1. Tea disamnim Juanv Batist dixtti poddlo ani Judeiachea oronneant oso updês diunk laglo:
2. "Jivit bôdlat, kiteak Sorginchem Raj ieunchem zalem."
3. "Oronneant êk tallo oso addta: 'Sorvesporacho marôg toiar korat; Tacheô vattô nitt korat. ' " Hea utramnim Izaias provadian sangun dil'lo to hoch.
4. Ho Juanv unttachê lhonvechem angavlem nhestalo ani penkttak chamddeacho pott'tto bandtalo ani toll ani ran'vott mhonv khaun jietalo.
5. Tednam Jeruzaleacho ani ak'khea Judeiacho ani Jordana bhonvtonnchê sogllê talukecho lôk taka mellunk vetalo
6. ani apunn patki mhonn vollkhun gheun Jordanant tachê koddlem snan ghetalo.
7. Zaite Farizev ani Saduki snan gheunk ietat tem polleun, tannem tankam mhollem: "Furxeanchi zat tumi! Ieuncho asa to krôdh vattaiat mhonn konnem tumkam xiddkaileat?
8. Punn tumchem mon khorench bodòl'lam zalear, tachim purtim follam dakhoiat,
9. ani 'Abraham' amcho bapui, oxem tumi tumkanch mhonnum nakat. Tôr hanv tumkam sangtam: hea fatranchi Abrahamak sonsôt utpon korunk Devak tank asa.
10. Atam legun zhaddanchea mullak kuradd ghal'li asa. Mhonntôch jem-jem zhadd borem foll dina, tem-tem Dev katortolo ani ujeant uddoitolo.
11. Hanv jivit bodlopa khatir tumkam udkan snan ditam khorem, punn mhojê pattlean ieta To mhojê-von bollvont, ani Tacheô vhannô hatant dhôrunk mhaka favo na. To zalear Povitr Atmean ani ujean tumkam snan ditolo.
12. Tachi moddkull Tachea hatant asa ani To Aplem kholl nitoll kortolo, Aplo gonv koddeant bhôrtolo ani tonn palovna toslea ujeant lastolo." '
13. Tednam Juanvan Apnnak snan diunchê khatir Jezu Galileia thaun Jordana-xim ailo.
14. Punn Juanv Taka addaitalo, oxem mhonnun: "Mhaka Tujê koddlem snan gheunchi goroz asa, ani Tum mhojê sorxim ietai?!"
15. Punn Jezun taka oso zobab dilo: "Tem atam asum-di; oxem korun, jem Devachê sogllê taronnik ievzonnê pormannem korchem asa, tem sogllem ami palltoleanv." Tednam Juanv kobul zalo.
16. Jezu snan gheun udkantlo bhair sorun iena fuddem, ovchituch sôrg ugòddlo ani Devacho Atmo Apnnacher parvo koso denvun ieta to Tannem dekhlo.
17. Ani okosmat sorgar thaun êk tallo oso gazlo: "Ho Mhozo Put, sogllê opurbaiecho; Tacher asa Mhojem dhadosponn."
