1. Tednam Jeruzalea thaun Farizev ani dhormxastri Jezu-xim aile. Tãnnim mhollem:
2. "Purvozamnim korun dovorloli chal Tuje xis kiteak môddtat? Tôr te jevnna adim aple hat dhuinant."
3. Tannem portipall kelo: "Ani tumi tumchê chalik lagun Devachi adnia môddtat tem kiteak?
4. Tôr Devan sanglam: 'Bapaik ani avoik man di; ani bapaik vô avoik xiraptat tim morun vochum.'
5. Punn tumi mhonnttat: 'Konn-ui bapaik vô avoik mhonnot: Mhojê koddlem kitem-i tuka upkarot aslem, tem hanvem Devak bhettoilam,
6. tednam bapaik vô avoik man diuncho tankam anink kaido na. Oxem tumchê chalik lagun tumi Devachi adnia nopoit keli.'
7. Ddhongiamnô, oxem Izaiasan tumchê vixim adim-fuddench sangun dovorlam tem sarkem:
8. Ho lôk onttamnim Mhaka vakhannta, punn tanchem kalliz Mhojê thaun pois asa.
9. To Mhoji puza korta ti polki puza. To xikoita tim xastram fokot mon'xamnim kel'le kaide!' "
10. Lokak Apnna sorxem apoun Tannem tankam sanglem: "Aikat ani somzun gheiat:
11. tonddant bhitôr veta tem mon'xank mhellim korina; punn tonddantlem bhair sorta tench mon'xank mhelloita."
12. Tednam xisamnim lagim ieun mhollem: "Hem Tujem utor aikun Farizevank opman zalo mhonn zannoi tum?"
13. Tannem portipall kelo: "Mhojea sorginchea Bapan lavunk nant tim sogllim zhaddam umtton vetolim.
14. Tanchi khoboruch naka. Te apunnuch kudd'dde ani dusrea kudd'ddeank vatt dakhounk sôdtat; tôr kudd'ddo kudd'ddeak vatt dakhoit zalear, dog-ui fonddant poddtole."
15. Tednam Pedrun uloun mhollem: "Amkam hê voparichi somzonni di."
16. Jezun zap dili: “Tumkam ozun porian ginean na?
17. Tonddant bhitôr veta titlem-i pottant pavta ani kakusant bhair poddta mhonn tumi somzonant kitem?
18. Punn jem tonddantlem bhair sorta tem kallzant thaun ieta ani tench mon'xank mhelloita.
19. Tôr kallzant thaun bhair sortat vaitt ievzonnô, prannghat, pordvar, pozoddponn, choriô, lottik govaiô, ninda.
20. Mon'xank mhelloitat tim hinch. Punn hat dhuinastana jevlear mon'xam mhellim zainant."
21. Ani Jezu thõicho bhair sorlo ani Tirachea ani Sidonchea prantant koddsorun gelo.
22. Ani ovchit Kanaanchi êk bail, aplea prantantli bhair sorun, oxi huiêl marunk lagli: "Saiba, Davidachea Puta, mhoji kaklut kôr! mhojê dhuvek devchar zobôr piddapidd dita."
23. Punn Tannem tika êk zap dili na. Ani lagim ieun Tache xis Tachê kodde oxem poratun magtale: "Tika vochum-di, ti amchê pattlean bob marit ieta."
24. Punn Tannem portipallun mhollem: "Devan Mhaka fokot Israelachea Ghoranneachea sanddlolea xelliam thãi dhaddla."
25. Tori punn lagim ieun ti Tachê mukhar sorpottli. Tinnem maglem: "Saiba, mhaka pav!"
26. Tannem oxi zap dili: "Bhurgeanchem khann kaddun, tem sunneanchea petteank uddounchem mhollear sarkem nhoi."
27. Tinnem mhollem: "Khorem, Saiba; punn aplea dhoniachea meza vele dhornnir poddtat te kuddke sunneache pette-i khatat, na?"
28. Tednam portipallun Jezun tika mhollem: "Eh bailê, vhôdd tuzo bhavarth! Tuka zai toxem zaum." Ani tichi dhuv têch ghoddier bori zali.
29. Thõicho fuddem sorun Jezu Galileiachea doria-degechean gelo ani dongrar choddun thõi boslo.
30. Ani lokacheô urponji thontteank,khoddiank, kudd'ddeank, moneank ani zaitea herank gheun Tachê sorxim aileô, ani Tachea pãiam lagim tãnnim tankam dovorlim ani tankam soglleank Tannem borim kelim.
31. Monim uloitat, khoddim dhodd zatat, thonttim sarkim choltat, kudd'ddeank nodor ieta mhonn polleun teô urponji ojap zaleô ani Israelachea Devak porkondunk lagleô.
32. Punn Jezun Aplea xisank lagim apoun mhollem: "Hea lokak polleun churchureamnim fòddta kalliz Mhojem. Tin dis zale tim Mhojê borabôr asat ani jevunk khaunk tanchê kodde kãich na; upaxim tankam dhaddunk Mhaka khuxi na;vetana vatter tim poddunk asat."
33. Xisamnim Taka mhollem: "Tôr hê eksurê svater itlea lokak dhadoxi korunk amchê kodde itle undde khõiche astole?"
34. Jezun tankam vicharlem: "Tumchê lagim kitle undde asat?" Tãnnim sanglem: "Sat, ani thoddim bovxim."
35. Tednam lokak dhornnir bosunk lavun,
36. Tannem sat undde ani maslliô ghetlim ani Devak dhinvasun tanche kuddke kele; magir To xisank te diunk laglo, ani xis te lokak vanttunk lagle.
37. Sogllim dhadoxi zai-sôr jevlim. Ani urlolea kuddkeam-tukddeancheô sat panttliô tãnnim bhôrleô.
38. Bhurgeank ani bailank dhorinastana jevlole te dadlech char hozar asle.
39. Ani lokak ghora dhaddtôch To hoddear choddlo ani Magedan’chea prantant gelo.
