1. Son'var sorlea uprant, satolleacho poilo dis uzvaddchea sumarak, Magdalachi Maria ani dusri Maria somadhi polleunk geleô.
2. Ani ovchituch motti êk bhuimkamp zali. Sorvesporacho êk dut sorgavelo denvun ailo; tannem fatôr ghunvddaun kuxin kaddli ani apunn ticher boslo.
3. Tachem rup zhoglannea bhaxen ani tachem anglem hima porim dhovem-ful aslem.
4. Taka polleun rakhonndar bhirantin thorthorle ani mel'le koxe zale.
5. Punn devdutan uloun tea ostoriank mhollem: "Bhieum nakat! Khursar marlolea Jezuk tumi sôdtat mhonn hanv zannom.
6. To hangasôr na, kiteak, Tannench sanglolê pormannem, Devan Taka punorjivont kela. Taka dovorlolo ti svat ieun polleiat
7. ani vegim vochun Tachea xisank sangat: 'Devan Taka mel'leantlo punorjivont kela ani, polleiat, To tumchê fuddem Galileiak veta; thõi tumi Taka dekhtoleat.' Polleiat, hench tumkam sangunk ailam."
8. Teô ostoriô bhieun-bhieun ani vhôdd khuxalkaien somadhi sorxileô vegim koddsorleô ani dhanvim-dhanvim Tachea xisank kollit korunk geleô.
9. Ani ovchituch Jezu tankam mellunk ailo. Tannem mhollem: "Noman tumkam!" Ani tãnnim lagim sorun Tache pãi dhôrle ani Taka nomoskar kelo.
10. Tednam Jezun tankam mhollem: "Bhieum nakat; vochun Mhojea bhavank Galileiak vochat mhonn sangat. Thõi te Mhaka dekhtole."
11. Teô vatter astananch rakhonndarantlea kãi zannamnim Xarant ieun ghòddlolem titlem-i mukhel iadnikank kollit kelem.
12. Hãnnim zannteam borabôr sobha zomoun êk tharav ghetlo ani borech poixe soinikanchea hatant ghalun tankam
13. mhollem: "Tumi oxem sangchem: 'Ami nhidlole astana, tachea xisamnim ratiam ieun taka chorun vhelo.'
14. Ani hem razpalachea kanar poddot bi, ami taka somzaitoleanv ani tumcher kãich zodd iena-xem kortoleanv."
15. Mhonnttôch soinikamnim poixe ghetle ani apnnank xikoil'lê pormannem kelem. Ani hi khobor Judevam modem ximpoddli ani aicho dis porian ti cholta.
16. Ikra xis Galileiak gele, Jezun Apnnak mellunk sanglolea dongrar.
17. Taka pollena fuddem, te Tachea pãiam poddle; tori tantle thodde dubavle.
18. Jezun fuddem sorun mhollem: "Sorgar ani sonvsarar Devan Mhaka sogllo odhikar dila.
19. Mhonnttôch vochun sogllea raxttrank Mhoje xis korat; Bapachê ani Putachê ani Povitr Atmeachê Nanvim tankam snan diat;
20. ani Hanvem tumkam dileat teô soglleô adnia pallunk tankam xikoiat. Ani zanno zaiat, sodanch sodam, hôi, kallam-iuganchê sompadnnê porian, Hanv tumchea sangata asam!"
