1. Lokacheô urponji polleun Jezu dongrar choddlo. Thõi To boslo ani Tache xis Tachê sorxem aile.
2. Tednam Aplem tondd ugddun, oxem To tankam xikounk laglo:
3. Khuxemonan gorib tim subhagi: Sorginchem Raj tanchem.
4. Rudon kortat tim subhagi: Dev tankam buzvônn ditolo.
5. Bholim tim subhagi: prithum' tanchem daiz.
6. Promannikponnak tanetat ani bhuketat tim subhagi: Dev tankam dhadoxi kortolo.
7. Doiall tim subhagi: Dev tanchi doia kortolo.
8. Kallzan nitoll tim subhagi: tim Devak polletolim.
9. Xanti kortat tim subhagi: Dev tankam Aplim bhurgim mhonnttolo.
10. Promanikponna khatir dhumallo sõstat tim subhagi: Sorginchem Raj tanchem.
11. Mhojê khatir tumkam opmantit, tumkam dhumallo ditit ani sogllea jin'sachem vaitt tumcher add uloitit tednam tumi subhagi.
12. Khuxal ani sontosbhorit zaiat, kiteak sorgar bhov vhoddli mozuri tumchi. Tumchê adim provadiank tosoch tãnnim dhumallo dila.
13. Tumi prithumechem mitt. Punn mittachi kharsann bigòddli zalear, ti taka koxê bhaxen portun diunk zait? Tem fokot bhair uddounchem ani pãiam tolla mostunchem, anink kiteakuch upkarona.
14. Tumi sonvsaracho uzvadd. Dongrachea mathear bandlolem xar lipon urona.
15. Pailê pondak dhampun dovrunk konnuch ponntti laina; ghorant astea soglleank ticho uzvadd poddunk, ti eka peddar dovortat.
16. Têch porim tumcheô boreô kornniô polleun sorgar astea tumchea Bapak mon'xamnim vakhannchê khatir, tumcho uzvadd tanchê mukhar porzollum-di.
17. Somurt vô Provadi, hankam kaddun uddounk Hanv ailam mhonn tumi somzum nakat; tankam kaddun uddounk nhoi, punn sopurnnaiek pavounk Hanv ailam.
18. Khorench tumkam sangtam: sôrg ani sonvsar soro porian ghoddonk zai titlem-i ghòddlea xivai, Somurtintlem ek soglleam-vôn lhan okxor vô okxorank lail'li êk supurli kuru legun na zaunchi na.
19. Mhonnttôch, zôr konn hea supurlea adniam bhitorli êk porian môddtit ani toxem korunk herank xikoitit, tankam Dev Sorginchea Rajeant soglleam-vôn lhan mhonn lêkhtolo; punn teô samballtit ani herank xikoitit, tankam Dev Sorginchea Rajeant vhodd mhonn mantolo.
20. Dekhun Hanv tumkam sangtam: Devak manta tem korunk xastriam ani Farizevam poros tumi odik raji nant zalear, Sorginchea Rajeant tumi bhitôr sorchinch nant.
21. Jivexim marum noiê', purvozank oxem sanglolem mhonn tumi aikolam; ani jivexim martit tancher neaisobhechem khastichem formonn poddtolem.
22. Tôr Hanv tumkam sangtam: konnui aplea peleacher rag dhôrta zalear, tacher khastichem formonn poddtolem; konn-ui aplea peleak 'tum gollio!' mhonntit zalear, tacher Mha-Dhormsobhechem khastichem formonn poddtolem; ani konn-ui taka 'tum devdhôrm naslolo!' mhonntit zalear, ujeachea iemkonddachi khast taka favo zatoli.
23. Mhonnttôch, tujem dan vedi-xim gheun ietai zalear, ani tujea pelea add kitem-i asa mhonn tuka thõi ugddas zait zalear,
24. thõisoruch vedi mukhar tujem dan toxench sôdd ani poilim vochun tujea pelea lagim sondhan kôr; magir portun ie ani tujem dan bhettoi.
25. Tujea vadia lagim upraslolo tontto tachê borabôr vatter astananch borê bhaxen sompoi; na zalear to tuka nitidarachea hatant ditit bi, ani nitidar tuka choukidarachea tabeant ghalun bondkhonnint uddoit.
26. Hanv tuka khorench sangtam: tuzo nimanno pav-as'sarion tunvem farik korisôr thõisorli tuka suttka mellchich na.
27. Pordvar korum noiê', oxem sanglolem asa mhonn tumi aikolam.
28. Tôr Hanv tumkam sangtam: zôr konn-ui êkê ostorecher kamcharim dolle ghalit, tannem aplea kallzant tichê kodde pordvar kelo.
29. Tuzo uzvo dollo patok korunk tuka oddun vhorta zalear, to umttun kadd ani bhair uddoi, kiteak tuji ak'khi kudd iemkonddant uddoun gheunchê poros, tujea ekach sandeacho nas zal'lo tuka odik borem.
30. Ani tuzo uzvo hat patok korunk tuka oddun vhorta zalear, to katôr ani bhair uddoi, kiteak tuji ak'khi kudd iemkonddant gel'lê bodlek, tuzo êkuch sandho bigòddlo zalear tuka odik borem.
31. Hachê bhair oxem sanglolem asa: Konn-ui aplê potinnik sôddun ditolo zalear, poilem tannem tika logn-môddnneachem potr boroun diunchem.
32. Punn Hanv tumkam sangtam: Somurticher add logn-sombondant jietoleanchi mat gozal kuxin dovrun, zo aplê potinnik sôddun dita, to tika pordvarinn zai-xi korta; ani konn logn-môddnneachem potr diun sôddlolê bailê kodde logn zait zalear, to pordvar korta.
33. Anink-ui purvileank sanglolem tumi aikolam: Soput môddum noiê, punn Sorvesporak tunvem dil'lea soputank pallo di.
34. Tôr Hanv tumkam sangtam: soput diunchoch nhoi: zaum sorgachean, kiteak Devachem xinvason tem;
35. zaum prithumechean, kiteak Tachea pãianchi monnoi ti; nhoi mhonn Jeruzaeachean, kiteak Vortea Razachem Xar tem.
36. Tujea matheachean-ui soput dium noiê, kiteak tacho êk-ui kens dhovo vô kallo tujean korunk zaina.
37. Tumchem ulovop itlench zaum-di: hôi zalear hôi, nhoi zalear nhoi; hachê-von ogllem tem vaittovea koddlem ieta.
38. Dolleak dollo, dantak dant': oxem mhonnlolem tumi aikolam.
39. Punn Hanv tumkam sangtam: vaitt mon'xak tum addainaka; konn tuka uzvea polear marit zalear, dusro-i polo taka dakhoi.
40. Konn tujem angavlem vhorunk neaisobhent vivad korit zalear, taka tuzo jubo-i vhorum-di.
41. Ani konn-ui tuka êk kôs cholunk boll korit zalear, don kos tachê sangatim chol.
42. Tujê kodde magit taka di; ani tujê lagim uxnnem magun gheunk sôdta taka patt vôllum naka.
43. Tujea peleacho môg kortoloi ani tujea dusmanacho dvês dhôrtoloi:'oxem sanglolem tumi aikolam.
44. Punn Hanv tumkam sangtam: tumchea dusmanancho môg korat ani tumkam piddapidd ditoleam pasot magat;
45. hê porim tumi tumchea sorginchea Bapachim bhurgim zatoleat, kiteak To Aplo suria vaitt toxench borea mon'xancher ude-so korta, ani Aplo paus promannik toxench khottea mon'xancher ghalta.
46. Tumcho môg kortoleancho tumi môg korxat zalear, kosli tumkam mozuri mellot? Dônddvosuldarui toxench korinant?
47. Ani tumchea bhav-bhoinnankuch tumi solam korxat zalear, vhoddlem-xem kitem kelem tumi? Onbhavarthi legun oxench kortat ki na?
48. Mhonnttôch, zoso tumcho sorgincho Bap sopurnn, toxinch tumi-i sopurnn zaiat.
