1. Tea disamnim Jezuchi kirti upraza Herodichea kanar poddli
2. ani tannem aplea razvaddeantlea mon'xank mhollem: "Juanv Batistho; to mel'leantlo jivont zala; dekhun tachê vorvim ochoriam zatat."
3. Herodias mhonnlolê, aplea bhava Filipachê bailek lagun , Herodinuch Juanv Batistak dhôrun bandlolo ani bondkhonnint ghal'lo.
4. Karonn Juanv taka mhonnttalo: "Tujea bhavachê bailek tum gheun asai tem tujem kortub sarkem nhoi."
5. Taka to jivexim marunk sôdtalo, punn lokak bhietalo, kiteak lôk Juanvak provadi mhonn mantalo.
6. Uprant, Herodichea zolmachea disa Herodiasichi dhuv soglleam mukhar ieun nachli ani Herod itlo khuxi zalo,
7. ki apnna kodde ti magit titlem-i tika ditolo mhonn soput gheun tannem bhasailem.
8. Avoin tika xikoilolem toxem tinnem maglem: "Juanv Batistachi tokli eka tattant ghalun mhaka hangasôr haddun di."
9. Raza khontibhorit zalo, punn soputak lagun ani ponktik bosloleanchê bhiddek poddon, tannem ti tika diunk laili;
10. ani monis dhaddun bondkhonnint Juanvachem xins kaplem.
11. Tachi tokli eka tattant ghalun haddli ani cheddvak dili ani tannem ti aplê avoi-xim vheli.
12. Juanvache xis aile ani tãnnim tachi kudd vhorun nikhipili, ani vochun Jezuk hi khobor dili.
13. Hem aikona fuddem, Jezu thõicho bhair sorlo ani hoddear bosun êkê eksurê svater, eklo ravchê khatir, koddsorun gelo; punn hem lokak kolltôch, nogram thaun tim Tachê pattlean pãivatten cholun gelim.
14. Hoddea velo denvun Tannem puskôll lokak dekhlo; ani tanche churchure dhorun tanchea vaittakarank borim kelim.
15. Tinsanam Tachea xisamnim lagim sorun mhollem: "Hi svat eksuri ani sanz zali; mhonnttôch lokak dhaddun di; tankam apnnank jevonn-khann viktem gheum-di."
16. Jezun tankam mhollem: "Tãnnim khõisoruch vechi goroz na; tankam khaunk-jevunk tumich diat."
17. Punn tãnnim portipall kelo: "Panch undde ani don maslliô kaddun, amchê lagim hanga kãich na."
18. Tednam Tannem mhollem: "Tim hanga Mhojê-xim haddat."
19. Lokak Tannem tonnacher jevnnak bosunk lailem; panch undde ani don maslliô hatant gheun, Tannem sorgak dolle ubarle ani Devak dhinvaslo; magir unddeanche kuddke kele ani xisam lagim dile, ani xisamnim te lokak vanttle.
20. Sogllim jevlim ani dhadoxi zalim; ani urlole kuddke-tukdde tãnnim ektthãi kele, bara upott bhòrloleô panttliô.
21. Bailank ani bhurgeank dhôrinastana jevlole te dadlech sumar panch hozar asle.
22. Ani rokddench Apunn lokak ghora dhaddta mhonnosôr, Jezun xisank hoddear choddunk ani Apnna adim pelê toddi vochunk lailem.
23. Lokak dhaddlea uprant, To ekloch magnnem korunk dongrar gelo. Tinsan zatôch porian To thõi ekloch aslo.
24. Hoddem bhair doriant pavun lharamnim boddovtalem, kiteak portem varem martalem.
25. Fantea pahrar Jezu doriacher cholun tanchê sorxem ailo.
26. Ani Taka doriacher cholun ieta to polleun, bhut mhonn somzun te bhiele, ani bhirantin tãnnim bob marli.
27. Punn rokddench Jezun tanchê kodde uloun mhollem: "Dhir dhôrat, Hanv To! Bhieum nakat!"
28. Pedrun portipall korun mhollem: "Saiba, Tunch zalear, udkacher cholun Tujê sorxem hanv ie-so kôr."
29. Jezun mhollem: "Ie." Tednam Pedru hoddea velo denvun Jezu sorxim vochunk udkacher cholunk laglo;
30. punn vadoll polleun bhielo ani buddunk laglo. Bob marun tannem mhollem: "Saiba, mhaka vattai!"
31. Ani rokddoch Jezun hat pavoun taka dhôrlo ani mhollem: "Holkea bhavarthachea mon'xa, kiteak mhonn dubavloi tum?"
32. Ani te hoddear choddtat mhonnosôr, varem thamblem.
33. Hoddeant asle tãnnim Tachê mukhar sorpottun mhollem: "Khoreponnim Devacho Put Tum!"
34. Ani pelê toddi pavtôch, te Genezaret ganvant gele.
35. Tea ganvchea mon'xamnim Taka vollkhotôch char-ui kodden sangun dhaddlem; tednam somest vaittakarank Tachê sorxim haddlim;
36. Tachea vostrachê degek tori hat lavunk di mhonn Tachê lagim magtalim, ani hat lailo titlim-i sarkim borim zalim.
