1. Toxench, eka tarvan bosun bhirankull lharam upun dusrê vatten vochpi monis, apnnak vhortolea tarva poros osokt lakddachea kuddkeacho adar magtolea bhaxen.
2. Konneim tori tem tarum bandun apnnak faido mellounk ievjilam, ani tarum bandpeachê zannvaien tem toiar kelam;
3. punn, Bapa, Tuji sasai tem choloita, doriant legun tunvem êk vatt ani lharancher êk surokxit rosto uktim keleaim
4. Kitem-i ghoddon tum vattaitai mhonn dakhoitai, onnbhov naslolo legit doriant vochonk xokta.
5. Tujê zannvaien toiar keloleô vostu upeôgak poddcheô mhunnon Tuji khoxi. Dekhun lhan lakddachea kuddkeacher legun patieun lôk eka lankdda velean lharam upta ani huskea mekllo poltoddi vochonk xokta.
6. Hê toren jedna tunvem orombak khorkhôs raksancho bhosm kelolo, sonvsarachea bhorvanxean eka tarvar asro ghetlo ani Tujea hatan tachem verem dovorlem ani sonvsara khatir novê pillgechem bim rakhun dovorlem.
7. Promannikank upeôgak poddta tem lankudd axirvad poddlolem
8. Punn, mon'xan toiar keloli murti êk xirap, hoi, ti ani ticho korpi-i xirap poddlolim: to tannim tika kelea dekhun ani ti êk meloli vost zaun-ui, tika "dev" mhonn pacharli dekhun
9. Kiteak odhormi mon'xacho ani tannem toiar kelolê odhormi vostucho Dev ekêch toren dusvas korta
10. Tê vostuk ani ti toiar korpi mon'xak-ui To ekech toren khast laita.
11. Teô murteô, Devachea rochnnam modem, êk kanttallo zaleô dekhun, mon'xanchea atmeank êk addkhollicho fatôr ani pixeanchea paiank êk fas koxeô zaleô dekhun, Devachi nit tea videxi lokachea murteancher poddtoli.
12. Murteô toiar korpachi ievzonn xindullkecho orombh, Ani teô sôdun mon'xachem jivit boxttovlem.
13. Survatek teô nasleô, ani fuddarak-ui teô ascheô nant;
14. Mon'xachea polkea gorvan teô sonvsarant haddleat, ani rokddoch tancho xevôtt tharailolo asa.
15. Ek bapui, kalla adim aplea somplolea putachê dukhin êk murti korun gheta, ani kalchea moddeak devacho man dita, Aplea hata khal asloleank tachi bhokti ani gupit iodn korunk formaita;
16. Kall bolanddta toso, teô riti ani chali thir zait vetat ani nem'-kaido koso tankam pallo ditat.
17. Raj cholovpeamnim tea murteank puzpacho kaido sthaplo: Raza pois aslolea karannak lagon, jea lokan svota tankam man diunk xoko naslo, tanchea sarkeacho êk putllo toiar korun, sogllê pott fikirin, hajir nasloleak, hajir aslolea porim te man ditale.
18. Kolakaranchê humedik lagon hi bhokti razak vollkhonasloleam modem legit posraili;
19. Aplea razak khoxi korpak, svota razachea poros ti murti sundor dischê khatir, tea kolakaran apli soglli ikmot vapurli.
20. Hê kolechê murtechi sundorai polleun lôk itlo bhul'lo ki, kaim dis adim zaka tim monis koso man ditalim takach dev koso manunk laglim.
21. Ani hem sogllem jivea mon'xak êk fas zalo: Kiteak zo lôk vaitt noxiban vô razachê piddnukê khala gulamgirent koxttovtalo, to fatrachea ani lakddachea murteank dusreanchean gheunk zai na toslem Nanv diupak laglo.
22. Devachê vollkhi vixim chukhi keleat teô tankam puro nhoi zalolea bhaxen; monis nennarponnachea vorixtt zhuzant jietana, hea khottea noxttank te sovostkai mhunnonk lagle.
23. Bhurgeancho jiv kaddpachea vidhimnim, tanchea gupit puzamnim, tanchea vichitr ritinchea krur dhumxannamnim, te jieunk lagle,
24. Ghatkeponnan eka-mekacho jiv kaddun, porduvarponn adharun tannim aplim lognam vô jivit nirmoll samballunk na.
25. Sogllea vattamnim rogtachem kondd ani khun, chori ani nagovnn, broxttachar, visvas-ghat, maramari ani fottkiri govai,
26. borea mon'xam modem ghuspa-gondhôll, onupkarponn, otmeachem boxttavop, soimba add pozoddponn, lognant guspa-gondôll, porduvarponn ani dhumxann.
27. Nanvam naslolea murteank puzop mhonngê protek vaittachi survat, karonn ani xevôtt.
28. Kiteak ho murteank puzpi lôk hispa bhair mouza korun, soiranna bhair poddtat, vô khottim bhakitam kortat, onitin jietat, vô sompeponnim khotto soput ghetat;
29. Kiteak jiv naslolea putlleancher te aplo visvas dovortat mhunnon fottkire soput ghetat ani apnnak koslem vaitt zait mhonn te ravonant.
30. Tea donuim khunna khatir tankam favo tosli khast melltoli: Poilê suvater, murteanchi puza korun, Devachi fottkiri vollôkh ballgitat ani povitrtaiechi te matui porva korinastana lokak fottkireô bhasavnneô kortat.
31. Khotte monis patok adartat tedna tannim soput ghetlolea vostunchea bollan nhoi, punn patkeank rakhun dovorlea ti favo ti khast sodanch noxtteanchea opradhiam fattik lagta.
