Thiatira, Sardis, Filadelfia ani Laodiseia, hea sat-ui xaranchea Povitr Sobhank tem dhaddun di."
12. Mhojê lagim konn uloita kai mhonn polleunk hanv voll'lom. Tednam bhangaracheô sat divliô hanvem dekhleô.
13. Ani tea divliam modem Mon'xachea Puta sarko konn-eklo thõi aslo. To pãiam porian lamb ek vostr nheslolo, ani tachea hodd'ddeak êk bhangaracho pott'tto bandlolo.
14. Tachê tokleche kens dhove asle, lonvê sarke, hima bhaxen dhoveful; ani tache dolle ujea porim zhogzhoktale;
15. agtteant nirbhêl kel'lê pitullê sarke tache pãi chokchoktale, ani ghosgoxit udkachea lotta sarko tachea talleacho avaz.
16. Aplea uzvea hatant to sat noketram dhôrun aslo, tachea tonddantli donim-i vattamnim pazloli torsad bhair sortali, ani tachem mukhamoll don'parchea zhogzhokit suria sarkem rosrostalem.
17. Hanvem Taka pollelo tednam, êk mel'lo monis koso Tachea pãiam-xim hanv poddlom. Tannem Aplo uzvo hat mhojer ghalo ani mhollem: "Bhieum naka! Hanv To, Poilo ani Nimanno.
18. Hanv To, Jivo asa To! Hanv mel’lom, punn atam Hanv sorvkallak jivo asam! Mornnacheô ani Patallacheô chaviô Mhojê adhin asat.
19. Dekhun tum polletai titlem-i boroun dovor zaum atam ghòddta tem, zaum fuddarak ieunchem asa tem.
20. Mhojea hatant dhôrlolim sat noketram tunvem polleleãi ani toxench sat bhangaracheô divliô, tanchi gupit somzonni hi: sat noketram mhollear sat povitr sobhanche dut, ani sat divliô mhonngê sat Povitr-Sobha."
