1. Jeruzalea lagim ietôch, Zoitunanchea Dongra sorxim Betfage pavlea uprant, Jezun dogam xisank
2. oxem sangun dhaddle: "Tumchea fuddeant asa tea gramant vochat. Thõi rokddem tumkam melltolem ek bandlolem gaddum ani tachea sangata tachem xingrum. Tankam sôddat ani Mhojê sorxim haddat.
3. Konn-ui tumkam kitem mhonnott tôr, Somiak tanchi goroz asa mhonn sangat, ani to rokddoch tankam vhorunk ditolo."
4. Hem sogllem ghoddon ailem provadia vorvim Devan sangun dovorlolem tem pallchê khatir:
5. "Sion Xarak sangat: 'Ho polle tuzo Rai tujê-xim, ieta; to vinômr-khalto; eka gaddvacher ani tachea xingracher, zum' ghetlolê avoichea poracher, to bosun ieta.' "
6. Xisamnim vochun Jezun tankam formail'lem toxem kelem.
7. Ani gaddvak ani xingrak haddun tãnnim tancher aplim avoronnam ghalim ani Jezuk voir bosoilo.
8. Khub lokan aplim avoronnam vatter patllailim; dusrim kãi zannam, zhaddanche talle môddun, te vatter ximpddaitalim.
9. Fuddlean ani pattlean vetalo to lôk bob marun mhonnttalo: "Davidachea Putak zôi ! Sorvesporachea nanvan ieta taka zôi! Bhov vortea Devak zôi! zôi!"
10. Ani Jeruzaleant provês kortôch, "ho konn kai?" mhonnun ak'khem xar chollboll'lem.
11. Lôk zobab diun mhonnttalo: "Ho Jezu, Galileiantlea Nazaretcho provadi!"
12. Magir Jezu Devmondirant bhitôr sorlo ani Mondirant viktolea ani ghetolea soglleank bhair ghalunk laglo; savkaranchim mezam ani parve viktoleanchim asonam Tannem ômtun uddoilim.
13. Tannem mhollem: "Mhojem Ghor magnneachem ghor, oxem Povitr Pustokar boroil'lem asa, punn tachi tumi choranchi dhôl kelea."
14. Kudd'ddim ani thonttim Tachê sorxim Devmondirant ailim ani Tannem tankam borim kelim.
15. Tannem kel'lim ojapam polleun, ani toxench "Davidachea Putak zôi!" oxem mhonnun bhurgim Mondirant aroddtalim tem polleun, mukhel iadnik ani dhormxastri zobor chiddle,
16. ani tãnnim Taka vicharlem: "Him kitem mhonntat tem tunvem aikolãi mum?" Jezun oso zobab dilo: "Hôi! 'Bhurgeanchea ani dud pietoleanchea tonddantli vakhann'nni Tunvem zôddlii!' oxem tumi kednanch vachunk na bi?"
17. Ani tankam sanddun, Xara bhair sorun To Betaniek gelo ani thõi vostek ravlo.
18. Sokallim Xarant portun ietana Taka bhuk lagli.
19. Ek anjirachem zhadd vattechê degek polleun, To tachê sorxem ailo ani panam bogor tacher kãich Taka mell'llem na. Ani Tannem taka mhollem: "Hea fuddem kednanch tuka foll zaum noiê !" Ani tem anjirachem zhadd teach vellar suklem.
20. Hem polleun xis ojap zale. Tãnnim mhollem: "Arê, koxem mhonn hem anjirachem zhadd khinna bhitôr sukun gelem?!"
21. Jezun portipall kelo: "Tumkam bhavarth asot ani kosloch dubav tumi dhorina zaxat, anjirachea zhaddak Hanvem kelam tem tumi-i kortoleat; itlench nhoi, punn hea dongrak porian tumi oxem mhonnxat zalear: 'Umtton voch ani doriant vochun podd!', toxem ghòddtolem.
22. Ani prarthon kortana bhavarthan tumi magxat titlem-i tumi ghetoleat."
23. Devmondirant vochun To xikoita astana, mukhel iadnikamnim ani lokachea zanntteamnim lagim sorun Taka vicharlem: "Koslê sot'tien heô vostu kortai tum? Ani konnem dilea tuka hi sot'tia?"
24. Jezun portipall kelo: "Hanv-ui tumchê kodde ekuch vichartam: tumi tem Mhaka sangxat zalear, koslê sot'tien Hanv heô vostu kortam, tem Hanv-ui tumkam sangin.
25. Juanvachem snan khõi thaun ailem? Sorgar thaun vô mon'xam thaun?" Ani te apnnanchêch bhitôr oxem torkunk lagle: "Ami sorgar thaun mhollear, to amkam vichartolo: 'Toxem zalear, kiteak tumi tacher bhavarth dovrunk na?'
26. Punn ami mon'xam thaun mhollem zalear, ami lokak bhieunk zai, kiteak sogllim Juanvak provadi mhonn mantat."
27. Dekhun Jezuk portipallun tãnnim mhollem: "Ami nokllonv." Ani Tannem sanglem: "Koslê sot'tien Hanv heô vostu kortam tem Hanvui tumkam sangina."
28. "Tumkam kitem dista? Konn-eka mon'xak dog put asle; tannem poilea sorxem ieun mhollem: 'Puta, voch ani dakanchea molleant aiz kam kôr.'
29. Putan mhollem: 'Vetam, saiba!', punn vochunk na.
30. Magir dusrea lagim vochun, tannem toxench mhollem. Putan zobab dilo: 'Na, vochona!', punn uprant mon bodlun to gelo.
31. Hea dogam bhitôr konnem bapaichi khuxi keli?" Tãnnim mhollem: "Nimannean." Jezun tankam sanglem: "Hanv tumkam khorench sangtam: dônddvosuldar ani xindoll bailô tumchê adim Sorginchea Rajeant vetat.
32. Karonn Juanv Devak manta toslea jivitachi vatt dakhounk tumchê-xim ailo, punn tumi tacher bhavarth dovrunk na; punn dônddvosuldaramnim ani xindoll bailamnim tacher bhavarth tthevlo. Tem polleun tori, tacher bhavarth dovrunk tumi tumchem mon bodlunk na."
33. "Anink êk vopar aikat: Konn-êk bhattkar aslo; tannem êk dakancho mollo lailo, tachê bhonvtonni maddo ghalo, khonnun êk kollombi toiar keli, ani êk gopur bandlo; magir to mollo tannem kullvaddiank kumlleak dilo ani apunn poixilea ganvant gelo.
34. Pikecho vêll lagim pavtôch, aplem kumllem gheunk tannem tea kullvaddiam-xim aplea chakrank dhaddle;
35. punn kullvaddiamnim, tachea chakrank dhôrun, ekleak mar ghalo, dusreak jivexim marlo, ani tisreak fatrailo.
36. Anink êk pavtt tannem dusrea chakrank dhaddle, poilê pavtti-vôn odik, ani tãnnim tankam-i toxench kelem.
37. Mhojea putak man ditole, oxem mhonnun xekim tannem aplea putak tanchê-xim dhaddlo;
38. punn kullvaddiamnim putak polleun apnna bhitôr mhollem: 'Ho tacho daiji; ieiat, haka jivexim marum-ia ani tachem daiz amchem zatolem.'
39. Ani tãnnim taka dhôrun mollea bhair vhelo ani jivexim marlo.
40. Atam molleacho dhoni ieta tednam, tea kullvaddiank to kitem kortolo?"
41. Tãnnim zap dili: "Tea noxtteancho vhôdd bhosm kortolo ani dusrea kullvaddiank, apnnak iogia kallar foll ditat tosleank, aplo mollo kumlleak ditolo."
42. Jezun mhollem: "Povitr Pustokar oxem boroil'lem asa: 'Zo fatôr bandpiamnim sôddun dil'lo toch zalo konnxea-sondhicho fatôr. Hem Sorvesporanuch ghoddun haddlam: tem polleun ami thottak zaleanv.' Hem tumi kednanch vachunk na?
43. Mhonnttôch Aplem Raj Dev tumchê koddlem kaddun ghetolo ani tachim follam ditat toslea videxiank ditolo."
45. Tacheô vopari aikolea uprant mukhel iadnik ani Farizev apnna vixim To uloita mhonn somzole;
46. ani Taka te dhôrunk sôdtale, punn lokak bhiele, kiteak provadi mhonn lôk Taka mantalo.
