1. Sov disam uprant Pedruk, Jakobak ani tachea bhava Juanvak Jezun eka unch dongrar kuxin vhele
2. ani tanchê mukhar Tachem rup bodòl'lem. Tachem mukhamoll suria porim loklokit zalem ani Tachim vostram uzvadda porim dhovim-ful zalim.
3. Ovchituch Moizes ani Elija Tachê kodde uloitale te tankam dixtti poddle.
4. Tednam Pedrun Jezuk mhollem: "Saiba, ami hangach ravlear borem. Tuka zai zalear, tin tombu hanga hanv ubartam: êk Tuka, êk Moizesak ani êk Elijak."
5. To uloita thõich astana oxem zalem ki tancher eka porzollit kupan savlli ghali, ani ovchit kupantlo êk tallo oxem uloilo: "Ho Mhozo Put, kherit opurbaiecho; Tacher asa Mhojem dhadosponn. Tachem tumi aikat."
6. Hem aikun, xis omte poddle ani ekdom bhiele.
7. Punn Jezun lagim sorun tankam hat lailo ani mhollem: "Utthat, bhieum nakat."
8. Dolle ugddun polle zalear tankam Jezu bogor anink konnuch dislo na.
9. Dongra vele denvtastana Jezun oxem formailem: "Mon'xacho Put mel'leantlo punorjivont zai-sôr hea dorxonachi khobor konnakuch sangum nakat."
10. Ani Tachea xisamnim Tachê kodde oxem vicharlem: "Elija poilo ieunk zai , oxem dhormxastri kiteak mhonnttat tôr?"
11. Tannem oxi zap dili: "Elija ietolo khoro, ani sogllem tharear ghaltolo;
12. punn Elija ailo mhonn Hanv tumkam sangtam, ani tãnnim taka vollkhun ghetlo na ani apnnank zai toxem taka kelem. Têch porim Mon'xachea Putan-ui tanchea hatantlem sõschem asa."
13. Tednam Juanv Batista vixim To uloitalo mhonn xis somzole.
14. Ani Jezu lôk aslo thõi pavtôch êk dadlo Tachê sorxim ailo, ani Tachê mukhar dimbiêr poddun,
15. tannem mhollem: "Saiba, mhojea putachi kaklut kôr! taka moddnnem marta ani to chôdd koxttovta; sobar pavtti ujeant ani bhonvn-bhonvn udkant to poddta;
16. hanvem taka Tujea xisam sorxim vhelo, punn tanchean taka boro korunk nozo zalem."
17. Tednam Jezun portipallun mhollem: "Bhavarth nasloli ani khotti pinddka tumi! Kitlo vêll mhonn tumchê sorxem Hanvem ravchem? Kedna porian Hanvem tumkam sõschim? Taka hanga Mhojê-xim haddat."
18. Ani Jezun taka bobatt kortôch, devchar tachê velo bhair sorlo ani to bhurgo têch ghoddier thaun boro zalo.
19. Tednam Jezu sorxem kuxin ieun xisamnim vicharlem: "Taka bhair ghalunk amchê kodde kiteak ghòddlem na?"
20. Jezun tankam sanglem: "Tumcho bhavarth unno dekhun. Hanv tumkam khorench sangtam: sansvachea konnea edo tumkam bhavarth asot zalear, hea dongrak tumi mhonnttoleat: 'Hanga thaun thõi voch!', ani to vetolo; ani tumchean korunk zaina toslem kãich aschem na."
22. Te Galileiant ektthovlole astana, Jezun tankam mhollem: "Mon'xacho Put mon'xanchea hatant poradhin zatolo,
23. te Taka jivexim martole ani tisrea disa Dev Taka punorjivont kortolo." Hem aikun tankam motti khônt zali.
24. Te Kapernaumant pavtôch, Devmondirachi pott'tti vosul kortoleamnim Pedru sorxem ieun vicharlem: "Tumcho Guru ordea staterachi vorgonni farik korina?"
25. Tannem zobab dilo: "Korta." Ani oxem mhonnun to ghorant bhitôr gelo. Punn to ulounchê adinch Jezun taka mhollem: "Simanv, tuka kitem dista? Sonvsarantle raza konnam koddcho dôndd vô pott'tti ghetat? Aplea nagrikam koddcho vô porkeam koddcho?"
26. Tannem zobab dilo: "Porkeam koddcho." "Mhonnttôch nagrikam suttlim.
27. Punn tankam vaitt dêkh dina zaunk, doriant vochun gori ghal, ani poili choddta ti maslli dhôr, tichem tondd ugôdd ani tantum tuka êk stater melltolo; to ghe ani Mhojea ani tujea nanvan tankam di."
