1. Mon'xank dakhounchea monan Devachê bhokticheô kornniô mon'xam hujir korina zaunk chotrai dhôrat; na zalear, sorgar astea tumchea Bapa-xim koslich mozuri tumkam mellchi na.
2. Dekhun tum bhik ghaltai tednam, tujê mukhar turturi vazoinaka. Dhongi devsthanamnim ani rosteancher, apnnank mon'xam mukhar man mellchê khatir, toxem kortat. Hanv tumkam khorench sangtam: tãnnim apli mozuri ghetli.
3. Punn tum dhormdan ditai tednam, tuzo uzvo hat kitem korta tem tujea davea hatak kollchem nhoi;
4. tujem dhormdan gupit zaunk zai, ani Zo guptim kel'lem polleta, To tuzo Bap tuka mozuri ditolo.
5. Ani tumi magnnem kortat tednam, dhongiam sarkim zaum nakat. Lokan apnnank polleunchê khatir, devsthanamnim ani rosteanchea nakeanr ube ravun aplim magnnim korchi tankam motti khuxi. Hanv tumkam khorench sangtam: tãnnim apli mozuri ghetli.
6. Punn tum magnnem kortai tednam, tujea khasgi kuddant bhitôr voch, ani dar dhamplea uprant, thõi guptim astea tujea Bapak magnnem kôr; ani Zo guptim kel'lem polleta, To tuzo Bap tuka inam ditolo.
7. Tumi prarthon kortat tednam, videxiam porim zhankum nakat; utrancho bôddbôdd korun, aplem magnnem aikunk ietolem mhonn tim somzotat.
8. Tumi tanchê sarkim zaum nakat, karonn tumkam kitem goroz tem tumi Tachê lagim magchê adinch tumcho Bap zanno.
9. Dekhun tumi oxem prarthon korchem: 'Amchea Bapa sorginchea, Tujem nanv povitr zaum,
10. Tujem Raj [amkam]ieum,Tuji khuxi sorgar zata toxi, sonvsarant zaum.
11. Amcho dispotto giras, aiz amkam di,
12. Ani ami amcher, chukloleank bhôgxitanv, toxem amchim patkam bhogôs,
13. ani amkam tallnnent, poddunk dium naka, punn vaittantlim amkam nivar.'
14. Khorench, tumi dusreancheô chuki bhôgxixat zalear, tumcho sorgincho Bap tumkam-i bhôgxitolo.
15. Punn tumi dusreank bhôgxina zaxat zalear, tumcho Bap tumcheô-i chuki bhôgxicho na.
16. Tumi upas kortat tednam, dhongiam bhaxen khontichem rup tumi gheum noiê; apunn upas kortat mhonn lokak dakhounk tim aplea tonddar kallôkh ghaltat. Hanv tumkam khoreponnim sangtam: tãnnim apli mozuri ghetli.
17. Punn tum upas kortai tednam, tuzo upas lokak nhoi bogor gupit aslolea tujea Bapak dixtti poddchê khatir, tujea matheak tel lai ani tujem tondd dhu; ani Zo guptim kel'lem polleta, To tuzo Bap tuka mozuri ditolo.
18. Punn tum upas kortai tednam, tuzo upas lokak nhoi bogor gupit aslolea tujea Bapak dixtti poddchê khatir, tujea matheak tel lai ani tujem tondd dhu; ani Zo guptim kel'lem polleta, To tuzo Bap tuka mozuri ditolo
19. Sonvsarant tumkam theve ektthãi korum nakat; thõi sannôs ani kidd te khaun ibadd kortat ani chor fôddtat ani chorun vhortat;
20. punn tumkam theve sorgar zomoun dovrat; thõi tancho ibadd korunk sannôs vô kidd na, ani te fôddun vhorunk chor-ui nant.
21. Kiteak tuzo thevo asa thõich tujem kalliz-ui astolem.
22. Kuddicho divo dollo. Mhonnttôch tuzo dollo nivôll asot zalear, soglli tuji kudd uzvaddik zatoli.
23. Punn tuzo dollo nivôll nasot tôr, soglli tuji kudd kallokhant buddtoli. Hea pasot, tujê bhitôr asa to uzvadduch kallôkh zalo zalear, to kallôkh kedo vhoddlo zauncho na!
24. Konnacheanuch borabôr dogam dhoniancho gulam zaum nozo; kiteak to ekleak zolltolo ani dusreacho môg kortolo, vô ekleak chikttun ravtolo ani dusreachi beporva kortolo. Tumchean Devachim ani borabôr Girestkaiechim gulamam zaum nozo.
25. Dekhunuch Hanv tumkam sangtam: tumchea jiva khatir kitem khaunchem-pieunchem, vô tumchê kuddi khatir kitem nheschem-pangurchem, tê vixim huskeum nakat. Jevnna poros jiv ani nhesnna poros kudd vorti nhoi?
26. Varea velea suknneancher nodor marat; tim vompinant, lunvi-i nant ani kodde-i bhôrinant; tori tumcho sorgincho Bap tankam pôsta. Tumi tanchê-von odik molachim nhoi tôr?
27. Ani huske kaddun, aplem auk hat-bhôr vaddounk tumchê bhitorlea konnachean zata zait?
28. Ani nhesnnam vixim tumkam dhasti kiteak? Xetantlim fulam koxim vaddtat tem chintun polleiat; tim koxtt korinant, tim sutui kaddinant.
29. Tôr Hanv tumkam sangtam: Solomon legun sogllea aplea dobajeant tantlea eka sarko nheslona.
30. Tôr aiz asa ani faleam kaddun ujeant uddoitat tem xetantlem tonn hea jin'san Dev nhesoita zalear, tea-vôn kitlo odik tumkam To nettouncho na, holkea bhavarthachea mon'xamnô?
31. Mhonntôch 'ami kitem khatoleanv? kitem pietoleanv? Kitem nhestoleanv?', oxem mhonnun huske kaddum nakat.
32. Oslea soglleachi vaspus kortat onbhavarthi. Tumkam hea sogllea vostunchi goroz mhonn tumcho sorgincho Bap tôr zannoch.
33. Devachea Rajeachea nemam pormannem jieunk ani Takach manta tem korunk zaum-di tumcho vhoddantlo vhôdd husko, ani heô soglleô vostu To tumkam ditolo.
34. Mhonnttôch faleachea disa vixim husko kaddum nakat, faleacho dis aploch husko kaddtolo. Tea-tea disak jem noxtt asa tench puro taka.
