1. Magir mhaka hem dorxon mell'llem: ovchituch sorgar ek dar ugòddlem ani tuturê sarko sadovlolo zo tallo hanvem adim aikol'lo, tannem mhaka sanglem: "Hangasôr voir ie, ani fuddarak kitem ghòddchem asa tem Hanv tuka dakhoitolom."
2. Rokddoch Povitr Atmeacho bhar mhojer ailo. Thõi sorgar ek xinvason aslem ani tacher konn eklo boslolo.
3. Tachem mukhamoll eka jhighikit mannka porim ani eka tambddea motia vori zhogzhoktalem; xinvasona bhonvtim pachu sarkem ek donddubal aslem.
4. Hea xinvasona bhonvtim chovis sodrô asleô ani tancher dhovem nheslole ani tokler bhangarache mukutt ghalun aslole chovis zannte asle.
5. Xinvasona thaun bhair sortalim zhoglannim ani godd-goddeancho avaz. Xinvasona mukhar sat pettlole dive zolltale te Devachê chakrek aslole sat atme.
6. Toxench xinvasona mukhar suriakanta vori aspas porzolltolo konvchecho somdir koso aslo. Modem xinvasona bhonvtonnim, pattlean ani fuddlean zaitea dolleancheô char jiveô rochnna asleô.
7. Poili rochnna eka xinva bhaxen distali, dusri eka paddkulea bhaxen, tisrek eka mon'xachem tondd aslem, ani chovthi rochnna êkê uddtê ghonni sarki distali.
8. Char-ui jivea rochnnank, ek-ekleak, sov pakotte asle ani tankam sobhonvtim, bhailean ani bhitorlean, khub dolle asle. Dis ani rat thambonastana teô rochnna oxem gait asleô: "Povitr, Povitr, Povitr Sorvespor Dev, Sorvpodvedar! To aslo, To asa, ani To ieuncho asa!"
9. Jitlê pavtti teô rochnna xinvasonar boslolo asa ani sodam-sorvodam jieta Taka mhoimechim, stutichim ani dhinvasnnechim gitam gaitaleô,
10. titlê-i pavtti chovis-ui zannte xinvasonar boslolo asa Tachea pãiam poddtale ani sodam sorvodam jieta Tachi puza kortale. Aple mukutt xinvasona mukhar uddoun te mhonnttale:
11. "Sorvespora, amchea Deva, sogllea vostuncho Rochnnar Tum, Tujê khuxen teô rochun aileat ani vortunk lagleat, dekhun, Tuji podvi vollkhun, soglleamnim Tuka mhoima ani bhovman diunk favo."
