1. `Amchea purvozanchea Deva ani kaklutichea Dhonia, tujea utran tunvem ak'kho sonvsar rochlo,
2. Tunvem rochlolê rochnnecher dhoniponn cholounk tujê zannvaien tunvem mon'xak rochlai,
3. Bhoktiponnan ani nitin sonvsar cholounk promannikponnan khori nit korunk tunvem mon'xak rochlai,
4. Tujea xinvasonachê kuxik bostoli zannvai, mhaka favo kôr, Tujea bhurgeam modlo mhaka kuxik kaddinaka.
5. Kiteak, hanv tuzo êk chakôr, tujê chakornicho put, osokt ani thoddinch vorsam jietolo monis tujê nitichi ani kaideanchi mhaka bhov thoddi somzonni asa.
6. Khorench konnuim mon'xachea putam modem sopurnn aslolo zalear, tachea lagim Deva thaim asloli zannvai na tor, taka bilkul koslench mol na.
7. `Tujê porjecho raza zaunk, tujea putancho ani dhuvancho nitidar zaunk, tunvem mhaka venchun kaddla.
8. Tujea Povitr Dongrar tunvem mhaka aplem mondir bandunk lailam, Survatek thaun toiar kelolea povitr tombuchi êk proti koxi, aplo tombu ubarlolo tea xarant tunvem mhaka êk vedi bandunk laili.
9. Tujê sovem asa Zannvai, Tujim kamam ti vollkhota, Tunvem sonvsar rochlai tedna ti thoim asli; Tujea dolleank kitem man'ta ani Tujea adniam pormannem kitem, tem ti somzota.
10. Tujea povitr sorga thaun tika dhadd, mhaka adar diunk ani mhojê borabor ghas gheunk ani Tuka man'ta tem xikounk Tujea voibhovachea xinvasona thaun tika patthoi;
11. kiteak ti sogllem zanna ani sogllem somzota Mhojea kamamnim Ti mhaka xanneponnan choloitoli ani aplê mhoimen mhaka rakhun dovortoli.
12. Tedna, hanv kitem kortam tem tuka manovtolem, Hanv promannikponnan tujê porjechi nit kortolom ani mhojea bapaichea xinvasonacher bosunk hanv favo toslo zatolom.
13. `Devachi ievzonn khoinchea mon'xak tthavi zait? Vô Sorvesporachi khuxi konn parkun kaddit?
14. Vinaxi mon'xanchim chintnam dhodd nhoi, ani amchim kolponam thir nhoi;
15. kiteak kusta tosli kudd otmeak bharan chêpta, ani ho matiecho tombu zaitem chintpi monacher zoddai haddta.
16. Sonvsarant kitem asa tem zanno zaunk amkam khotthin lagta, amchêch bhonvtim asa tem zanno zaunk amkam koxtt bhògtat; tôr ontrallar asa tem konnachean sôdun kaddunk zait?
17. Tunvem Zannvai diunk nasli zalear ani voir thaun Tuzo Povitr Atmo patthounk nasloi zalear, Tuji khuxi konn vollkhunk pavtolo aslo?
18. Hê porim, sonvsarant jietoleancheô vattô nitt zaleat ani Tuka kitem man'ta tem monis xikleat, ani Zannvaien tankam samball'leat.'
