1. Ani Aplea Bara Xisank updês diun sompoilea uprant, Jezu tanchea her nogramnim xikovnn diunk ani provochon korunk thõi thaun fuddem gelo.
2. Tednam, Kristachea kornnianchi khobor bondkhonnint aikun, Juanvan Tachê kodde oxem vicharunk aplea xisank dhaddle:
3. "Ieuncho asa to tunch to, vô ami dusrea konnachi vatt polleunchi?"
4. Jezun tankam oso zobab dilo: "Tumi aikolam ani dekhlam tem vochun Juanvak sangat:
5. kudd'ddim polleunk lagtat, thonttim choltat, koddkaram nitoll zatat, bherim aikotat, melolim jivim zatat, goribank Xubhvortoman porgôtt zata;
6. ani Mhojê vixim zancho bhavarth halona tim mon'xam bhagi."
7. Te niropi thõisorle vetana, Juanva vixim Jezu urponjik mhonnunk laglo: "Tumi kitem mhonn polleunk oronneant gel'leat? Varean halta tosli bet?
8. Na tôr, kitem mhonn tumi polleunk gel'leat? Nazuk-mov vostram neslolo monis? Na; nazuk-mov vostram nestat tim razvaddeamnim astat.
9. Tôr kiteak mhonn gel'leat tumi? Eka provadiak polleunk? Hôi, ani to provadia-vôn vorto mhonn Hanv tumkam sangtam.
10. Ho polle tujê mukhar Hanv Mhojea dutak dhaddtam ani to tuji vatt tujê fuddem toiar kortolo,' oxem mhonn zachê vixim boroilolem asa to hoch.
11. Hanv tumkam khorench sangtam: bailank zolmol'lea bhurgeam bhitôr Juanv Batista poros vhôdd dusro konn upzunk na; toripunn Sorginchea Rajeant odik lhan tim tachê-von vhodd.
12. Juanv Batist aila tednam thaun tem aiz porian Sorginchem Raj nêtt bhôgta, ani nêtt kortat tim tem zhombun ghetat.
13. Sogllea provadiamnim ani Somurtin dil'lo sondêx Juanv ie porian choltalo.
14. Ani tumi hem mat manun ghetoleat zalear, ieuncho aslo Elija to hoch.
15. Aikunk kan asat tãnnim aikunchem.
16. Hi atanchi pinddka konnak mhonn Hanvem sôr korchi? Moidanar bosun ravlolea bhurgeanchea khella-pongddam sarki ti. Ap-aplea pongddachea vangddeank tim oxim ulo kortat:
17. Ami tumkam nachpachim songitam vennuncher vazoilim, punn tumi nachle nant; ami tumkam vilapachim gitam gailim, punn tumi roddlim nant.
18. Tôr Juanv jevonn toxem pivonn chakinastana ailo, ani lôk mhonntta: 'Tacher devchar bosla.'
19. Mon'xacho Put khaun-pieun ailo, ani lôk mhonntta: 'Ho asa pottio ani bebdo, dônddvosuldarancho ani patkiancho ixtt.' Tori Devachê zannvaiechim kamam tika sakxi ditat."
20. Magir, zõi-zõi Apnnem ogllim vismitam kel'lim, tea nogrank, tãnnim jivit bodôl'lem na dekhun, Jezu oso bexttaunk laglo:
21. "Korazin, tujem kotta! Bethsaidê, tujem kotta! Tôr tumchê modem kel'lim vismitam Tir ani Sidon nogramnim kel'lim zalear, kedna tim sakafottem ani gobôr ghalun prachit kortolim aslim!
22. Hanv tumkam khorench sangtam: Zhôddtechea Disa Tirachi ani Sidonchi zhôddti tumchê-itli khôr zaunchi na.
23. Ani tum Kapernauma, voir mollba porian tum ubaron pavtoleim mhonn ravtai kitem? Iemkondda porian tum sokla xevttotoleim, kiteak tujê sovem keleant tim vismitam Sodomant kel'lim zalear, aiz porian tem ubem urtolem aslem.
24. Hanv tumkam khorench sangtam: Zhôddtechea Disa, Sodomachi zhôddti tujê itli khôr zaunchi na."
25. Tednam Jezu oso udgarlo: "Bapa, sorga ani prithumechea Dhonia, heô vostu zannarank ani xanneank lipoun dovorleôi ani supurlea ballkank ukteô keleôi mhonn Hanv Tuka dhinvastam.
26. Hôi, Bapa, oxench korunk Tuka borem dislem.
27. Sogllem Mhojea Bapan Mhojea hatant ghal'lem asa. Ani Putak konnuch pok'ko vollkhona, bogor ekloch Bap; toxench Bapak konnuch pok'ko vollkhona, bogor ekloch Put ani zankam Put Aplê khuxen Bap dakhoun diit, tinch mon'xam.
28. Sogllim tumi koxtt kortat ani ojeachea bhara khal asat tim, Mhojê-xim ieiat ani Hanv tumkam somadhan kortolom.
29. Mhojem zum' tumcher gheiat ani Mhojê lagim xikat, kiteak Hanv dulôb ani lhanvik kallzacho, ani tumchea jivak somadhan melltolem;
30. tôr Mhojem zum' gheunk sompem, ani vahunk hollu Mhojem ojem."
