1. Devak vollkhunk na ani distat tea borea vostum udexim, Zo-asa Tachi vollokh gheunk pavunk nant, vô kel'lea vostuncher mon dovrun tea vostunchea Ghôddnnarak vollkhunk na, tim mon'xam soimbanuch pixim.
2. Uzo, varo, zhoddzhoddit varem, noketramnim bhòrlolem ontrall, nettan dhanvtem udok ani ontrallavele dive, him sogllim sonvsar-choloupi Dev mhonn tim somzolim.
3. Vostunchê surupaiek bhulon tannim tankanch Dev koxe man'le, punn hea vostuncho Dhoni tanchê poros odik ut'tôm' mhonn tannim zanna zaunchem, kiteak têch surupaiechea Ghôddnnaran tankam rochleat.
4. Ani tanchê podvechem ani bollachem tankam kovtuk dislem tôr, heôch vostu keleat To tanchê-von kitlo odik podvedar, hem tannim torkun kaddchem.
5. Kiteak rochnnanchea vhoddponna ani surupaiê udexim, onuman korun, teach Rochnnarak ami vollkhunk pavtanv.
6. Tori hea mon'xancho vhôdd guneanv korunk zaina, kiteak Devak sôdtana ani Taka otrektana tim ghoddiek vatt chuktat;
7. ani Tannem kel'lea vostum modem ravun, hea vostunchi vollokh gheunk tim bhar gheun vavurtat, punn, itli sobitai polleun, bhailea rupacheruch tanchem mon urta.
8. Tori astam, tankam guneanv na mhonn mhonnunk zaina:
9. kiteak sonvsaracheô vostu sôdun kaddunk tankam itli zannvai asa tôr, hea vostunchea Ghôddnnarak rokddoch kiteak sôdun kaddunk pavlim nant?
10. Punn, ho dolldiro lôk, melolea vostuncher aplo visvas dovorta, mon'xachea hatanchê kolen kelolea bhangarachea ani rupeachea vostunk monzatinchea murteank, vô konneim tori bhov adim xilpailolea beupeôgi fatrak, te "dev" mhonn mantat.
11. Eka lakudd katorpeak polle, To apnnak gorjek favo toslem ek zhadd kapta Sorvbhonvtonnchi kat zolloita ani uprant ojapvont kolechê huxarkaien to dispot'tem jivitak upkarpachi êk vost toiar korta.
12. Aplem kam' somplea uprant urlole kuddke zolloun aplem jevonn randta ani pott bhôr jevta.
13. Tea zollvantlo kiteakuch upeôg naslolo, gunzacho kuddko to kuxik kaddtta: Aplea rikamea vellar dhean-mon laun, aplê kolechea onnbhovan, taka eka mon'xacho akar dita
14. Vô êk mol nasloli mon'zat korta, xeddin bhôrta ani tambddo rong marta, ani tachim sogllim khotam lipoita
15. Uprant tê vostuk ek favo toslem biradd korta, ekê vonttint bhitôr ghalta, ani lokhonddachea khilleamnim ghôtt korta.
16. To sokla poddona zaunk to zotnai gheta Kiteak ti fokt êk murti ani tika adar zai asta, tichean svota apleak samballunk zaina mhunnon taka khobor asa.
17. Punn, aplê aspoti khatir, logna khatir, bhurgeam khatir hê jivit naslolê vostu lagim prarthon korunk taka loz disona,
18. Osokta kodden to bholaiki magta, Melolea kodden to jivit magta, Kosloch onnbhov naslolea kodden to adar magta, Aplo paim legit uklunk zaina tachê lagim, to provasa khatir boll magta,
19. Aplea kamant faido, vavrant ies, ani poixe komaunk apnnak adar di mhunnon, to podvi ani ikmot naslolea kodden ikmot magta.
