1. Sorginchem Raj oxem: êk bhattkar fantear utthun aplea dakanchea molleant kamak launk manai sôdunk bhair sorlo.
2. Disvoddeak êk dinar farik korunk vavraddiam lagim koblat korun, tannem tankam aplea molleant dhaddle.
3. Sumar nnov vaztam bhair sorun tinttear bekar aslolea herank tannem dekhle
4. ani tankam mhollem: 'Tumi-i mhojea molleant vochat ani hanv tumkam favo tem ditolom.'
5. Ani te gele. Portun bara ani sanjechim tin vaztam bhair sorun tannem toxench kelem.
6. Sumar panch vaztam to anink êk pavtt bhair sorlo ani anink-ui ube aslole taka mell'lle, ani tannem tankam mhollem: 'Tumi ak'kho dis hangasôr kiteak bekar ravleat?'
7. Tãnnim zobab dilo: 'Amkam konnench vavrak launk nant dekhun.' Tannem tankam sanglem: 'Tumi-i mhojea molleant vochat.'
8. Tinsanam molleachea dhonian aplea mukdomak mhollem: 'Vavraddiank apoi ani nimanneam thaun suru korun poileank porian disvoddo di.'
9. Sumar panch vaztam kamak laglole te aile ani zonn-ekleak êk dinar mell'llo.
10. Poile ailole te lagim sorun apnnank odik melltolem mhonn somzole, punn tankam-i zonn-ekleak êkuch dinar mell'llo.
11. Tãnnim to ghetlo khoro, punn te bhattkaracher gunngunnun mhonnunk lagle:
12. Hea nimanneamnim êkuch tas bhôr kam kelam ani ami zalear ak'khea disacho bhar ani hunêt ghetleant, tori amkam ani tankam tunvem ek sarke kelei.'
13. Punn tantlea ekleak zobab diun tannem sanglem: 'Ixtta, hanv tuka onit korina; tôr eka dinarachi tunvem mhojê kodde koblat kelinãi?
14. Tujem tem ghe ani voch. Tuka dilam titlench hea nimanneank-ui diunk mhaka khuxi.
15. Tôr mhojea poixeanchem mhaka zai tem mhojean korum nozo? Vô hanv boro mhonn tuzo dollo futtlo?'
16. Hêch porim nimannim tim poilim zatolim ani poilim tim nimannim zatolim."
17. Jeruzaleak choddon vetana, Jezun vatter Bara Xisank kuxin vhele ani tankam sanglem:
18. "Polleiat, ami Jeruzaleak choddot vetanv ani Mon'xachea Putak mukhel iadnikanchea ani dhormxastrianchea hatant ghaltole; Tacher te mornnachem formonn martole
19. ani Tacheô moskoriô korunk, Taka jerbond diunk ani khursar marunk Taka videxianchea hatant poradhin kortole; ani tisrea disa Dev Taka punorjivont kortolo."
20. Tednam Zebedevachea putanchi avoi Tachê sorxem aplea putank gheun aili ani Tachê kodde kitem magunk ailolê bhaxen Tachea pãiam poddli.
21. Tannem tika mhollem: "Tuka kitem zai?" Tinnem mhollem: "Hea mhojea dogam putank, ekleak Tujea uzvea hata ani dusreak davea hata, Tujea Rajeant bosunk lai."
22. Jezun portipall kelo: "Tumi kitem magtat tem tumich nokllot. Hanv pietolom tea patrantlem tumchean pieunk zait?" Tãnnim mhollem: "Hôi, zata."
23. Tannem tankam sanglem: "Mhojea patrantlem tumi pietoleat khore, punn Mhojea uzveak vô daveak bosunk diunk Mhojê adhin na; te zage Mhojea Bapan nirmun dovorleat tankam."
24. Hem aikun her dha zann tea dogam bhavancher chiddle.
25. Punn Jezun tankam Apnna sorxem apoun haddun sanglem: "Videxiam modem tanche odhikari tancher apli podvi zobordosten choloitat mhonn ani toxench tanche vhoddil aplê sot'techo bhar tancher ghaltat mhonn tumi zannont.
26. Tumchê modem oxem zaunchem nhoi! Na, tumchê modem konn vhoddlo zaunk sôdit to tumcho sevôk zauncho;
27. tumchê modem konn poilo zaunk sôdit to tumcho gulam zauncho.
28. Oxench Mon'xacho Put herank Aplê chakrek launk ieunk na, bogor heranchi chakri korunk ani somestanchê soddvonnê pasot Aplo jiv diunk aila."
29. Te Jerikea thaun vetana, lokachi vhôdd urpônz Jezu pattlean geli.
30. Ovchit dog kudd'dde vattechê deger bosun asle; tevxilean veta to Jezu mhonn aikotôch, te oxi bob marunk lagle: "Saiba, Davidachea Puta, amchi kaklut kôr!"
31. Oge ravat mhonn lokan tankam bobatt keli; toripunn te odik vhoddlean toxich bob marit ravle: "Saiba, Davidachea Puta, amchi kaklut kôr!"
32. Jezu thamblo ani tankam apoun haddun Tannem vicharlem: "Hanvem tumkam kitem kel'lem zai?"
33. Tãnnim mhollem: "Saiba, Tunvem amche dolle ugôddlole amkam zai."
34. Tanche churchure dhôrun Jezun tanchea dolleank hat lailo; ani rokddich tankam nodor aili ani te Tachê pattlean gele.
