1. Tednam anink eklo bollixtt devdut sorgar thaun denvtalo to hanvem dekhlo. To eka kupan revoddlolo aslo ani tachê toklê bhonvtim ek donddubal aslem; tachem mukhamoll suria vori ani tache pãi ujeache khambe koxe asle.
2. Tachea hatant êk usoil'li kovlli asli. Tannem aplo uzvo pãi somdiracher ani dhavo pãi zomnicher dovorlo
3. ani xinv goroz ghaltat tê bhaxen vhoddlea tallean to aroddlo. To aroddlo tednam sat goddgoddeamnim bob marun zap dili.
4. Hãnnim bob martôch hanv borounk vetalom, punn sorgar thaun oxem uloitalo to êk tallo hanvem aikolo: "Sat goddgoddeamnim kitem mhollam tem gupit samball; tem boroum naka."
5. Magir somdiracher ani zomnicher zaka ubo ravlolo hanvem dekhlolo, tea devdutan aplo uzvo hat sorga vatten ubarlo
6. ani Zo sodam-sorvodam jivo asa Tachea nanvachean, ani Zannem sôrg ani tantum asa tem sogllem, sonvsar ani tantum asa tem sogllem, ani somdir ani tantum asa tem sogllem rochlam Tachea nanvachean, tannem oso soput ghetlo: "Anink vogôt ascho na!
7. Punn jednam satvo devdut apli tuturi vazoitolo, tednam Devan Aplea sevokank, mhonngê Aplea provadiank, kolloilam tea pormannem, Devachi gupit ievzônn sompadnnek pavtoli."
8. Uprant hanvem sorgar thaun mhojê lagim uloil'lo hanvem aikol'lo to tallo novean mhojê lagim oso uloilo: "Voch ani somdiracher ani zomnicher ubo asa tea devdutachea hatant asa to usoil'lo kovllo ghe."
9. Hanv tea devduta-xim gelom ani ti kovlli mhaka di mhonn hanvem tachê lagim maglem. Tannem mhaka mhollem: "Ti ghe ani kha; tujea pottant ti ambôtt zatoli, punn tujea tonddant mhonva sarki gôdd."
10. Devdutanchea hatantli hanvem kovlli ghetli ani kheli, ani ti mhojea tonddant godd-godd mhonv lagli. Punn ti gill'lea uprant, pottant ti ambott-ambott zali.
11. Tednam tannem mhaka mhollem: "Anink êk pavtt tunvem zaitea porzam, desam, bhasam ani patxaiam vixim Devacho sondêx diunk zai."
