1. Razamnô, aikat ani somzun gheiat; poixilea ganvchea nitidaramnô, xikat;
2. puskôll lokacher odhikar choloitoleamnô, ani apnnam khal khub lôk asa mhonn gorvan bhòrloleamnô, aikat!
3. Kiteak podvi tumim Sorvespora-sun ghetat ani tumchem raiponn Bhov Vortea Deva thaun ieta, Toch tumcheô kornniô kosak laitolo ani tumchim monam iskuttaun polletolo.
4. Tachea rajeache karbhari koxe, tumi promannikponnan odhikar cholounk na zalear, ani Tache kaide pallunk na tôr, vô Devak zai tê bhaxen tumi vagunk nant zalear,
5. ovchit ani kamperean To tumcher denvun ietolo. Unch zageancher asloleank ani podvedarank koddok zhôddti ravta;
6. lhan'vikank doiallaien bhogsonnem melltolem, punn bollvontank bollan khast poddtoli.
7. Kiteak sogtta-sorvancho Dhoni konnachêch mukhar halcho na, ani khoincheach vhoddponnak To man bagouncho na, kiteak lhanank toxem vhoddank Tannench keleant ani soglleank êkêch toren To samballta;
8. punn podvedarank koddok zhôddti ravta.
9. Hôi, zulumdaramnô, tumi zannvai kitem tem vollkhunk ani ticher add vochona zaunk hanv atam uloitam tim utram tumkam;
10. kiteak povitr vostu povitrponnim samballtat tankam Dev povitr mhonn lêkhtolo, ani povitr vostunchem xikxonn ghetlam tankam tantunch asro melltolo.
11. Mhonnttôch mhojea utrank axeun ravat, tim utram otrekun otrekat, ani tim tumkam xikovnn ditolim.
12. Zannvai porzollit, ticho porzôll unno zaina. Ticho môg kortat tim tika rokddich sôdun kaddtat, ani sôdtoleank ti mellta.
13. Apnnak axetoleank apnnachi vollokh diunk ti apunnuch fuddem sorta.
14. Bhov sokallim thaun tika sôdtoleank koslich addkhôll sampoddchi na ti tujea dara-xim bosloli tuka melltoli.
15. Ticher chit dovorunk sopurnn zannvai, Tichê pasot zagronn korun ravta to rokddoch huskea-mekllo zatolo.
16. Apnnak manovtat tosleank sôdunk, ti apunnuch soglleak bhonvta ani tanchê vatteruch, moipasan tankam dixtti poddta ani tanchea sogllea chintnamnim ti tankam bhett'ta.
17. Xikpacho khôl anvddo mhollear Zannvaiechi survat, Xikpacho husko dhorop mhonngê ticho môg korop,
18. Ticho môg korop mhollear tiche kaide pallop, Tiche kaide anink man divop mhollear kusonastana urpachi khatri,
19. Ani kusonastana urpachi khatri amkam Devachea fuddeant haddta;
20. Oxem Zannvaiecho raj cholounk toiar korta.
21. Dekhun raxttranchea rajkarbhareamnô, zôr tumkam xinvasonam ani sodreô dhadoxi kortat, tôr Zannvaiek man diat ani tumchem raj sasnnak togtolem.
22. Zannvai kitem ani ticho orombh koso zalo, tem hanv tumkam iskuttavun sangtam; Hanv kosloch gutt liponvcho na, Rochnnechea orombak thaun hanv tika sôdtolom, ani tichi vollokh soglleank nigut ukti kortolom.
23. Sota sorxilo hanv kodinch koddsorchona. Rôg ditolea Kunn'nnatteam borabor hanv vecho na, Kiteak kunn'nnattaiek ani Zannvaiek kosloch sombond na.
24. Jitle Zannar vhaddon vetat, titli sonvsarachea taronnachi khatri mellta. ani êk zannkar raza aplê porjechi surokxai.
25. Dekhun mhojim utram xikat; Ani tumkam faideak poddtolem.
