1. Chuktoleank lhov-lhov Tum nittaier haddtai!
2. vaitt pois korun, tannim Tujer visvas tthevchê khatir, Sorvespora; tanchea patkancho tankam ugddas korun, Tum tankam xiddkaitai.
3. Adlea kallar tujea povitr desant jietoleancho, tum dusvas kortaloi
4. Kiteak, te noxtteô vostu adartale, Te jadu kortale ani opovitr bhokti kortale.
5. Tannim kaklut nastana bhurgeank jivexim marlim, ani mon'xachem mas khatale ani rogot pietale, Te guptim iodn korpak xikoitale,
6. Aplea svotachea osokt bhurgeancho jiv kaddpi avoi-bapaicho, tunvem amchea vhoddilanchea hatamnim bhosm korunk ievjilem,
7. Jea udexim tum sogllea desam modem odik moladik mhonn mandtolea hea desak, favo toslea Devachea bhurgeanchi sonsôt favo zatoli.
8. Torui astana te monis dekhun tunvem tankam doien vagoilim, Tujê gorjê adim tunvem tollanchem bhirem dhaddlem, ani sovkas-sovkas tancho bhosm kelo.
9. Hea Dev nasloleank tujea promannikanchea hatan eka khôr zhuzant dhaddun vô marekar ran'votti mon'zatink dhaddun vô eka khorkhôs utran tanchem nisontton korunk zai naslem, oxem nhoi,
10. Punn, tannim aplea kortubancho poschatap korunk tankam vêll mellchê khatir, tunvem tujem formonn sovkas-sovkas vevharant ghalem, Punn, tanchi zat vaittovi dekhun, te zolmantuch noxtte ani tanchi chintpachi pod'dot khotti asli,
11. Te kednanch bodolche nant mhunnon tuka khobor asli; Survatek thaun tanchi soglli sonsotuch xirap poddloli. Hê sonsnnikaiechi somzonni Konnanchêch bhiranten tunvem tanchea patkanchi tankam khast launk na.
12. `Tunvem hem kitem kelam?' Oxem tuka vicharpi vô tujea formonnacher add ieupi konn asa? Tunvench rochlolea raxtranchem nisontton kelear tuka konn addaitolo? Noxtteanchê vatten ravun Tuka konn fuddo kori sarko asa?
13. Sogllea vostuncho samball korpi Tujê bhair anink dusro dêv na, Tunvem onit korunk naim mhonn dusrea khoincheach Devak Tunvem hixôb diunchi goroz na.
14. Tunvem mon'xak khast lailea mhunnon tuka avhan diupi raza vô zulumi raza sonvsarant na.
15. Kiteak, svota tunch promannik ani promannikponnan ak'khoch sonvsar choloita, ani khast favo nasloleank khast launk hem Tujea bollan Tujê lagim kednanch ghoddchem na.
16. Tujê nitichea mullak asa ghottai, Tum sorvam-sogttacher raiponn choloitai tem Tuka sorvam thaim dulôb-bholo korta.
17. Tujem Sorvpodvedarponn manun Tum Tujem boll dakhoitai, Tuka vollkhun ghenant tanchi urmottai Tum tanchea tonddar martai.
18. Punn Tuka itlem boll asun Tum dulobaien nit kortai, bhorpur modhuraien Tum amkam choloitai, Tuka khuxi aslear puro zai tem korunk Tuka podvi asa.
19. Oxem korun, promannik monis pelea thaim koso mon'xallo zauncho, hem Tunvem Tujê porjek xikoileim ani patok kelear patkachi khont Tum ditai mhonn Tujea bhurgeank Tunvem bhorvanso diloi.
20. Tujea bhurgeanchea dusmanank khast laitana pasun tunvem khub sonsnnikaien ani chotraien laili Tankam moronn favo aslem tedna legun, tannim aplim noxtteponnam soddunk Tunvem tankam khub sondhi ani vêll dilo,
21. Toxem zalear, kitlê chotraien, tum tujea bhurgeanchi nit korchonaim? Zanchea purvozank, soputamnim ani koraramnim, tunvem itleô boreô bhasavnneô keleô?
22. Hê porim, jedna tum amchea dusmanachi movallaien nit kortai, ami-i nit kortana tujê movallaiechi iad korchi, ani amchi nit zatana ami kaklut magchi mhunnon tum amkam xikoitai.
23. Ani hê porim noxtteponnan ani nixtturponnan jietoleank tunvem te nomoskar kortolea ollxikavnnea vostum udexim vollvollaile;
24. Kiteak vankddea rostean te khub pois pavlole Tannim bhirankull ani ollxikavnnea mon'zatink dev koxe mandlole, ani supurlea ginean naslolea bhurgeam bhaxen tankam sompeponnim fosoilole.
25. Dekhun ginean naslolea bhurgeam bhaxen tunvem tankam khast laili, Ani tujê nitin tannim apleakuch pixeant kaddle.
26. Torui astana je konn moskoreanchea xikovnneanchi beporva kortat tankam Devak manovpa sarki khast favo zatoli.
27. Jedna te dev mhunnon mandtale teach zonavoram udexim, tankam khast favo zali tedna te ekdom' ghuspagondollak sampoddle; ani apunn mandun ghenasle, toch khoro Dev mhunnon tannim vollkholo. Ani, teach khatir xevottachi vhoddantli vhodd khast tancher poddli.
