1. Ho updês dilea uprant, Jezu Galileia sôddun gelo ani Jordanachê poltoddi Judeiachea prantant ailo.
2. Puskôll lôk Tachê pattlean gelo ani thõi Tannem tankam borim kelim.
3. Farizev Tachê-xim aile ani Taka kosak lavunk tãnnim vicharlem: "Koslea-i karonnak lagun ghovachean aplê bailek soddun dium-ieta?"
4. Tannem oso zobab dilo: "Tôr orombak thaun Rochnnaran tankam dadlo ani bail kelim,"
5. ani Tannem mhollem: "Hea pasot monis aplea avoi-bapaik sanddtolo ani aplê potinnik ektthovtolo ani dogam-i êk zatolim, oxem tumi vachunk na?
6. Mhonnttôch tim anink dogam nhoi, punn êk. Dekhun Devan zôddlam tem mon'xan doxim korum noiê."
7. Tãnnim Taka vicharlem: "Tôr konn aplê potinnik sôddun dita zalear, tika logn-môddnneachem potr diun sôddchi mhonn Moizesan hukum ghala tachem karonn kitem?"
8. Tannem zap dili: "Tumi nibor kallzache dekhun, Moizesan tumchea potinnink sôddun diunk tumkam rojia dili; punn orombak thaun oxem nhoi aslem.
9. Tôr Hanv tumkam sangtam: konnui aplê potinnik sôddun diit Somurticher add logn-sombondant jietoleanchi gozal Hanv korina ani dusrê kodde logn zait, to pordvar korta."
10. Xisamnim Taka mhollem: "Ghôv-bailê modem poristhiti oxi zalear, lognuch zainastana ravlear odik borem."
11. Punn Tannem oxi tankam zap dili: "Hem manun gheunk soglleanchean zaina. Zankam Devan hem dennem favo kelam tancheanuch zata.
12. Avoichea kusveant thaun izdde zolmolole asat, ani mon'xamnim kel'le izdde asat, ani Sorginchea Rajeak lagun apnnankuch izdde korun gheupi asat. Manun gheunk zata tãnnim hem manun gheunchem."
13. Jezun supurlea bhurgeancher Aple hat dovrunk ani magnnem korunk lokan tankam Tachê sorxem haddlim. Xis tankam bobatt korunk lagle,
14. punn Jezun sanglem: "Bhurgeank Mhojê sorxim ieunk diat ani tankam addainakat, kiteak Sorginchem Raj osleanchench."
15. Magir tancher Tannem Aple hat dovorle ani thõicho bhair sorun To Aplê vatten gelo.
16. Ani ovchit lagim ieun konn-eklean Taka vicharlem: "Guruji, mhaka Sasnnik Jivit mellcheak hanvem kitem borem korunk zai?"
17. Ani Tannem zap diun taka sanglem: "Borea vixim Mhojê lagim kiteak vichartai? Boro to Ekloch. Punn tum Jivitant bhitôr sorunk sôdtai zalear, adnia samball."
18. Tannem vicharlem: "Konn teô?" Jezun mhollem: "Heô: jivexim marum noiê; pordvar korum noiê; chorum noiê; lottik govai dium noiê;
19. tujea bapaik ani avoik man di; ani tuzo môg kortai tosoch tujea peleacho kôr." Tea tornnattean Taka mhollem: "Heô soglleô adnia hanvem samball'leat;
20. mhaka kitem ozun unnem asa?"
21. Jezun taka sanglem: "Tuka sompurnn zaunchi khuxi zalear, voch, tujê lagim asa titlem-i vikun goribank di, ani sorgar tuka tthevo melltolo; tea magir Mhojê pattlean ie."
22. Punn hem utor aikotôch to khontibhorit zaun gelo; tôr taka puskôll girestkai asli.
23. Tednam Jezun Aplea xisank mhollem: "Hanv tumkam sot sangtam: girest mon'xak Sorginchea Rajeant bhitôr sorunk kotthin zatolem.
24. Hôi, anink-ui sangtam: eka girest mon'xak Sorginchea Rajeant bhitôr sorchê poros, eka unttak suiechea bidd'ddeantlean vochunk odik sompem."
25. Hem aikun xis bhov thottakle. Tãnnim mhollem: "Toxem zalear, konnak mhonn taronn melltolem?"
26. Jezun tancher nodor marun mhollem: "Mon'xam kodde hem zaina, punn Deva lagim sogllem zata."
27. Tednam zap diun Pedrun mhollem: "Polle, ami sogllem sanddlam ani Tuzo pattlav kela; tôr amkam kitem melltolem?"
28. Jezun tankam sanglem: "Khorench Hanv tumkam sangtam: sonvsar sogllo novo zaunchea vellar, Mon'xacho Put Aplea mhoimechea xinvasonar bostolo tednam, Mhozo pattlav kela te tumi-i bara xinvasonancher bostoleat ani Israelachea bara kullancher odhikar choloitoleat.
29. Ani zãnnim Mhojea Nanva khatir ghor-dar vô bhav vô bhoinni vô bapui vô avoi vô bail vô bhurgim ballam vô xetam-bhattam sanddleant, tim xembôr pavtti odik ghetolim, ani Sasnnik Jivit tanchem daiz zatolem.
30. Sobar zannam poilim asat tim nimannim zatolim ani nimannim tim poilim zatolim.
