1. Aplea Bara xisank apoun haddun, Jezun tankam mhellea atmeancher odhikar dilo ani devchar kaddunk ani sogllea jin'sacho pidda-rôg boro korunk tankam podvi dili.
2. Bara Dhormdutanchim nanvam him: poilo Pedru mhonnttat to Simanv, ani tacho bhav Andre; Zebedevacho put Jakob ani tacho bhav Juanv;
3. Filip ani Bartolomêv; Tomas ani dônddvosuldar Matêv; Alfevacho put Jakob, ani Tadêv;
4. Krantikar Simanv, ani Tacho ghat ghetlo to Judas Iskariot.
5. Hea Bara Zannank Jezun oso updês diun dhaddle: "Onbhavarthianchea ganvanchi vatt dhôrum nakat ani Samariekaranchea nogramnim bhitôr sorum nakat;
6. punn odik korun Israelachea Ghoranneachea sanddlolea menddram sorxem vochat.
7. Ani vochun 'Sorginchem Raj ieunchem zalem!', oxem porgôtt korat.
8. Vaittakarank borim korat, mel'leank jivont korat, koddkarank nitoll korat, devchar kaddat. Tumi funkott ghetlam, funkea diat.
9. Tumchê kodde bhangar, rupem, tambem legun potient aschem nhoi;
10. nhoi mhonn vattek bhuti, vô don angavlim, vô vhannô, vô danddo; kiteak vavraddiak aplem jevonn-khann favo.
11. Khõichea eka nogrant vô ganvant bhitôr sortôch, tantunt konn mannsugecho monis asa to sôdun kaddat ani thõisorle bhair sorosôr tanger ravat.
12. Tachea ghorant bhitôr sortana, 'hea ghorak xanti!', oxem mhonnun taka noman korat.
13. Ani tea ghorak favo zalear, tumchi xanti tacher denvtoli; favo nhoi zalear, tumchi xanti tumkam porot ietoli.
14. Ani konn-ui tumkam ievkar dina zatit zalear, nhoi mhonn tumchim utram aikona zatit zalear, tea ghorantle vô nograntle bhair sorun tumchea pãianchi dhull fafddun uddoiat.
15. Hanv tumkam khorench sangtam: Zhôddtechea disa Sodom ani Gomorra nogranchi zhôddti hea nograchê zhôddtê itli khôr zaunchina.
16. Aikat! Landdgeam modem menddram koxim Hanv tumkam dhaddtam. Dekhun sorpam porim chotur, tori parveam porim sadim zaiat.
17. Mon'xam thãi xidduk ravat; tim tumkam dhôrun dhormsobhent vhortolim ani aplea devsthanamnim tumkam jerbond martolim.
18. Mhojê pasot odhikariam ani razam mukhar, tanchea ani onbhavarthianchea fuddeant tumi govai diunchê khatir, tumkam vhortolim.
19. Punn tumkam dhôrun ditôch, koxem ani kitem ulounchem hacho husko dhôrum nakat; tê ghoddier tumi kitem ulounchem tem Dev tumkam kolloitolo;
20. kiteak uloitolim tim tumi nhoi; punn tumchea Bapacho Atmo tumchê udexim uloitolo.
21. Jivexim marunk bhav-bhoinn bhavam-bhoinnink ani avoi-bapui putam-dhuvank lavun ditolim; bhurgim avoi-bapaicher uprasun tancho prann kaddunk laitolim.
22. Mhojea nanva pasot sogllo lôk tumcho dvês kortolo; punn xevottak porian thir ravtit tinch taronn zôddtolim.
23. Eka nogrant tumkam dhumallo ditit zalear, dusrea nogrant pollun vochat. Hanv tumkam khorench sangtam: Mon'xacho Put ieunchê fuddem Israelachim nogram tumi bhonvun sompounchim nant.
24. Aplea guru poros xis ani aplea dhonia poros chakôr vorto nhoi;
25. xis aplea guru sarko, ani chakôr aplea dhonia sarko zait zalear puro! Ghorabeachea dhoniak Beelzebul mhonnllo zalear, tachea ghorcheank tea-vôn anink kitem mhonnchim nant!
26. Tea pasot tankam bhieum nakat. Atam dhamplolem asa titlem-i uktem zalea xivai ravchem na; ani atam gupit asa titlem-i kollit zalea xivai urchem na.
27. Hanv tumkam kallokhant sangtam tem tumi disa-uzvadda sangat; ani kanant futfutlolem tumi aikolam tem pattsar thaun porgôtt korat.
28. Kuddicho jiv kaddtat tankam bhieum nakat, kiteak tanchean otmeacho jiv kaddunk zaina; punn otmeacho ani kuddicho ekach farak iemkonddant nas korunk tank asa Taka odik bhieiat.
29. Eka as'sarionak don xerkam viktat nhoi? Toripunn tantlem ek-ui tumchea Bapachea hukuma virêt bhuim poddona.
30. Tumchê tokleche kens porian soglle mêzlole asat.
31. Mhonnttôch tumi bhieum nakat. Xerkanchea bhirea poros tumi odik vortim.
32. Dekhun konn-ui Mhaka mon'xam hujir vollkhun ghetit zalear, tankam sorgar astea Mhojea Bapa hujir Hanvui vollkhun ghetolom;
33. punn Bapa hujir konn-ui Mhaka vollkhun ghena zatit tôr, tankam sorgar astea Mhojea Bapa hujir Hanv-ui vollkhun gheuncho na.
34. Hanv prithumecher xanti haddunk ailam mhonn somzum nakat; xanti nhoi, punn torvar haddunk Hanv ailam;
35. kiteak putak tachea bapaicher add, dhuvek tichê avoicher add, sunek tichê sasucher add doxim korunk Hanv ailam;
36. mon'xacho dusman tachoch ghorcho lôk.
37. Mhojê-vôn aplea bapaicho vô avoicho odik môg kortat tim Mhaka laik nhoi; Mhojê-vôn aplea putacho vô dhuvecho odik môg kortat tim Mhaka iukt nhoi;
38. aplo khuris gheun Mhojê pattlean ienant tim Mhaka purtim nhoi.
39. Aplo jiv samballunk sôdtat tim aplo jiv hogddaitolim, ani Mhojê pasot aplo jiv hogddaitat tankam aplo jiv melltolo.
40. Tumkam ievkar ditat tim Mhaka ievkar ditat, ani Mhaka ievkar ditat tim Mhaka dhaddla Taka ievkar ditat.
41. Eka provadiak, to provadi mhonn, svagôt kortat tim provadiachi mozuri ghetolim; ani Promannik eka mon'xak, to Promannik mhonn svagôt kortat tim Promannik mon'xachi mozuri ghetolim.
42. Hanv tumkam sot sangtam: hea lhanantlea ekleak, to Mhozo xis mhonn, thondd udkacho êk pelo legun konnem pieunk dilo zalear, tankam mozuri mell'lea bogor urchi na."
