1. Dis uzvaddona fuddem, sogllea mukhel iadnikamnim ani porjechea zannteamnim Jezucho jiv kaddunk laucho mhonn tharav ghetlo.
2. Tãnnim Taka bandlo ani vhorun Pilat razpalachea hatant ghalo.
3. Jezuk formonn marlolem polleun, Tacho ghat ghetlolo tea Judasan, ontoskornnacho kiddo taka khaunk laglo dekhun, rupeache tis nanne mukhel iadnikank ani zannteank portun dile ani mhollem: "Niropradhi rogtacho ghat gheun hanvem patok kelem."
4. Tãnnim mhollem: "Tem amkam kiteak poddlam? Tujem tunch polle."
5. Tannem te rupeache nanne Devmondirachea Gabhareant apttun uddoile ani vochun gôll ghetlo.
6. Mukhel iadnikamnim te nanne kaddun mhollem: "Te Devmondirachea bhanddarant ghalum noiê; te rogtachem mol."
7. Ani tharav gheun, pordexiank purunk tea poixeamnim tãnnim kumbharachem ek bhatt viktem ghetlem.
8. Hea karonnak lagun tê svatek az porian Hakeldama, mhonngê Rogtachem Bhatt, mhonn nanv asa.
9. Tednam Devan Jeremias provadia vorvim sanglolem tem khorem zalem: "Ani tãnnim rupeache tis nanne ghetle - hench Israelachea loka modem mon'xak diunchem tharailolem mol
10. ani Sorvesporan mhaka hukum ghal'lo tea pormannem kumbharachea bhattak te môddle."
11. Magir Jezuk razpala mukhar ubo kelo; ani razpalan Tachê lagim oxem vicharlem: "Judevancho raza tum?" Jezun taka mhollem: "Oxem tum sangtai."
12. Ani mukhel iadnik ani zannte Tacher add garannem korit astana, Tannem zapuch kaddli na.
13. Tednam Pilatan Taka mhollem: "Kitleô govaiô Tujer add te ditat teô tum aikonãi"
14. Punn Tannem eka utrak legun apnnak zap dili na mhonn razpalak ekdom mottem ojap dislem.
15. Dôr Utsovachea somoiar khõicheai eka koidiak, lokak zai taka, razpalan suttka diunchi sonvoi asli.
16. Tednam Barabbas mhonnlolo, soglleanchê vollkhicho, êk koidi aslo.
17. Dekhun thõi ektthãi zal'leam lagim Pilatan vicharlem: "Konnak hanvem sôddlolo tumkam zai? Barabbasak vô Krist mhonnttat tea Jezuk?"
18. Nattkaien tãnnim Jezuk apnnachea hatant ghala mhonn Pilat borem zanno aslo.
19. Razpal niti-sodrer boslolo astana, tachê potinnin oxem taka sangunk dhaddlem: "Tea promannik mon'xachê bangoddent tum poddum naka; mhaka tachem sopon poddun, aiz hanvem zaitem bhôglam."
20. Tea mhonnosôr mukhel iadnikamnim ani zannteamnim Barabbasak suttka ani Jezuk mornnachem formonn magunk lokachea monant ghalem.
21. Dekhun hea dogam bhitorlea konnak suttka dil'li tumkam zai?, oso razpalan uloun tankam vichar kelo tednam, tãnnim zobab dilo: "Barabbasak."
22. Pilatan tankam mhollem: "Tôr Krist mhonnttat tea Jezuk hanvem kitem korchem?" Soglleamnim zobab dilo: "Taka khursar mar!"
23. Tannem vicharlem: "Tôr vaitt Tannem kitem kelam?" Punn tim odik vhoddlean bob marunk laglim: "Taka khursar mar!"
24. Tednam, uloun kãich faido na punn odik-odik uchambollai vaddta mhonn polleun, Pilatan udok haddunk lavun loka hujir hat dhule ani mhollem: "Hea promannik mon'xachea rogta vixim mhozo kosloch guneanv na. Hi zobabdari tumchi."
25. Ani ak'khê porjen portipall kelo: "Tachem rogot amcher ani amchea bhurgeam-ballancher poddum."
26. Tedna, tãnnim maglolem toxem, tannem Barabbasak sôddlo ani Jezuk jerbond diun khursar marunk tanchê adhin kelo.
27. Tednam razpalachea soinikamnim Jezuk raznivasant vhelo ani Tachê bhonvtim soglli polttonn ektthãi keli.
28. Tachim vostram kaddun Tacher ek dhakttem tambddem-lal avoronn ghalem;
29. ani kantteancho êk mukutt vinnun Tachea mathear ghalo, ani Tachea uzvea hatant êk boddi dili. Tachê mukhar dimbi môddun, Taka kenddunk te mhonnttale: "Judevanchea raza, noman tuka!"
30. Tacher thimpi uddounk lagle ani boddi kaddun gheun ti Tachê tokler marunk lagle.
31. Tachim khebaddam kelea uprant tãnnim tem dhakttem avoronn kaddlem ani novean Taka Tachim khaxa vostram ghalim; ani khursar marunk te Taka gheun gele.
32. Bhair sortôch, Simanv nanvacho, Siren ganvcho, konn-êk monis tankam mell'llo ani tãnnim taka Jezucho khuris vahunk vettik dhôrlo.
33. Golgota mhonnlolea zagear(mhonngê Kott'tteachea zagear)pavtôch,
34. tãnnim soreant pint misllun Taka pieunk dilem, punn tem chaklea uprant To piena zalo.
35. Taka khursar marlea uprant, tãnnim sorti ghalun Tachim vostram vanttlim,
36. ani thõi bosun te Taka rakhunk ravle.
37. Tachea mathea voir Tacho guneanv oso boroun ghalo: 'Ho Jezu, Judevancho Raza.'
38. Tednam Tachê borabôr dogam punddank-ui khursar marle, ekak uzvean ani dusreak davean.
39. Tennem ieto-veto lôk apli tokli haloit Jezucheô kenddnniô korun
40. mhonnttalo: "Devmondir môddun uddoitai ani tem tin disamnim novean bandtai to tum mum rê?! Tum Devacho Put zalear, tukach nivar ani khursa velo denv atam!"
41. Têch porim dhormxastriam ani zannteam borabôr mukhel iadnik-ui Tachi ninda korun mhonnttale:
42. "Dusreank soddoilim hannem, hachê lagim apnnakuch sôddounk zaina! To Israelacho raza khõi! Tôr taka atam khursa velo denvum-di ani tednam ami tacher bhavarth dovortoleanv!
43. Hannem Devacher visvas tthevlo, atam Devak to zai zalear, Tannench haka soddouncho, tôr Hanv Devacho put, oxem hannem sanglolem asa!"
44. Têch bhaxen Tachê borabôr khursar marlole te pundd-ui Tacheô kexttaiô kortale.
45. Don'par thaun tin vazo porian sogllea desacher kallôkh poddlo
46. ani sumar tin vaztam Jezun vhoddlea tallean mhollem: "Eli, Eli, lama sabakthani?" mhonngê Deva Mhojea, Deva Mhojea, kiteak Tunvem Mhaka sanddloi?
47. Hem aikun thõi aslolea kãi zannamnim mhollem: "Ho Elijak ulo marta."
48. Ani tanchê modlea eklean dhanv marun ek allombem haddlem, ani tem xirkeant buddoun ani êkê boddiek lavun tannem Jezuk pieunk dilem.
49. Heramnim mhollem: "Rav! Elija Taka sôddounk ieta zalear polleum-ia."
50. Punn aniêk pavtt vhoddlean arddun Jezun prann sôddlo.
51. Tednam Devmondirantlea Gabhareacho podd'ddo voir thaun sokol doxim pinzlo, bhuimkampli, khoddpam futtlim,
52. somadhi ukteô zaleô, ani zaitea melolea dhormvont mon'xancheô kuddi jivont zaleô,
53. ani Tachea punorjivontponna uprant tim aplea somadhintlim bhair sorun Povitr Xarant gelim ani sobar zannank dixtti poddlim.
54. Bhuimkamp ani her ghòddtalem tem polleun, xotpoti ani tachê borabôr Jezuk rakhtale te zobor bhieun mhonnunk pavle: "Ho khoreponnim Devacho Put aslo!"
55. Jezuchi seva-chakri korun Galileiak thaun Tachê pattlean ailoleô sobar bailô thõi asleô ani pelean ravun hem sogllem polletaleô.
56. Tanchê bhitôr Magdalachi Maria, Jakobachi ani Juzechi avoi Maria, ani Zebedevachea putanchi avoi.
57. Sanz zalea uprant, Juze nanvacho, Arimateiacho êk girest monis ailo; to-i Jezucho xis zal'lo.
58. Tannem Pilata-xim vochun Jezuchi kudd magli. Tednam Pilatan ti kudd diunk laili.
59. Kudd gheun Juzen ti êkê nitôll olin guttlaili
60. ani khoddpant katrun kel'lê aplê novê somadhint ti nikhipili. Magir tannem êk vhoddli fatôr ghunvddaun haddli ani, somadhichea darak ti lavun, apunn gelo.
61. Magdalachi Maria ani dusri Maria somadhi mukhar bosun ravleô.
62. Dusrea disa, mhonngê Toiarechea Disa uprant, mukhel iadnik ani Farizev ektthãi zaun Pilata sorxem gele;
63. tãnnim mhollem: "Xrêxtt Razpala, tea fottingan jivo astana oxem sanglam mhonn amkam ugddas asa: 'Tin dis zatôch hanv novean jivont zatolom.'
64. Mhonnttôch tisro dis porian somadhi bori korun rakhunk lai; na zalear, tache xis ghoddiek ieun taka choriam vhortit ani lokak sangtit: 'To melleantlo jivont zala.' Hi nimanni fottovnni adim zaun gelam tachê poros odik paxtt zatoli."
65. Pilatan tankam sanglem: "He polle rakhonndar asat; tôr vochat ani tumkam tankta tê bhaxen rakhônn korat."
66. Thõisorle te bhair sorle ani, fatrik xik'ko marun ani rakhonndarancho paro dovrun, somadhi ghôtt korun gele.
