1. Sogllea mon'xam bhaxen hanv-ui êk vinaxi monis, Matiecho kelolea poilea mon'xachê kulliecho. Mhojea avoichea kusvean mhaka masacho akar dila,
2. Thoinsor dha mhoine hanvem rogtan soimb ghetlem Eka dadleachea virian ani nhident melltolea logna-ekvottachê dhadoskaien mhozo gorbh dhorlo.
3. Hanv zolmololom tedna hanvem dusream porim teach vareacho uskar ghetlolo, Soglle apttotat tech dhortorer hanvuim apttololom, Ani sogttam heram bhaxen, poilo avaz hanvem kelolo to roddnneacho.
4. Mhaka falliamnim gunttlaun mottê zotnaien samball'lolo.
5. Khoincheai razachem jivit dusrê bhaxen suru zaunk na;
6. Kiteak sogllea mon'xank jivitant bhitôr sorpak ekuch vatt asa, ani bhair sorpakui ekuch vatt asa.
7. Mhonnttôch Hanvem maglem ani Devan mhaka ginean dilem; hanvem Devak ulo marlo ani Zannvaiecho atmo mhojer denvlo.
8. Betkattiam ani xinvasonam poros hanvem tichi chôdd opurbai keli; tichê lagim sôr korun, mhaka grestkai kaich nhoi zali.
9. Koslem-i omolik mannik zaum, tichê kodde hanv sôr korina, kiteak tichê mukhar sogllem bhangar êk chimtti-bhôr renvê itlench, ani tichea fuddeant rupem mhollear mati.
10. Bholaikê ani sobitaiê poros hanvem ticho chôdd môg kelo, uzvadda poros ti mhaka odik zai zali, kiteak ticho uzvadd kodinch palovna.
11. Tichê borabor soglleô boreô vostu mhaka mell'lleô, ani tichea hatantlean oprimit girestkai.
12. Teô vostu Zannvaien haddlea, dekhun sogllea vostumnim hanv dhadoxi zalom. Punn, ti tancho orombh mhunnon hanvem tedna chintlem na.
13. Jem hanv mon laun xiklam, tem udharponnan hanv vantt'tolom, ani ticheô dovloti hanv lipoun dovrina.
14. Kiteak mon'xank ti kednanch sompona toslo girestkaiecho thevo, konn tika apnnaitat tankam Devachi ixttagot favo zata, tichea koddlean tum kitem xiktai tem Devak manovta.
15. Gineana pormanem ulounk Dev mhaka nirmum ani Tachea denneam purtim mhojim chintnam zaum, Kiteak Toch Zannvaiek vatt dakhoita ani Toch vidvanank choloun vhorta;
16. Khoreponnim ami Tachea hatant asanv, ami ani amchim utram, ani toxich soglli amchi somjikai ani tantrik hikmôt.
17. Tannench mhaka rochnnechea sorv bollanchi, anink sonvsarachê banddavollichi vollokh gheunk, tannem mhaka khatrechi zannvai dili kallancho oprub, xevôtt ani modlem iug,
18. Suriachê halchalicher koxê porim, ponchong toiar keleat ani bodolte ruthu koxe astat,
19. Noketr-punjê ani vorsavollinchim kall chokram,
20. Mon'zatichem soimb ran'votti zonavaranchi chal, otmeachim bollam, mon'xachea gineanan thav ghevpachim bollam, jin'sanvar torechim zhaddam ani tanchea mullancho, vokhda khatir aslolo upeôg tannem mhaka xikoila.
21. Atam hanv sogllem somzotam, dista tem ani liplolem, Kiteak soglleank akar diupi Zannvaien tem mhaka xikoilam.
22. Zannvaiê bhitôr asa to atmo budhicho, povitr, oprotim', jin'nosvar, chotur, xitab, suddsuddit, nixkollonk, uzvaddik, okhondd, bholo, xidduk, boll korum nozo aslolo,
23. borem dekhto, mon'xam thaim mogall, thir, khatrecho, xant, Sorvbollixtt ani sorvdekhnnar, sogllea xanneam, nirmoll ani bhov chotur otmeamnim rigpi.
24. Kiteak zannvai soglleam-von odik vegim dhanvta; ti itli nirmôll-nirbhêl ki, sogllea vostum bhitôr rigta ani tantum bhitorlê-bhitôr ximpoddta.
25. Ti Devachea bollacho svas, Sorvpodvedarachê mhoimentlich ti nipzota; Dekhun mellem kaich tichê bhitôr ghusunk xokona.
26. Ti sasnnachea uzvaddacho poddbimb, Devachê xitab podvecho khot-naslolo arso, Tachea bholeponnacho rupkar.
27. Zori ti eklich, tori ti sogllem korunk xokta; apunnuch bodolnastana, ti sogllem novem korta; Dôr-êkêk pinddkent ti punniavont otmeamnim rigta, tankam Devache ixtt ani provadi korta;
28. kiteak zo konn Zannvaiechea sangata jieta, tachoch Dev môg korta.
29. Khorem mhollear suria-von ti porzollit, sogllea noketram-zomeam poros ti loklokit; uzvaddak sôr kelear ti odik vorti,
30. kiteak uzvadda pattlean rat ieta, punn vaittachean kednanch Zannvaiecher zoit vhorunk zaina.
