1. Punn, tum amchea Deva, doiall, sotevont ani sonsnnikaiecho, Ho sonvsar tum doien choloitai.
2. Ami patok legit adarlear, ami Tujinch karonn ami Tuji podvi vollkhotanv. Ani ami Tujinch mhunnon zannanv dekhun ami patok korchim nanv.
3. Tuka vollkhop mhonngê sopurn xegunn ani Tujê podvechi vollokh gheunk mhollear, sasnnik jivitachem mull.
4. Mon'xachê ikmotichea khoincheai utpadonan, vô khoincheai dixtt kolakarachea nirfoll vavran, torekvar rongamnim nettoil'lea khoinchêi murtichean, amkam fosounk ghoddlem na.
5. Toslea vostuncher nodor poddtôch pixeanchi axa vaddtta ani te jivit naslolê murtechea eka melolea rupak anvddeunk lagtat.
6. Osleô murteô kortat, tankam anvddetat ani puztat tech te vaittache mogi ani oslea vostuncher visvas dhôrunk purte.
7. Ek kumbar môv ani voli mati gheun thokos gheun vavurta, Amchea upeôga pormannem tech matiechea protek aidonak akar dita. Borea khatir toxench vaitta khatir, upeog korpak têch matiechim to aidonam toiar korta: Khoinchem aidon koslea kama khatir vapurpachem tem toch tharaita.
8. Halinch apnnak matiecho kela ani rokddoch portun matien vetolo mhonn ani apnnak usnnem dilolo otmo portun maglea uprant to diunk zavo mhonn bhes-boro zanna zaunui, monis kumbar têch matiecho nirfollim êk polko dev toiar korta.
9. Tor-ui astana apnnak morunk poddtach mhonn ani aplem jivit mottvem mhunnon taka porva na, Portench bhangar, rupem ani kaxem gheun vavurtat, tanchea vangdda spordha laun to tancheô asol' vostu toiar korpak vavurta, ani teô soglleô fottkireô vostu korunk obhiman bhôgta.
10. Tachem kalliz mhollear gobor; tacho bhorvanso matiê poros komi molacho; tachem jivit chikla poros holkhem!
11. Kiteak, apnnak akar dilolea, ani aplê bhitor svas ghatlolea ani jivo atmo ditolea Rochnnarak to vollkhonk xoklona.
12. Tea bhair, taka hem amchem jivit mhollear êk moujecho khêll ani amcho kall aukh vannponn korit ravpacho êk bazar koso. Kitleai khottea sadhonamnim mon'xan aplo faido korunk zai. Oxem to somzota.
13. Matiecheô heô murteô ani futtun vochpi aidonam toiar korta, tea mon'xak apunn patok korta mhonn vollôkh asa, dusream poros odik borê toren taka hi khobor asa.
14. Punn tujê porjek ekdam piddapidd diupi dusman, sogllea lokam-von odik pisatt ani eka ballkam-on odik kaklut favo aslole,
15. Zorui tea murteanchea dolleanchean polleunk zaina; nakachea puddantlean uskar gheupak zaina Nhoi mhunnon kanamnim aikonk iena Tanchea hatanchea bottamnim sanspunk zaina ani tanchea paiamnim cholunk zaina, torui teô soglleô videxeancheô murteô tannim dev koxe mandle.
16. Teô murteô mon'xachea hatamnim toiar keloleô, Aploch svas usnnem ghetlolean tankam akar dilolo. Konnacheanuch aplea sarkheacho devak akarunk zaina.
17. Monis vinaxi ani tachea odhormi hatanchean fokt jiv nasloli vost toiar korpak zata. To apunn puzta tea vostum poros svota toch odik vorto; To tori jivo asunk zata, punn teô vostu kednanch jiveô asunk xoknant.
18. Samkeô ollxikavnneô, ani matui ginean naslolea mon'zatinchi legit te puza kortat,
19. Teô monzati mhunnon legit teô konnakui avoddpa sarkeô tankam bilkul sobitai na, ani Devachi thoknnai nhoi mhonn tacho axirvad legit tankam mellunk na.
