1. Dekhun tankam favo tosleach zonavoramnim favo ti khast laili - tanchea kiddinchea bhireamnim tankam vollvollaile.
2. Punn, Tujê porjek Tunvem oxê toren khast launk na Portench zalear Tunvem tankam korunnai dakhoili, ani tanchi khôl ruch bagounk Tunvem khaunk tankam lhove dhaddun dile - ek omolik ruchichem jevonn.
3. Hê toren, Ejiptkar, zori te jevnnak axele, hea ollxikavnnea zonavorank polleun tanchi ruch môddli; Punn, tujê porjen thoddoch kall bhuk sonslea uprant, ti boreantlem - borem jevonn jevli.
4. Adlea piddapidd diupeank marekar bhuk chukoinastana favo zatoli; ani aplea dusmanank kosle vollvolle dileat te tujê porjek polleunk melltolem.
5. Jedna bhirankull ani ran'votti mon'zatinchea bhireamnim tancher ghuriô ghatloleô ani sorpachea ghansamnim te mortalet, tedna tancho bhosm zata meren, tuzo rag xevôtt porian toglo na.
6. Hea koxttamnim, êk xiddkavnni koxi, thoddoch kall tankam sotaile, Tedna Tujê Somurtichea updesancho tankam ugddas korunk, Tunvem tankam êk soddvonnechi khunna dili,
7. Tê khunnecher konnem-i nodor marli zalear to boro zatalo, tannem nodor ghatlolê vostu udexim nhoi. punn, Tujê udexinch, sorv mon'xanchea Soddvonndara.
8. Hachê udexim Tum protek vaittantlo nivarpi mhunnon amchea dusmanank tunvem purave dilei;
9. Amche dusman tollanchea ani musanchea ghansamnim mele Tankam bore korpak kosloch upai sôdun kaddunk zalo na, Kiteak tankam tosleach zonavoram udexim khast laupak favo asli.
10. Punn, tea vikhallea sorpanchea dantamnim, tujea bhurgeank marunk zalemna; Kiteak, tuji kaklut tanchea adarak aili ani tankam borim kelim.
11. Tujea adniancho ugddas ieunchê khatir tankam ghansaile, punn, tuka te sarkech visorna zaunk ani tujem bholeponn tankam chukona zaunchê khatir tankam rokddech Tunvem nivarlei.
12. Khoinchêch vonospotin vô zhadda-paleachea vokhdan tim borim zaunk nant, punn fokt soglleank pekoupi Tujea ekach utran, Dhonia tankam pekoilim.
13. Hôi Tuka ekleakuch jivitacher ani mornnacher podvi asa, Tujean eka mon'xak samko patallachea darvonttea-xim pavoun portun jivit divum ieta.
14. Ek noxtto monis dusreacho jiv kaddit, Punn, tachean eka melolea mon'xak portun jivont korunk zaina Nhoi mhunnon patallant koidi zalolea atmeak vattaunk zaina.
15. Tujea hatantle suttonk konnakuch xokona.
16. Tum Dev mhunnon vollkunk sôdinaslolea odhormi mon'xank tujea bollvont bavllean khast laili, Ek vichitr pavs, korveancho pavs orixtt vadoll ani modd tanchê fattik laglim, Ani ujean sarkhench tanchem nisontton kelem.
17. Hantun ojapanchi gozal mhollear sogllem paloitolea udkant legit uzo odik khoraien perovtalo; Kiteak sonvsarantle soglle datu promannikam khatir zhuztat.
18. Eka vellar, odhormi mon'xank khast launk dhaddlolea mon'zatincho bhosm zanvcho nhoi mhunnon punn Devachem formonn aplê fattik laglam mhunnon tankam kollchê khatir kaim pavtti to uzo palovtalo;
19. dusrea vellar, udkant modem aslolê, noxttê dhortorechê pikavollicho bhosm korchê khatir, to uzo odik khoraien perovtalo.
20. Punn Tujê porje thaim Tum dusrech toren vagloi, Tunvem tankam devdutanchem jevonn dileim, Khavpak sorgar thaun toiar kelolo unddo dhaddun diloi, Protek mon'xachi ruch dhadoxi korpa sarke suvad tantunt asle.
21. Tum Aplea bhurgeam sovem kitlo dulob to, tem hea Tujea jevnna udexim kollon ailem, Dôr eka khavpeachea svada pormannem, tankam zai tê vostuchem rup ani ruch tea unddeant ghatli.
22. Tanchea dusmanachê pikavollicho bhôsm korchê khatir; moddant legit pett'ta ani zoddtolea pavsant perovta mhunnon, tankam dakhounk, him' ani borf tea ujeant koddo nastana urlem,
23. Dusrê vatten, tujê promannik porjek jevonn mellchê khatir toch uzo aplench boll visortalo.
24. Kiteak tuji rochnna aplea Rochnnarachê sevek astana, noxtteank khast launk aplem ogllem boll vapurta ani tujer visvas dovortoleanchea faideak mond ani doiall zata.
25. Ani, hê bhaxen sogllea vostunchem rup gheun, gorjevontancheô khoxeô bagaunk, ti rochnna tujea udharponnachea jevnnan soglleank pôsta;
26. Sorvespora, torekvar pikavolli udexim nhoi punn Tujer visvas thevtoleank samballtolea Tujea utra udexim Tim jevonn ditai mhonn Tum Tujea mogachea bhurgeank xikounn ditai.
27. Jem kitem, ujeachean nisontton korunk zaunk na tem, eka xevttotolea suriachea kirnnan koddon gelem;
28. Tuka argam diunk, suria udeunchê adim Fanteaparar ami tuka magnnim korunk zai mhunnon dakhonvchê khatir oxem ghoddlem;
29. Punn, onupkareancho bhorvonso pavsalleachea hima bhaxen koddta ani padd zal'lea udka porim vanvot veta.
