1. Tednam, devcharan Jezuchi porikxa korchê khatir, Povitr Atmean Taka oronneant vhelo.
2. Challis dis ani challis rati Jezun upas kelo, ani tea uprant Taka bhuk lagli.
3. Lagim sorun, naddpian oxem mhollem: "Zôr tum Devacho Put, tôr hea fatranche undde zaunk adnia kôr."
4. Punn Tannem oso portipall kelo: "Povitr Pustokar boroil'lem asa tem hem: 'Unddeach vorvim nhoi, punn Devachea tonddantlem, bhair sorta tea-tea utra vorvim, monis jieta.' "
5. Magir devcharan Taka Povitr Xarant vhelo ani, Devmondirachea kollsar Taka ubo korun,
6. oxem mhollem: "Zôr tum Devacho Put, tôr hanga thaun sokla uddki mar, kiteak oxem boroil'lem asa: 'Tujê vixim To Aplea dutank hovalo ditolo ani tuzo pãi fatracher adllona zaunk, te aplea hatamnim tuka uklun dhôrtole.' "
7. Jezun taka oso zobab dilo: "Oxem-i boroil'lem asa: 'Sorvespora tujea Devachi tunvem porikxa korum noiê.'
8. Tea uprant devcharan Taka eka bhov unch dongrar vhelo ani sonvsarantleô soglleô razvottkiô ani tancho dobazo Taka dakhoilim.
9. Tannem mhollem: "Sorpottun tum mhaka nomoskar korxi zalear, hanv hem sogllem tuka ditolom."
10. Tednam Jezun taka oso portipall kelo: "Pois sor, Soitana, kiteak oxem boroil'lem asa: 'Sorvespora tujea Devak tum bhôztoloi ani Tachi ekleachich seva-bhokti kortoloi." '
11. Xekim devchar Tachê sorxilo koddsorlo ani devdut ieun Tachi seva korunk lagle.
12. Juanvak koidi kelo mhonn aikolea uprant Jezu Galileiak gelo
13. ani Nazaret sôddun, Zebulunachê ani Neftalichê ximer, doria-deger astea Kapernaumant Tannem tthikann kelem.
14. Oxem Izaias provadian sanglolem tem pallon ieunk zai aslem:
15. "Zebulunacho ani Neftalicho ganv! Doriachê vatter Jordanachê pelê toddi asloli Raxttranchi Galileia!
16. Kallokhant ravtolea lokan êk vhôdd uzvadd dekhlo: mornnachi savlli poddlolea ganvant ravtoleank êk uzvadd udelo."
17. Tednam thaun Jezu oxem mhonnun updês diunk laglo: "Jivit bôdlat kiteak Sorginchem Raj ieunchem zalem."
18. Galileiachea Doriachê deger choltana Tannem dogam bhavank Pedru mhonnttat to Simanv, ani tacho bhav Andre doriant pager martale te dekhle; te kharvi asle.
19. Tannem tankam mhollem: "Mhojê pattlean ieiat ani tumkam Hanv mon'xank dhôrtat tosle kharvi kortolom."
20. Ani rokddech, zallam sanddun, te Tachê pattlean gele.
21. Ani thõi thaun fuddem vochun, anink dusre dog bhav Jakob, Zebedevacho put, ani tacho bhav Juanv hoddear, Zebedeva aplea bapaichea sangata apleô rampnni xinvtale te Tannem dekhle, ani tankam apoile.
22. Rokddech, hoddem ani aplea bapaik sanddun, te Tachê pattlean gele.
23. Jezu ak'khea Galileiant bhonvun firun tanchea devsthanamnim xikovnn ditalo, Rajeachem Xubhvortoman porgôtt'talo, ani loka modem sogllea jin'sacho pidda-rôg boro kortalo.
24. Tachem nanv ak'khê Siriek gazlem, ani somest vaittakarank, sobar jin'sanchê pidden ani koxttam-dogdamnim vollvolltoleank, devchar bosloleank, morluk martoleank ani aren poddloleank Tachê sorxem haddtalim ani Tannem tankam borim kelim.
25. Galileia thaun, Dha Nogranchea Pranta thaun, Jeruzalea thaun, Judeia thaun ani Jordana poltoddchea Pranta thaun ieun, lokacheô vhodd urponji Tachê pattlean vetaleô.
