1. Pritvechea rajkharbhareamnô, niticho môg korat, Sorvespora vixim tumchim chintnam promannikponnan suchoilolim zaum-di, sadhea kallzan Taka sôdat;
2. kiteak Tachi porikxa korinant tankam To mellta, ani Tacho visvas sôddinant tankam To Apli vollokh dita. Khottim chintnam mon'xak
3. Deva sorxilo kuxin kaddtat; ani Sorvpodvek kosak laitat tedna, Ti pixeank pois korta.
4. Khorench Zannvai kednanch khottea otmeant rigchi na, ani patkak lobhdololê kuddint ti tthikann korchi na;
5. kiteak amkam xikxonn dita to povitr atmo dhongiam sorxilo koddsorta, ani vaittoveam chintnam thaun pois ravta, khotteponn dixtti poddtôch to pattim sorta.
6. Zannvaiecho atmo mon'xank bholeponnan vagoita, tori ninda kortoleak ti bhogsunchi na; kiteak tachea monant ani kallzant asa tem Dev polleta, khoreponnim To tachea kallzacho tthav gheta, ani to uloita tem aikota.
7. Kiteak Sorvesporachea atmean ak'khi prithum' bhòrlea, ani Zo sogllem samballta To dôr-ek ucharlolem utor zanna.
8. Noxtteponn uloitolo suttcho na, ani favo ti khast laitoli Nit taka sôddchi na.
9. Kiteak Devak mandinant tea mon'xancheô manddnniô bariksannen topasun polletole, ani tanchem khotteponn laun diunchê khatir tachea utrancho êk vako Deva meren pavtolo.
10. Sogllem aikotolo êk premaxecho kan asa ekê tokraricho lhan avaz porian taka lipounk zaina.
11. Dekhun, gorjê bhair tokrari kortana chotrai dhôr, khotti loddai ditana tujê jibecher tabo dovor; Kiteak, guptim uloilolea utrancho legit porinnam zata, ani fottkirem tondd tujea atmeacho jiv kaddta.
12. Tujê chalichê chukin moronn haddinakai ani tujea hatanchea kortubamnim sotianas haddinakai.
13. Kiteak Moronn Devan korunk na, jiveancho nas korunk Taka avoddna.
14. Sogllem Tannem rochlam; tem vortunchem mhonn rochlam. Sonvsarantlim rochnnam bholaiken bhòrlolim, tanchê sovem mornnadik vik mellchem na, ani prithumer Norkachi podvi cholona:
15. kiteak promannikponn kodinch morona.
16. Punn, Devak mandinaslole monis, aplea utramnim ani kornneamnim apnnacher Moronn haddtat; Ek ixtt zalolea bhaxen te taka axetat, Tannim mornna lagim êk koblat kelea te tacheach pokxeantle. Ovesvor
