1. Tednam loka ani Aplea xisam kodde uloun Jezun mhollem:
2. "Moizesachea asonacher dhormxastri ani Farizev bosleat.
3. Mhonnttôch te tumkam sangtat titlem-i tumi korat ani pallat, punn tanchea kortubam pormannem tumi cholum nakat, kiteak te herank sangtat tem apunnuch korinant.
4. Zodd ani sõsum nozo toslim ojim te bandtat ani heranchea bhuzancher ghaltat, punn tim ubarunk aplem bott legun laitit-xe na.
5. Mon'xank dakhounk soglleô apleô kornniô kortat, dekhun Somurtintlim sutram aslolea pettulancheô vadiô te lamboit asat, toxench aplea avoronnanchê degek lail'le gondde lamb-lamb korun bhonvtat.
6. Jevnnank poileô svatô, devsthanamnim poile-voile zage,
7. tinttear solam ghevop, ani apnnank mon'xamnim Guru mhonnun pacharop, hich tanchi as-ruch.
8. Punn tumi zalear, tumkam heramnim Guru mhonnun pacharchim mhonn axeum nakat; kiteak tumcho Guru ekloch ani tumi sogllim bhav-bhoinn.
9. Sonvsarant konnakuch tumcho Bap mhonnun unch kaddum nakat, kiteak Ekleakuch, sorgar asa Taka mat, tumcho Bap mhonnunk favo.
10. Ani tumi apnnank Guru mhonnun gheum nakat, kiteak ekloch tumcho Guru mhollear Krist.
11. Tumchê bhitorlo konn vhôdd to tumcho sevôk zauncho.
12. Apnnankuch unch kaddtat tankam Dev khala uddoitolo ani apunnuch khaltim zatat tankam Dev unch kaddtolo.
13. Ddhongiam dhormxastriamnô ani Farizevamno, kotta-kotta tumchem! Kiteak Sorginchem Raj tumi mon'xam mukhar dhamptat ani tumi-i bhitôr soronant, nhoi mhonn bhitôr sorunk sôdtat tankam-i bhitôr sorunk dinant.
15. Ddhongiam dhormxastriamnô ani Farizevamnô, kotta-kotta tumchem! Kiteak êk novxis korchê khatir doriacher ani dhortorecher tumi firtat ani, konn-ekleak sampddailea uprant, tumchê poros don pavtt odik iemkondd favo-aslolo tumi taka kortat.
16. Kudd'ddea fuddariamnô, kotta kotta tumchem! Tumi oxem mhonnttat: 'Devmondirachean konn-ui soput ghetit zalear, tem kãich nhoi; punn Devmondirachea bhangarachean soput ghetit zalear, tim rinnkaram zatat.'
17. Arê murkheamnô ani kudd'ddeamnô! Kitem odik vortem? Bhangar vô bhangar povitr zai-xem korta tem Devmondir?
18. Toxench tumi mhonnttat: 'Vedichean konn-ui soput ghetit zalear, tem kãich nhoi; punn vedicher asa tea danachean soput ghetit tim rinnkaram zatat.'
19. Arê kudd'ddeamnô! Kitem odik vortem? Dan vô dan povitr zai-xem korta ti vedi
20. Tôr vedichean soput ghetat tim tichean ani ticher asa titleaichean soput ghetat.
21. Ani Devmondirachean soput ghetat tim tachean ani tantum ravta tea Devachean soput ghetat.
22. Ani sorgachean soput ghetat tim Devachea xinvasonachean ani tacher boslolo asa tea Devachean soput ghetat.
23. Ddhongiam dhormxastriamnô ani Farizevamnô, kotta-kotta tumchem! Hortelanv, boddixêp ani jirem, osleancho dhavo vantto tumi Devak mhonn farik kortat, punn Somurtiche odik molache kaide, mhonngê neainit, doia ani visvaxiponn, tumi sôddun dileat. Te poile tumi chukoinant tem borem asa, punn hem ki tumi pallunkuch zai asle.
24. Êk zollar gallun kaddtat ani ak'khem untt gilltat tosle kudd'dde fuddari tumi.
25. Ddhongiam dhormxastriamnô ani Farizevamnô, kotta-kotta tumchem! Tôr patra ani tatta bhailean asa tem tumi nitoll kortat ani bhitorlean tumich nagovnnen ani pozoddponnan bhòrlole asat.
26. Arê kudd'ddea Farizeva! Bhailean asa tem-i nitoll zaunchê khatir, patra ani tatta bhitorlean asa tem poilem nitoll kôr.
27. Ddhongiam dhormxastriamnô ani Farizevamnô, kotta-kotta tumchem! Tôr tumi chuno kaddlolea somadhim sarke; teô bhailean mon'xank sobit distat, punn bhitorlean mel'leanchea haddamnim ani sogllea jin'sachê ollxiken bhòrleat.
28. Têch porim tumi-i bhailean lokak promannik distat khore, punn bhitorlean tumi ddhongeponnan ani khotteponnan bhòrlole asat.
29. Ddhongiam dhormxastriamnô ani Farizevamnô, kotta-kotta tumchem! Tumi provadiancheô somadhi bandtat ani dhormvont mon'xancheô iadgiri nettoitat
30. ani mhonnttat: 'Amchea purvozanchea disamnim ami asloleanv zalear, provadianchem rogot varounk ami tanchê borabôr vantto gheunche nasleanv.'
31. Mhonnttôch provadiank jivexim martoleanchi tumi sonsôt mhonn tumchech tumi govai.
32. Borem tôr, tumchea purvozanchem map tumi bhôrat.
33. Sorpamnô, furxeanchea pileamnô, iemkonddachea formonnantle koxe mhonn vattovtoleat tumi?
34. Tôr polleiat, Hanv tumchê thãi provadiank, zannarank ani xastriank dhaddtam. Punn tumi tantlea kãi zannank jivexim martoleat ani khursar khillaitoleat, ani kãi zannank tumchea devsthanamnim jerbond ditoleat ani eka nogrant thaun dusrea nogrant tanchê pattapatti lagtoleat.
35. Devak manovlolea Abelachea rogta thaun tem Gabharea ani vedi modekot tumi jivexim marlolo Barakiacho put Zekaria hachea rogta meren prithumer niropradhi rogot varoilam titlem-i tumcher buzchê khatir tumi oxem kortoleat.
36. Hanv tumkam khorench sangtam: hem sogllem hê pinddkechea mathear ietolem.
37. Jeruzalea, Jeruzalea! Tum provadiank jivexim martai ani tujê thãi dhaddloleank fatraitai! Zoxem kombi aplea paktteam tolla aplea pilank ektthãi korta, toxem kitlê pavtti mhonn tujea bhurgeank ektthaunk Hanvem sôdlem, punn tem tumkam naka zalem!
38. Chotrai dhôrat, tumchem ghor tumkam urtolem khorem, punn padd zal'lem.
39. Hanv tumkam khorench sangtam: 'Sorvesporachea nanvan ieta taka zôi!', oxem tumi mhonnosôr tumi Mhaka hea fuddem anink polleunchim nant."
