1. Ekdam xisamnim Jezu-xim ieun vicharlem: "Sorgarajeant soglleam-von vhôdd konn?"
2. Tednam Jezun, eka dhakttea bhurgeak apoun haddun, taka tanchê modem ubo kelo
3. ani mhollem: “Hanv tumkam sot sangtam: tumchem mon bodòl’lea bogor ani tumi novean dhakttulea bhurgeam vori zalea xivai, tumi Sorgarajeant bhitôr sorchinch nant.
4. Mhonnttôch konn-ui apnnankuch hea bhurgea porim lhan kortit zalear, tim Sorgarajeant soglleam-von vhodd.
5. Eka dhakttulea oslea bhurgeak konn Mhojea nanvan ghetit zalear, tim Mhakach ghetat.
6. Punn Mhojer bhavarth dovortolea hea lhanam modlea ekleak ho bhavarth sôddunk konn-ui oddun vhortit tôr, gaddum ôddta toslem danteachem ek pedd tanchea golleak bandun tankam khôl doriant buddoilear odik borem.
7. Dusreank bhavarth sôddunk oddun vhortat toslea mon'xam pasot sonvsarachem kotta! Herank bhavarth sôddunk oddun vhortat toslim mon'xam astolinch; punn jim konn dusreank bhavarth sôddunk oddun vhortat, tanchem kotta-kotta!
8. Tumcho hat vô pãi patok korunk tumkam ôddun vhorta zalear, to katrun uddoiat ani bhair marat; don hat vô don pãi asun sasnnachea ujeant tumkam uddoil'lê poros, lunddim vô thonttim zaun Jivitant bhitôr sorlear tumkam odik borem.
9. Ani tumcho dollo patok korunk tumkam ôddun vhorta zalear, to umttun kaddat ani bhair uddoiat; don dolle asun ujeachea iemkonddant tumkam uddoil'lê poros, êkuch dollo gheun Jivitant bhitôr sorlear tumkam odik borem.
10. Polleiat, hea dhakttuleantlea ekleachi legun tumi beporva korum noiê, karonn, Hanv tumkam sangtam, tanchi rakhônn kortat te dut sorgar astea Mhojea Bapachem mukhamoll thambonastana polleun asat.
12. Tumkam kitem dista? Konn-eklea mon'xa kodde xembôr xelliô asleô, ani tantuntli êk sanddli zalear, nnoian'nnoi dongrancher sôddun, hinddantli koddsorun gelea tika to sodunk vecho na kai?
13. Ani Hanv tumkam khorench sangtam: ti mell'lli zalear, sanddunk naslolea nnoian'nnoi xelliam poros, hichê vixim to odik khuxal zata.
14. Têch porim hea dhakttuleam bhitorlo eklo-i ibaddlolo sorgar astea tumchea Bapak naka.
15. Tuzo pelo tujer patok korit zalear, voch ani tumam-doganchêch bhitôr taka xiddkai. Tujem to aikotit zalear, tujea peleak tunvem zôddun ghetlo.
16. Tuka to aikona zatit zalear, dogam vô tegam sakxianchê govaikecher sogllo tontto ruzu zaunk zai dekhun, tujê borabôr anink ekleak vô dogank gheun voch.
17. Punn tankam-i aikona zatit zalear, sobhek kolloi; sobhek aikona zatit tôr, tim sobhê bhailim vô dônddvosuldar mhonn somoz.
18. Hanv tumkam khorench sangtam: jea kiteak sonvsarant tumi na mhonnxat , taka sorgar Dev na mhonnttolo; ani jea kiteak sonvsarant tumi hôi mhonnxat, taka sorgar Dev hôi mhonnttolo.
19. Anink ek Hanv tumkam sangtam: tumchê bhitorlim dogam zannam sonvsarant kosli-i vôst magunk eka monachim zatit zalear, sorgar asa to Mhozo Bap ti tumkam ditolo;
20. kiteak dogam vô tegam zannam Mhojea nanvan ektthãi zal'lim astit, thõi tanchê modem Hanv asam."
21. Tednam Tachê sorxem vochun Pedrun Taka mhollem: "Saiba, kitlê pavtti mhojea pelean mhojer patok kelear hanvem taka bhôgsuncho? Sat pavtti legun?"
22. Jezun taka oso zobab dilo: "Sat pavtti nhoi, punn sot'tôr pavtti sat!
23. Tea pasot, Sorginchem Raj koslem tem tumkam sangtam: Konn-eklo raza aplea chakrancho hixôb gheunk sôdtalo.
24. Hixôb gheunk suru kortôch, dha hozar talentanchem vorixtt rinn aslolea eka chakrak raza mukhar haddlo.
25. Farik korunk tachê kodde kãich naslem dekhun, tachê bailek, bhurgeank ani tachê lagim aslem naslem titlem-i vikunk ani rinn farik korunk tachea dhonian hukum ghalo.
26. Tednam tachea pãiam poddun chakran tachê kodde oxem maglem: 'Tokôs kaddun matso rav, sogllem tujem hanv farik kortam.'
27. Chakrache churchure dhôrun dhonian taka sôddlo ani tachem rinn-ui bhôgxilem.
28. Ho chakôr bhair gelea uprant, taka fokot xembôr holke dinar devo aslolo êk vangddi chakôr taka mell'lo ani taka dhôrun to tachi gomtti pillunk laglo. Tannem mhollem: 'Mhojem rinn farik kôr!'
29. Punn tacho vangddi tachea pãiam poddun tachê kodde oxem magunk laglo: 'Tokôs kaddun matso rav, sogllem tujem hanv farik kortam.'
30. Tori to aikona zalo, punn gelo ani aplem rinn farik korisôr tannem tea vangddia-chakrak bondkhonnint ghalo.
31. Hem ghòddlolem polleun, tache her vangddi chakor bhov dukhovle, ani vochun ghòddlolem titlem-i tãnnim aplea dhoniak kollit kelem.
32. Tednam dhonian taka apoun haddun mhollem: 'Khottea chakra, tunvem mhojê kodde magleim dekhun, hanvem tuka sogllem tujem rinn bhôgxilem.
33. Tôr mhaka tuji doia disli toxich, tuka tujea vangddia-chakrachi doia disunk naka asli?'
34. Ani ragabhorit zaun, tannem sogllem aplem rinn farik kori porian, dhonian taka kosabanchea hatant ghalo.
35. Tumi zonn-eklo tumchea peleak kallzant thaun bhôgxina zaxat tôr, Mhozo sorgincho Bapui tumkam-i bhôgxicho na."
