1. Dongra velo denvlea uprant, lokacheô urponji Tachê pattlean geleô.
2. Ovchituch eka koddkaran lagim sorun Taka nomoskar kelo, ani mhollem: 'Saiba, Tuka zai zalear, Tujean mhaka nitôll korunk zata.'
3. Jezun Aplo hat vistarun taka lailo ani mhollem: 'Hôi, Mhaka zai: nitôll za.' Ani teach vellar to koddantlo nitôll zalo.
4. Tednam Jezun taka sanglem: 'Polle, hem konnakuch sangum naka, punn voch ani tujem ang iadnikak dakhoi ani Moizesan formailolem dan bhettoi; oxem tum boro zalai mhonn porjek ruzu zatolem.'
5. Jezu Kapernaumant bhitôr sorlea uprant êk xotpoti upkar magunk Tachê sorxem ailo; tannem mhollem:
6. Saiba, mhozo chakôr ghorant aren poddlolo asa ani ekdomuch vollvollta.'
7. Jezun taka mhollem: 'Hanv ietam ani taka boro kortam.'
8. Portipallun xotpotin mhollem: Saiba, tunvem mhojea ghora ieunk mhaka favona; ek utor mat uloi ani mhozo chakôr boro zatolo.
9. Tôr hanv-ui dusreachea hata khal asam ani mhojê-i khal xipai asat; ani tantlea ekleak hanv sangtam: 'Voch!,' ani to veta; dusreak: 'Ie!', ani to ieta; mhojea chakrak: 'Omkem kôr!', ani to korta.'
10. Hem aikun Jezu ekdom ojap zalo ani Apnna pattlean ietoleank Tannem mhollem: "Hanv tumkam khorench sangtam, iedo vhoddlo bhavarth mhaka Israelant mellunkuch na."
11. Hanv tumkam anink ek sangtam: Udenti ani Ostomtê thaun zaitim ietolim ani Abraham, Izaak ani Jakob hanchea sangata Sorginchea Rajeant jevnnak bostolim,
12. punn razachea putam-dhuvank Dev bhailea kallokhant uddoitolo; thõi tim rudon korun ani dant korkoraun astolim."
13. Ani Jezun xotpotik mhollem: "Tum voch, tunvem bhavarth dhôrloi dekhun, tum magtai toxem tuka zaum." Ani teach vellar chakôr boro zalo.
14. Ani Jezun Pedruger vochun tachê sasuk zoran antrunnar poddloli dekhli;
15. Tannem tichea hatak dhôrina fuddem ticho zôr poddlo ani utthun ti Tacho poramôs korunk lagli.
16. Sanz zatôch devchar boslolea zaitea zannank Tachê sorxem haddlim; Tannem eka utran devchar kaddle ani sogllea vaittakarank borim kelim.
17. "Tannem amchê velo pidda-rôg ubarlo ani amcheô boll'llikô apnnacher ghetleô", oxem Izaias provadian sanglolem tem pallon ailem.
18. Apnna bhonvtonnim lokachi khêtt polleun, Jezun doriachê pelê toddi vochunk lailem.
19. Eka dhormxastrian lagim sorun Taka mhollem: "Guruji, tum vexi thõi hanv Tujê pattlean ietolom."
20. Ani Jezun taka sanglem: "Koleank dholi asat ani varea velea suknneank nhidunk zage asat, punn Mon'xachea Putak Apli tokli tenkounk khõisoruch svat na."
21. Tachea xisantlea anink eklean Taka mhollem: "Poilim mhaka vochun mhojea bapaik matiek lavum-di."
22. Jezun taka sanglem: "Tum Mhojê pattlean ie, ani meleant tãnnim aplea mel'leank matiek lavum-di."
23. Tednam Jezu eka hoddear choddlo; Tache xis-ui Tachê pattlean gele.
24. Ani ovchituch doriant itlem khor ek tufan upraslem, ki lharam hoddea voir pavtalim. Punn To nhidlolo aslo.
25. Lagim sorun Tachea xisamnim Taka zago kelo ani mhollem: "Amkam vattai, Saiba, ami mortanv!"
26. Ani Tannem mhollem: "Tumi itle bhezudd kiteak? Itlo holko tumcho bhavarth?" Magir utthun Tannem vareak ani doriak bexttaile ani ekdom thonddai zali.
27. Te ojap zale ani mhonnunk lagle: "Koslo monis kai ho? Varo ani doria legun tachem aikotat!"
28. Gadara prantant, doriachê pelê toddi To ailea uprant, devchar boslole, somadhintle bhair sorun ailole, dog monis Taka mell'le; itle bhirankull te asle, ki konnakuch tê vatten vochunk kalliz zainaslem.
29. Ani ovchituch te bob marunk lagle: "Jezu, Devachea Puta, Tuka amchê kodde koslem kam asa? Vêll pavchê adinch amkam vollvollaunk ailai kitem?"
30. Te aslole thõi thaun matso pelean dukrancho êk vhoddlo hindd chortalo,
31. ani devchar Jezu lagim oxem prarthun magunk lagle: "Hangasorle amkam bhair ghaltai zalear,dukranchea hinddant amkam dhadd."
32. Ani Tannem tankam mhollem: "Vochat!" Ani te bhair sorun dukram bhitôr vochun rigle; ani ovchit sogllo hindd kollsa velean nettan doriant dhanvun gelo ani udkant buddon melo.
33. Rakhnne pollun gele ani nogrant ieun, ghòddlolem tem ani devchar bosloleank kitem zalem tem sogllem tãnnim kollit kelem.
34. Ovchit nograntlo sogllo lôk Jezuk mellunk bhair sorun ailo, ani, Taka pollena fuddem, aplea ganva bhair voch mhonn Tachê lagim magunk laglo.
