1. Tea disamnim, eka Son'vara, Jezu xetantlean vetalo. Tache xis bhukel'le dekhun konnsam tôddun khaunk lagle.
2. Farizevamnim tem polleun Taka mhollem: "Son'vara disa korum nozo toslem kam he polle Tuje xis kortat."
3. Punn Tannem tankam sanglem: "Davidak ani tachea sangatiank bhuk lagli tednam, tannem kitem kelem tem tumi vachunk na kitem?
4. Mhonngê, koxê bhaxen to Devachea ghorant bhitôr sorlo ani taka ani tachea boraborcheank khaunk sot'tia nasli punn fokot iadnikamnim khavum ietale te Devak bhettoilole undde tãnnim khele hem tumi vachunk na kitem?
5. Vô Son'vara disa iadnik Devmondirant Son'var môddtat, torui guneanvkar zainant, hem-i tumi Somurtint vachunk na bi?
6. Tôr Hanv tumkam sangtam: Devmondira-vôn vhôdd Konn-Eklo hanga asa.
7. Iôdn naka Mhaka, doia zai', hea utrancho ôrth tumi zanno asleat zalear, kednanch niropradhi mon'xank tumi guneanvkar korche nasleat.
8. Tôr Mon'xachea Putak Son'varacher-ui odhikar asa."
9. Thõi thaun To fuddem gelo ani tanchea devsthanant bhitôr sorlo.
10. Ani zalem oxem: hatak ar zal'lo êk monis thõisôr aslo. Jezucher kosloi êk guneanv ghalunk mellot kai mhonn polleunk, tãnnim Tachê kodde vicharlem: "Son'vara disa konnak boro korum-ieta?"
11. Tannem tankam sanglem: "Tumchê bhitôr konn-eka mon'xa kodde êk xelli asot ani ti Son'vara disa khonddint poddli zalear, to tika dhôrun bhair kaddcho na kai?
12. Xelliê poros monis kitlo mhonn vorto! Mhonnttôch Son'vara disa borem korum-ieta, oxem zalem."
13. Magir Tannem tea mon'xak mhollem: "Tuzo hat sôdd." Ani tannem to sôddlo; ani tachea dusrea hata bhaxen to adim aslo toso sarko boro zalo.
14. Hem polleun Farizev thõisorle bhair sorle ani Jezucho ghat koso gheuncho tê vixim guddmêll korunk lagle.
15. Punn tem somzun To thõisorlo koddsorlo. Zaitim zanna Tachê pattlean gelim ani tankam soglleank Tannem borim kelim,
16. punn Apnnak porgôtt korinakat mhonn Tannem tankam xiddkailim.
17. Izaias provadian sanglolem tem oxem khorem zalem:
18. "Ho asa sevôk Mhozo, Hanvem vinchun kaddlolo, Mhojê opurbaiecho,Tacher purnn sontôs Mhozo! Mhojem taronn sorv raxttrank, porgôtt korunk, Hanv taka Mhojea Atmean bhôrtolom.
19. Vad-vivad to korcho na, bob marun ardduncho na, tacho tallo rosteancher konnak aikunk ieuncho na. Sotak zoit mello porian futtloli bet môddcho na,
20. ozun dhunvorti doxir to kodinch palouncho na.
21. Tachea Nanvar raxttrancho asa sogllo bhorvanso!"
22. Tednam devchar boslolea eka kudd'ddea-moneak Jezu sorxem haddlo ani Tannem taka boro kelo; ani to ulounk ani polleunk laglo.
23. Sogllo lôk thottakun mhonnttalo: "Davidacho Put ho zait kai?"
24. Punn Farizevamnim hem aikun mhollem: "Ho monis devchar kaddta tôr, fokot devcharanchea pordhana Beelzebulachea odhikaran."
25. Tancheô kolpona vollkhun Jezun tankam mhollem: "Khõichea-i eka rajea bhitôr nagrikanche pongodd ekamekacher uprasun zhuz korunk lagle zalear, tem raj padd zatolem; ani khõichea-i eka xarantlea loka modem vô eka kuttumbantlea vangddiam modem zhogddim-zhuzam upraslear, tem xar vô tem kuttumb ubem dhòrchem na
26. Soitanachea rajeant-ui ekamekacher zhuztole pongodd asat zalear, tem raj fantton gelem,oxem zalem. Tôr tem anink koxem mhonn ubem urtolem?
27. Ani zôr Hanv Beelzebulachê podven devchar kaddtam, tumchim bhurgim konnachê podven kaddtat tôr? Mhonnttôch tinch tumchi nit kortolim.
28. Punn Hanv Devachea Atmea udexim devchar kaddtam zalear, Devachem Raj tumchê thãi pavlem, oxem zalem.
29. Tea bhair, bollixtt mon'xak poilo bandlea bogor, tachea ghorant bhitôr sorun tacho mal luttunk zait? Taka bandlear mat tachem ghor luttunk zata.
30. Mhojea bhaga nant tim Mhojer add; ani Mhojê borabôr punzainant tim ximpddaitat.
31. Dekhun Hanv tumkam sangtam: sogllim patkam ani devninda Dev mon'xank bhôgxitolo, punn Atmeacher kel'li devninda Dev bhôgxicho na.
32. Ani konn-ui Mon'xachea Putacher vaitt uloitit zalear, tankam Devachem bhogsonnem astolem; punn konn Povitr Atmeacher add uloitit zalear, tankam bhogsonnem aschem na , zaum atanchea zaum fuddlea iugant.
33. Zhadd borem korat ani tachim follam borim zatolim; zhadd vaitt korat ani tachim follam vaitt zatolim, kiteak follam pormannem zhadd vollkhunk mellta.
34. Furxeanchea pileamnô, tumi vaitt zaun tumchean borem ulounk koxem zatolem Kallzantlem bhoron òt'ta tench tonddantlea utramnim vhanvta.
35. Borim mon'xam aplea borea bhanddarantlem borem kaddtat; vaitt mon'xam aplea vaitt bhanddarantlem vaitt kaddtat.
36. Dekhun Hanv tumkam sangtam: mon'xachea tonddantlem bhair sorta tea dor-eka sabsubea utracho Zhôddtechea Disa hixôb diuncho poddtolo.
37. Tujeanch utramnim tum niropradi mhonn ruzu zatolem, ani tujeach utramnim tum opradi mhonn tujer xikxechem formonn poddtolem."
38. Tednam dhormxastriam ani Farizevantlea kãi zannamnim Tachê kodde uloun mhollem: "Guruji, Tujê koddli amkam êk khunna polleunk zai."
39. Tannem oxi zap dili: "Hi atanchi khotti ani ghatki pinddka êk khunna sôdta. Punn, Jonas provadiachi khunna kaddun, Dev tika dusri khunna diuncho na;
40. mhonngê, zoso Jonas tin dis ani tin rati tivmaxeachea pottant aslo, tosoch Mon'xacho Put tin dis ani tin rati zomnichea pottant astolo.
41. Zhôddtechea Disa Ninevehcho lôk hê pinddkê borabôr ubo zatolo ani ticho guneanv dakhoun ditolo, kiteak Jonasachem provochon aikun tannem aplem jivit bodôl'lem; ani polleiat, Jonasa poros vorto hanga asa Eklo.
42. Zhôddtechea Disa Dokhinnechi ranni hê pinddkê borabôr ubi zatoli ani ticho guneanv dakhoun ditoli, kiteak ti prithumechê ximer thaun Solomonachem xanneponn aikunk ail'li; ani polleiat, Solomona poros vorto hanga asa Eklo.
43. Mhello atmo mon'xa velo bhair sortôch sukea soddear visôv sôdit bhonvta , punn taka visôv mellona.
44. Tednam to mhonntta: 'Bhair sorlolom tea mhojea ghorant porot rigtolom hanv.' Ani thõi ie zalear, tem ritem, zhaddlolem ani nettoilolem taka mellta;
45. tednam vochun, apnna-vôn odik noxtte anink sat atme apnna borabôr gheun ieta; ani bhitôr rigun, thõi to aplem tthikann korta, ani tea mon'xachi magirli doxa adlê goti poros paxtt zata. Hê khottê pinddkek-ui toxench ghòddtolem."
46. Oxem To loka kodde uloita thõich astana, ovchit Tachi avoi ani Tachim bhavbhoinn pavun sorlim ani bhair ubim ravun Tachê kodde ulounk sôdtalim.
48. Punn Apnnak ti khobor ditolea lagim uloun, Jezun mhollem: "Mhoji avoi konn? Mhojim bhavbhoinn konn?"
49. Ani Aplea xisank hat dakhoun Tannem mhollem: "Him asat Mhoji avoi ani Mhojim bhavbhoinn;
50. karonn sorgar astea Mhojea Bapachi khuxi kortat titlim-i Mhozo bhav, Mhoji bhoinn ani Mhoji avoi."
