1. Eka bhagevont provadia udexim Tinnem tancho vaur iesvont kelo.
2. Konnench vosti korunk naslolea oronneantlean tannim provas kelo ani konnuch pavonk naslolea zagear tannim aple tombu tannle.
3. Te aplea dusmana add kalljidarponnan, ube ravle ani tancher zoit vhelem.
4. Apunn tanel'lea vellar tannim tuka ulo marlo, ani eka khoddpantlean tunvem tankam udok dilem, Eka okhondd khoddpantlean tanchê tanek vokhod dilem.
5. Hea udexim jem kitem tanchea dusmanank khast lavpak Devan vapurlolem tench tankam aplea oddchonnechea vellar upeôgak poddlem. 6-
7. Tannim tujê porjechea bhurgeank marun uddoupacho kaido kaddlolo dekhun tanchea rogtan ani matien vhanvtem nodichem udok khodôll kelem,
8. Tanchea dusmanank koxê toren khast laili tachi ruch mellchê khatir oronneant astana aplê porjek tannem dovorli ani axa soddpachea vellar tunvem tujê porjek bhorpur udok dilem.
9. Tanchi porikxa kortalo tedna tujea ragachem formonn Dev nasloleank koso vollvollaitolo tem tankam somzolem;
10. Ek bapui aplea bhurgeanchi porikxa korta toxi tunvem tujê porjechi porikxa keli, Punn dusreank tunvem eka kaklut naslolea raza bhaxen khast laili,
11. Te magir tujê porjek lagim asum vô pois asum, Tankam soglleank tunvem ekêch bhaxen vollvollaile.
12. Aplea kortubanchi tankam dupett dukh zali ani tanchea kortubank lagon, tim pinrgolim;
13. Apleak dusreanchea boreponna khatir khast favo zata mhonn somzotôch, hem Sorvesporachem kam' mhonn tankam somzolem,'
14. Khub kalla adim tannim konnacheô moskoreô ani ninda kelolim, tachem ies polleun te ojaple, Tanchê tanê sarki tan promannik mon'xank kednach lagonk na.
15. Tanchea noxtteponnan tankam murkh chintnamnim vaitt margar pavoile ani te jivanneank dusreank vitt haddpi, ani chintpachi koslich podvi naslolea zonavorank bhozpak lagle. Dekhun, toslinch nirbudh zonavoram dhaddun tunvem tankam khast laili
16. Ani patok adarta tea pormannem taka khast favo zata mhunnon tunvem tankam xikoilem.
17. Tujê maha-xoktichea hatanchê podven akar naslolê vostucho tunvem sonvsar rochlolo Ek vanxvelancho vô xivancho hindd dhaddun, tea lokachem nisontton korunk tuka tank komi nasli
18. Vô nakantlean uzo bhair kaddpi, vô ghanniaro dhunvôr sôddpi, vô dolleantlean bhirankull kitt'tteô ximpddaitat, tosleô noveô ani bhirankull mon'zati rochum ietaleô,
19. Tea mon'zatimnim krurponnim tankam marun uddovpakuch nhoi, Bogor tanchea bhirankull sobhavacher nodoruch poddllear te moron poddtole asle.
20. Tea bhair tujê ekech funkin te moron poddtole asle, Nit tanchea fattlean lagon, tankam ti tujea svasachea bollan, ghirghiraun uddoitoli asli. Punn, jem kitem sogllem tunvem manddlam, tem mezun ani mapun kelam.
21. Tuji mahan xokti sodanch Tujech sevê khatir asa, Ani Tujea podvedar hatachea bollak konnachean mhonn fuddo korunk zait?
22. Tagddechim tattam halounk legun pavona tê dhul'lichê konniê porim, ani sokallim zomnir poddta tea dovachea thembea vori sogllo sonvsar Tujê mukhar, Sorvespora.
23. Tori Tum soglleam thaim kaklutchar, kiteak Tujean soglleô vostu korunk zatat, ani aplea patkanchi dukh dhôrun mon'xamnim aplem jivit bodôlchê khatir, tanchea patkancher Tum dolle dhampun dovortai.
24. Ani asat titleam-i vostuncho Tum môg kortai ani Tunvem kelai tacho kanttallo dhorinaim, Kiteak koslê-i vostucho Tunvem dvês kel'lo zalear, Tum ti rochcho nasloi.
25. Ani ti rochunk Tuka khuxi nasli zalear, ti koxi vostoli asli tôr? Ani Tum tika apoun upzoinaim zalear, koxi ti samballon urtoli?
26. Sogllea jivacho Tum môg kortai, Sorvespora, dekhun soglleô vostu Tum samballtai, kiteak teô soglleô Tujeôch, ani Tuzo ovinaxi atmo soglleam vostumnim asa!
