1. Farizev ani Saduki Tachê-xim aile ani Tachi porikxa korunk apnnank sorga veli êk khunna dakhoi mhonn Tachê kodde magunk lagle.
2. Tannem oso portipall kelo: "Sanz zatôch tumi oxem mhonnttat: 'Mollob tambddem lal asa, mhonnttôch aiz xitollai astoli;
3. ani sokallim tumi mhonnttat: Mollob tambsar zalam, mollbhott asa; aiz modd astolem.' Mhonnttôch mollbachem rup tumi vollkhunk zannont, punn hea kallacheô khunna mat tumchean vollkhunk zaina
4. Hi atanchi khotti ani bhavarth nasloli pinddka khunna magta! Punn Jonasachê khunnê bhair Dev tika dusri khunna diuncho na." Ani tankam thõich sanddun To gelo.
5. Xis doriachê pelê toddi ietana undde haddunk visorlole.
6. Jezun tankam sanglem: "Polleiat, Farizevanchê ani Sadukinchê fugi vixim chotraien cholat."
7. Ani te apnnam modem mhonnunk lagle: "Ami undde haddunk nant dekhun To oxem mhonntta."
8. Tem somzun Jezun mhollem: "Undde haddunk nant mhonn tumi tumchê modem kiteak uloitat? Tumcho bhavarth khõi asa?
9. Ozun porian somzunk nant tumi? Panch undde panch hozar dadleank pavoile ani kitleô panttliô tumi bhôrun kaddleô, hacho tumkam ugddas na?
10. Toxench sat undde char hozar dadleank pavoile ani kitle korondd tumi bhôrun kaddle, tacho-i bi tumkam ugddas na?
11. Farizevanchê ani Sadukinchê fugi vixim chotraien cholat, oxem Hanvem mhollem tem unddeam sombondim nhoi mhonn tumi koxe somzole nant tôr?"
12. Tednam unddeanchê fugi vixim nhoi, punn Farizevanchê ani Sadukinchê xikovnnê vixim chotraien cholat, oxem Tannem mhonnlolem mhonn te somzole.
13. Filipachea Sezareiachea prantant pavtôch Jezun Aplea xisam kodde vicharlem: "Mon'xachea Putak lôk konn mhonn dhôrtat?"
14. Ani tãnnim zobab dilo: "Kãi zonnam Juanv Batist, konn-konn Elija, dusrim konn-konn Jeremias vô provadiantlo konn eklo, oxem mhonnttat."
15. Tannem vicharlem: "Tôr tumi Hanv konn mhonnttat?"
16. Tednam Simanv Pedru oso uloilo: "Tum Krist, jivea Devacho Put!"
17. Zobab diun Jezun taka mhollem: "Simanv, Jonachea puta, tum subhagi, kiteak rogtamasan nhoi punn sorgar astea Mhojea Bapan hem tuka uktem kelam.
18. Tôr Hanv-ui tuka sangtam: tum Pedru (mhonngê Khoddop) ani hea Khoddpacher Hanv Mhoji Sobha bandtolom, ani ticher zoit vhorunk iemkonddak legun podvi aschi na.
19. Hanv tuka Sorginchea Rajeacheô chaviô ditolom; jea kiteak sonvsarant tum na mhonnxi, taka sorgar Dev na mhonnttolo; ani jea kiteak sonvsarant tum hôi mhonnxi, taka sorgar Dev hôi mhonnttolo."
20. Magir Apunn Krist mhonn konnakuch sangina zaunk Tannem xisank khôr adnia dili.
21. Tednam thaun Jezu Aplea xisank spôxtt sangunk laglo: "Devachê khuxê pormannem, Hanv Jeruzaleak vecho asam; zannteanchea, mukhel iadnikanchea ani dhormxastrianchea hatantlem Hanvem zaitem sõschem asa; te Mhaka jivexim martole; ani tisrea disa Dev Mhaka punorjivont kortolo."
22. Tednam, Taka kuxin vhorun, Pedru oso Taka bhexttaunk laglo: "Kednanch na, Saiba! hem Dev Tuka kednanch nirmina zaum!"
23. Ani Tannem vollon Pedruk sanglem: "Mhojê mukhavelo voch, Soitana! Hanv adllun poddunk Mhojê vatter ubo zal'lo fatôr tum; kiteak tujem chintop mon'xanchem, tem Devachem nhoi."
24. Tednam Jezun Aplea xisank mhollem: "Konnank Mhozo pattlav korchi khuxi asa zalear, tãnnim apnnanchêch khuxechi vatt sôddchi, aplo khuris ukôlcho ani Mhojê pattlean ieunchem.
25. Kiteak jim konn aplo jiv samballun dhôrunk sôdtat, tim aplo jiv hogddaitolim; punn jim konn Mhojê khatir aplo jiv hogddaitat, tim aplo jiv samballun dhôrtolim.
26. Tôr sogllo sonvsar zôddit ani aplo jiv ibaddit zalear, mon'xak koslo adav? Vô aplea jivachê bodlek mon'xan kitem diunk zait?
27. Mon'xacho Put Aplea dutam borabôr Aplea Bapachê mhoimen ietolo, ani tednam zonn-ekleak ap-aplea kornniam pormannem inam' ditolo.
28. Hanv tumkam khorench sangtam: hanga asat tantlim kãi zonnam Mon'xachea Putak Aplea rajeant ailolo polleunchê adim morchim nant."
