1. `Amchem jivit mottvem ani dukhimnim bhorlolem, ani mon'xacho xevôtt pavta tedna kosloch upai nasta, Patallantlo konnuch portun ieunk na,' Oxem mhonnttat tedna te chukicho mud'do manddtat.
2. Chukon mhollolea bhaxen ami sonvsarant aileanv ani tea uprant, ami kednanch sonvsarant ieunk naslolea bhaxen zatolem. Amchea nakachea puddimnim svas dhunvrachê fanki sarkho, Amchem ginean fokt amchea kallza dhobdhobean xevttiloli êk kitt'tt;
3. Ti kitt'tt morta tedna amchê kuddicho gobor zata, ani amcho otmo uktea vareant misôll zata.
4. Kaim kalla uprant lôk amchim nanvam visortolo, ani amchea kortubancho konnakuch ugddas urcho na; Amchem jivit eka kupachê rengê bhaxen ubun vetolem ani suriachim kirnnam aplê tapin dovak virgollaitat tê bhaxen nanch zatolem.
5. Ekê danvtolê savllê bhaxen amche hea sonvsarantle dis, Amchea mornna uprant konnuch portun iena. Tacher mhôr marlea ani konnachean pattim ieunk zaina.
6. `Chol ia, hea sonvsarantleô soglleô boreo vostu ami bhôgum-ia, ani amchê tornnattponnachê humedin rochlolea vostuncho vapor korum-ia:
7. Ami chodd molache sore pieum-ia ani boreantle bore pormoll ghalum-ia, Ani rutuchem ek-ui ful sôddchem nhoi
8. Gulab bavchê adim ami te kaddun amchea kensancher mallum-ia,
9. Ami soglle sunddeponnan bhag gheum-ia; ani amchea dhumxannacheô khunna soglleak dovrum-ia, Kiteak hench amchem daiz ani hem amchem doiv!
10. Promannik goribank ami chepon dovrum-ia; Vidvank legit sôddche nhoi ani piklolea kensanchea zanntteank man diuncho nhoi.
11. Amchem boll zaum di amchê niticho nem', Kiteak osokt zaun Konnakuch faideachem zaunk na.
12. `Borea mon'xak doddeak ravum-ia, kiteak to amkam bejar korta amchê chalicher sodam ragar zata, ami Somurt môddtanv mhonn amcheô chuki dakhoita, ani amchea vhoddilanchi xikovnn ami samballinanv mhonn amcho guneanv korta.
13. To apunn Devak vollkhota mhonn boddai dakhoita, ani apunn Sorvesporacho put mhonntta.
14. Amchim chintnam to kosak laita, taka polleunk porian amchean sonsunk zaina;
15. Tachea jivitachi chal heram mon'xam sarki nhoi, dusrim mon'xam choltat tê vatten apunn cholona.
16. Khottea poixeam sarkim to amkam korun uddoita; chiklan apunn mello zait mhonnun, amchê lagim taka kaich naka; Borim mon'xam xevottak bhagi zatolim mhonn to sangta ani Devak aplo Bapui mhonnun boddai dakhoita.
17. To sangta tem khorem zalear polleum-ia, takach koslo xevôtt mellta to chotraien polleunchem.
18. Zôr tôr boro monis Devacho put, Dev taka rakhtolo ani tachea dusmananachea chopkeantlo taka nivartolo.
19. Opmanamnim ani vollvolleamnim tachi porikxa korum-ia, oxem to kitlo dulôb to amkam kollon ietolem ani tachi sonsnnikai ami topasun kaddtoleanv.
20. Lojechea mornnachem formonn tacher marum-ia kiteak konn apnnak pavtolo mhonn tannench sanglam.'</p>
21. Oslim tanchim kolponam, punn sogllim vankddim, Tanchea noxtteponnan tankam kudd'ddim keleant.
22. Devache gutt tim vollkhonant, bhoktivont jivitak inam' melltolem mhonn tankam kosloch bhorvanso na, nitoll-nirmoll kallzachea mon'xank inam' asa mhonn tankam bhavarth na.
23. Kiteak Devan mon'xak omôr kelo, Apnnachea soimba sarko taka rochlo;
24. devcharachê nattkaien ki sonvsarant moronn haddlem, tache bhageli tem chaktole. Ovesvor
