1. Punn odhormi mon'xank xevôtt meren tuzo kaklut naslolo rag piddapidd diit ravlo, Tem korchê adinch, te kitem kortole ti Taka khobor asli.
2. Zorui tujê porjek tannim uttavollin vochonk formailem, torui te aplem mon bodoltole, ani tanchê fattik lagtole mhunnon Taka khobor asli.
3. Khorench mhollear, aplea meloleanchea fonddancher te mornnache sonskar kortat ani dukh monoitat astananch, tanchea monant anink êk pixi ievzonn aili. Ani te pollputte zalolea vori, tannim dhanvddailolea ani aplo dês sôddunk magloleanchê fattik te lagle.
4. Tannim apnnem bhôgpache urlole te khastiche vollvolle bhôgchê khatir, tankam favo asleach nirmonnan hê doxer pavoileat ani adim kitem ghoddlolem tem te visorle.
5. Hê porim Tuji porza apli vichitr iatra tanktana, tankam eka vichitr mornnan girastole asle.
6. Tujea bhurgeank sorv vaittantlim nivarunk, Tujeô adnia samballtolê xrixttichem rup, anink ekdam Tunvem novem keleim.
7. Ek kup penneacher savlli ghaltalem; udkantli suki zomin dixtti poddli; Tambddea Doriantlean oddchonnim-meklli vatt zali, bhirankull lharam martalim thoim hirvem moidan dixtti poddlem;
8. Him Tujim kovtik vismitam polleun, Tujea hatachea asrea khal, ak'khem raxttr utrun gelem.
9. Chorôv khatolea ghoddeam porim tim distalim, menddram bhaxen tim khuxalkaien uddiô martalim, ani, Sorvespora, Tuji, Aplea Soddvonnarachi, vakhann'nni gaitalim.
10. Koxê bhaxen dhortorer zonavoranchê suvater zollaram, ani Nodint nusteachea zagear kottiamnim bebe bhair sortale tea pordesant apunn astana ghoddlolea ghoddnnukanchi tankam ozun iad asli.
11. Uprant tannim vegllêch torechim suknnim pollelim. Jevnnachê axen tannim kitem ruchichem maglem tedna,
12. tankam dhadhoxi korpak somdirantlean lhove bhair sorle.
13. Tea patkeancher denvtolê khastichi xiddkavnni adinch bhirankull ghoddnnukamnim diloli; Tanchea svotachea khotteponnak favo toslich khast tankam favo zali Kiteak tannim porkeam sovem khub dusvas dakhoilo.
14. Dusreamnim apnna-xim ailolea porkeank ievkar diupak khoraien nhoikarlo, Punn Ejiptkaramnim aplea pavnneank ani borea kornnarank gulam' kele.
15. Porkeank dusmankaiecho ieukar dilo dekhun, patkeank khoreponnim khast favo zatoli;
16. Punn, hea lokan, adim porkeank boro khuxalkaiecho ieukar dilolo apnna borabor tankam êksarke hok'k dilole, punn uprant tankam krurponnan koxtt dile.
17. Hea pasot, tancher kudd'ddeponn ailem, promannikanchea darar aslolea patkeanchê bhaxen, tanchê bhonvtonnim kallokh posorlo, ani zonn eklo ghuspun apleach darantlean vatt sôdunk laglo.
18. Soimbachea dhatumnim ap-aplea modem ek novo sumêll ghoddun haddlo. Jê porim êk kin'norechi sori aplo svotacho sur samballta, punn, dôr êk sur dusream borabor ekttoun; veglle nad toiar zatat, tech porim ghoddlem:
19. Dhortoreveleô monzati udkantleô zaleô, ani udkar penvpi mon'zati dhortorer choddleô,
20. Uzo, udkant legit perot urlo, ani to palounk udkachem boll pavlem na;
21. Ani torui astana tea ujeachean tantunt bhonvtolea vinaxi jivanchem mas lasunk ghoddlemna; nhoi mhunnon orxim borfa bhaxen sorvbhonvtim khôddpi, sorginchem jevonn khòddonk na.
22. Hôi, Dhonia, tunvem protek vatten tujê porjek mahan ani mhoimêbhorit keli; Tankam khoincheai vellar vô zagear adar diunk Tum kednanch chuklo naim.
