1. Hem sogllem uloun sompoilea uprant Jezun Aplea xisank mhollem:
2. "Don disamnim Pask zaunchem asa mhonn tumi zannont; ani Mon'xachea Putak khursar marunk dhôrun ditole."
3. Tednam mukhel iadnik ani porjeche zannte Kaifas nanvachea porom iadnikachea nivasant zomle
4. ani fas manddun Jezuk dhôrunk ani jivexim marunk tãnnim guddmêll kelo.
5. Tori astana tãnnim mhollem: "Hem Utsovachea disamnim naka; lokachi uchambollai zaunk khori."
6. Jezu Betanient Simanv koddkarachea ghorant astana,
7. êk bail eka chondrokanti aidonant unch molachem pormollit tel gheun aili, ani jevnnak boslolo thõi Tachea mathear tinnem tem ôtlem.
8. Hem polleun xis chiddle; tãnnim mhollem: "Ho ibadd kiteak?
9. Hem vhodd molak vikun, goribank diunk zatem."
10. Hem aikun Jezun tankam mhollem: "Hê bailek tumi kiteak kimar kortat? Êk bori kornni tinnem Mhojê sorim kelea.
11. Gorib mon'xam tumchê modem sodam asatuch, punn Hanv sodanch tumchea sangata aschona.
12. Mhojê kuddir hem tel ôtun tinnem Mhaka nikhipinnek toiar kelo.
13. Ak'khea sonvsarak, hem Xubhvortoman porgôtt zait titleam-i svatancher, jem tinnem kelam temi tichea ugddasak mhonn porgôtt zatolem."
14. Tednam Barantlo eklo, mhonngê Judas Iskariot, mukhel iadnikam-xim gelo;
15. tannem mhollem: "Hanv Taka tumchea hatant ghalin zalear, tumi mhaka kitem dixat?" Tãnnim taka rupeache tis nanne mezun dile.
16. Ani to dis thaun Jezuk dhôrun diunk boro soêg to polleun aslo.
17. Fug-naslolea Unddeanchea poilea disa xis Jezu lagim vicharunk aile: "Tujem Pask-Jevonn khõi ami toiar kel'lem Tuka zai?"
18. Ani Jezun sanglem: "Omkea mon'xak Xarant mellunk vochat ani taka mhonnat: 'Guruji oxem sangta: Mhozo vêll lagim pavla; Mhojea xisam borabôr tujea ghorant Hanv Pask kortam."
19. Jezun tankam hukum dil'lo to xisamnim pall'lo ani Pask toiar kelem.
20. Sanz zatôch, Aplea Bara Xisam sangatim To jevnnak boslo.
21. Ani te jevtastana Tannem mhollem: "Hanv tumkam khorench sangtam: tumchê bhitorlo eklo Mhozo ghat gheuncho asa."
22. Te zobor khontibhorit zale ani ek-eklo Taka mhonnunk laglo: "Saiba, hanv nhoi mum to?"
23. Tannem oso portipall kelo: "Mhojê borabôr tattant hat ghala to Mhozo ghat ghetolo.
24. Mon'xacho Put Tachê vixim boroil'lem asa tea pormannem veta khoro, punn zo monis Mon'xachea Putacho ghat ghetolo tachem kotta-kotta! Zolmunkuch naslo zalear tea mon'xak odik borem zatem!"
25. Tacho ghat gheunk vetalo tea Judasan-ui oxem vicharlem: "Guruji, hanv nhoi mum to?" Jezun taka zap dili: "Tunvench sangleim."
26. Ani te jevtastana Jezun unddo ghetlo, Devak dhinvasun to môddlo, to xisank dilo ani mhollem: "Gheiat ani khaiat, hi Mhoji Kudd."
27. Magir Tannem patr ghetlem ani Devak dhinvasun tem tankam dilem ani mhollem: "Tumi somesthantlem pieiat:
28. hem Mhojem Rogot, Korarachem Rogot; sogllea mon'xank patkanchem bhogsonnem zôddun gheunchê khatir tem Hanvem varounchem asa.
29. Ani tumkam sangtam: tumchea sangata Mhojea Bapachea Rajeant Hanv novo soro pie porian, hea fuddem dakechea follachem Hanv anink pieuncho na."
30. Stotram gailea uprant, te Zoitunanchea dongrar vochunk bhair sorle.
31. Tednam Jezun tankam sanglem: "Aichê rati tumi soglle Mhaka sôddun vetoleat. Tôr oxem boroilolem asa: 'Hanv gonvlliak martolom ani xellianchi duspôtt zatoli;
32. punn Devan Mhaka punorjivont kortôch Hanv tumchê adim Galileiant vetolom."
33. Hea utrak Pedrun mhollem: "Sogllech porian Tuka sôddun gele zalear, hanv kosoch Tuka sôddpak na."
34. Jezun taka zap dili: "Hanv tuka sot sangtam: aichê rati, kombean sad ghalchê adim, tum tin pavtti Mhaka vollkhonãi mhonn sangtoloi."
35. Pedrun taka mhollem: "Tujê borabôr mhaka morchem poddlem zalearui, hanv Tuka kodinch sôddun vochpak na." Heram-i xisamnim toxench mhollem.
36. Tednam Jezu tanchê borabôr Getsemani mhonnlolea molleant gelo ani Tannem xisank mhollem: "Ho-thõi vochun Hanvem magnnem korisôr tumi hanga bosat."
37. Ani Pedruk ani Zebedevachea dogam putank Tannem Apnna borabôr vhele; tednam To tollmollunk ani middmiddunk laglo.
38. Tednam Tannem tankam mhollem: "khontin bhoron Mhozo jiv mornnachê tonnir pavla. Tumi hanga ravat ani Mhojê sangatim zagrônn korat."
39. Ani matso fuddem vochun To omto poddlo ani oxem magnnem korunk laglo: "Bapa Mhojea, zata zalear, Mhojê velem hem patr pois vochum-di; toripunn Mhaka zai toxem nhoi, Tuka zai toxem zaum di."
40. Xisam sorxem porto ie zalear, te Taka nhidlole mell'le, ani Tannem Pedruk mhollem: "Mhonnttôch êk tas-bhôr Mhojê borabôr zage ravunk tumchean nozo zalem mum?
41. Tumi tallnnent poddona zaunk zagrut ravat ani magnnem korat. Otmo raji asa khoro, punn kudd osokt."
42. Tanchê sorxilo vochun, Tannem novean, dusrê pavtti, oxem magnnem kelem: "Bapa Mhojea, Hanvem hem patr pielea bogor tem pelean kaddunk zaina zalear, Tuji khuxi zaum."
43. Ani portun ie zalear, te Taka nhidlole mell'le, itle tanche dolle jemen zodd zal'le.
44. Tankam thõich sanddun novean To pois gelo ani tinch utram mhonnun tisrê pavtt Tannem magnnem kelem.
45. Uprant xisam sorxem porto ieun, Tannem mhollem: "Nhidat atam ani visôv gheiat. Polleiat, Mon'xacho Put patkianchea hatant poradhin zauncho vêll pavlo atam.
46. Utthat! Vochumia! Mhozo ghat ghetolo to ho polle laginch asa."
47. Oxem uloita thõich astana, Judas, Barantlo eklo, thõi pavlo ani tachê borabôr torvari ani tonnke gheun porom iadnikamnim ani porjechea zannteamnim dhaddlolo lokacho êk vhoddlo zomo.
48. Ghatkian tankam oxem mhonnun khunna dil'li: "Hanv umo ghetolom polle, toch to; taka dhôrat."
49. Dekhun rokddoch Jezu-xim ieun tannem mhollem: "Noman Tuka, Guruji!", ani Tacho umo ghetlo.
50. Jezun taka mhollem: "Ixtta, korunk ailai tem kam tum kôr." Tednam te fuddem sorle ani Jezuchea angar hat ghalun tãnnim Taka dhôrlo.
51. Ani ovchit Jezu sangatim asloleantlea eklean, rokddoch aplê torvarik hat ghalun, ti bhair kaddli ani porom iadnikachea chakracher marun tacho kanuch katrun uddoilo.
52. Tednam Jezun taka mhollem: "Tuji torvar tichê svater ghal, kiteak torvar kaddtat te torvarin mortole.
53. Vô Mhojea Bapa kodde Hanvem maglear, To bara-vôn ogllim devdutanchim loskoram atanch Mhojea adarak dhaddcho na-xem tuka dista?
54. Punn oxem zaunk zai mhonn Povitr Pustok sangta tem koxem ghoddon ietolem tôr?"
55. Tea vellar Jezun urponjik mhollem: "Tumi torvari ani tonnke gheun Mhaka dhôrunk ieunk Hanv konn pundd kitem? Dispot'to tumchê modem bosun Hanv Devmondirant xikovnn ditalom tednam tumi Mhaka dhôrlo na."
56. Punn provadianchim borovpam pallon ieunchê khatir hem sogllem ghòddlem. Tea vellar soglle xisT aka sanddun pollun gele.
57. Jezuk dhôrlolo tea mon'xamnim Taka porom iadnika Kaifasager vhelo; thõi xastri ani zannte ektthãi zal'le.
58. Pedru pois thaun Tachê pattlean cholun porom iadnikachea angnnant porian gelo ani bhitôr sorun hachi sompadnni koxi zait ti polleunk kamdaram borabôr boslo.
59. Mukhel iadnik ak'khê Mha-Dhormsobhê borabôr Jezuk mornnachem formonn diunchê khatir Tacher add firiad korunk konn-ui lottik aropi melltit kai mhonn sôdtale;
60. punn sobar fottkire aropi fuddem sorun-ui, tankam zai asli tosli firiad tankam mellona zali. Xekim dog zann fuddem sorle
61. ani tãnnim sanglem: "Hannem mhollam: Devachem Mondir môddunk ani tem tin disamnim bandunk mhaka podvi asa."
62. Tednam ubo ravun porom iadnikan Tachê kodde vicharlem: "Kãich zap dinãi? He tujer add hi firiad ditat tem kitem?"
63. Punn Jezun zap kaddli na. Ani porom iadnikan Taka mhollem: "Jivea Devachean hanv tuka hukum ghaltam: soput ghe ani amkam sang: Krist tum? Devacho Put tum"
64. Jezun taka portipall kelo: "Tunvench oxem sangleim! Tôr Hanv tumkam sangtam: Mon'xachea Putak devpodvechea uzvea hata boslolo ani sorginchea kupam velean ailolo tumi dekhtoleat."
65. Tednam aplim vostram pinzun porom iadnikan mhollem: "Hannem devninda keli! Sakxidaranchi anink kosli goroz amkam? Chotrai dhôrat, tumi atanch devninda aikolea.
66. Tôr tumkam kitem dista?" Tãnnim zobab dilo: "Taka moronn favo!"
67. Tednam kãi zannamnim Tachea tonddar thimpi uddoili ani Tacher thapttam marlim; heramnim Tacher mutti marun
68. mhollem: "Arê Krista, tum provadi mum? Tôr sang amkam: konnem marla tuka?"
69. Itlea mhonnosôr Pedru bhair angnnant bosun aslo; ani êkê chakornnin tachê sorxem vochun mhollem: "Tum-i Galileikar Jezu borabôr astaloi."
70. Punn soglleam hujir na mhonnun tannem sanglem: "Tum kitem mhonnttai tem hanv nokllom."
71. To darvonttea bhair vetana dusrê êkê chakornin taka pollelo ani thõi asloleank tinnem mhollem: "Ho Nazaretkara Jezu borabôr aslo!"
72. Ani tannem soput gheun novean na mhollem ani sanglem: "Hea mon'xak hanv vollkhoch na!"
73. Anink thoddea vogtan thõi asloleamnim lagim sorun Pedruk mhollem: "Dubava vinnem tum-i tanchê bhitorlo eklo, ani tuzo svorbhêd-ui tuka dakhoun dita."
74. Tednam to apnnacher xirap ghalun ani soput gheun mhonnunk laglo: "Hanv hea mon'xak vollkhoch na!" Teach vellar kombean sad ghalo,
75. ani Jezun sanglolea utracho Pedruk ugddas ailo: "Kombean sad ghalchê adim tum tin pavtti Mhaka vollkhonãi mhonn sangtoloi." Ani bhair vochun Pedru dukhamnim roddunk laglo.
