1. Prithumechê êkê ximê thaun dusrê ximê porian ti apli podvi pavoita, soglleô vostu borê bhaxen manddun haddta.
2. Mhojê tornnê piraier thaun hanvem zannvaiek sôdli ani hanvem ticho môg kelo. Hanvem tika mhoji vhokol korunk ievjilem, hanv tichê sundoraiechea mogan poddlam.
3. Deva vangdda jieun ti apunn unch kulliechi mhonn, ani soglleancho Dhoni sodanch apleacho môg korta mhunnon ti dakhoun dita.
4. Devachea ghuttachi tika mullavi vôllôkh asa, ani to kitem korta tea kamant ti adar dita.
5. Zôr hea jivitant girestkai êk anvddevpachi bori vost, Zannvaiê poros kitem odik moladik asa? tôr zannvaiecho vaur soglleak ximpoddlolo asa,
6. Ginean soglleô vostu korta tôr, tichea poros sogllea vostunk akar ditole anink konn asa?
7. Zor tum promannikponnacho môg kortai, tôr xegunn zaun asat tichea vavrachim follam, kiteak ti ap-domavnni, somjikai, nit ani dhiran jieunk xikoita; Hanchê poros jivitan mon'xank koslich adavachi vost na.
8. Tuka khub onnbhov gheupachi axa asa, Tôr zannvaiek fattli khobor asa, Fuddaracho ti odmas korta; Lokacheô sangnneô-mhonn'nneô ti somzota humannianche zobab ti zannam Mollbavelea khunnanchi ani ojapvont ghoddnneanchi tika adim fuddench mahiti asa, iug ani kall koxe bolanddtole te tika khobor asa.
9. Mhojea sukhachea vellar ti mhaka bori budh ditoli, ani oddchonn'nneamnim toxench dukhinchea vellar mhaka sol'lo ditoli dekhun hanvem tika mhojea jivitachi sangatin korunk ievjilem.
10. Tika lagun, sobhêmazar lôk mhaka ojaptolo Hanv bhurgo legun zalear, zanntte mhaka man ditole.
11. Mhojê nitichi kholai tim somzotolim, ani raza legit mhaka polleun ojap zatole.
12. Hanv vogi ravlear te hanv uloi pasun ravtole, ani hanv uloitam tedna te chit diun aikotole ani hanv chodd vêll uloit ravlear; ojeapon, te aplea tonddar aplo hat dovortole.
13. Tika lagon hanv omor zatolom, mhojea fattlean ietoleanchea monant mhozo ugddas sasnnak urtolo.
14. Hanv porzancher raj choloitolom, ani raxttram mhojê podvê khala astolim;
15. Mhojem nanvuch kaddlear zulmi rajkorte kamptole; Porjek boreponn, ani zhuza mollar hanv kalljidarponn dakhoitolom.
16. `Hanv ghora vetam tedna tichea sangatak visôv ghetolom, Kiteak, tichea sangatak kitench koddu asona, Tichea vangdda jietana dukh asona, bogor dhadosponn ani khuxalkai.'
17. Hacher soglleacher hanvem nihall kelo, Zannvaiê vangdda jiet zalear omorponn favo zata hea nirnnoiacher hanv pavlam,
18. Tichê ixttagottint sopurnn dhadoskai asta, Tichea kortutvamnim somponasloleô dovloti astat, Tichea sangatan jievop mhollear khori nit mellovop, Tichê borabor ulovop mhollear bhovman mellovop, Dekhun tika apnnaunk hanvem soglleô vattô dhôrleat.
19. Lhan bhurgo astana hanv dhadoxi aslom, Noxiban mhaka êk boro atmo favo zalo,
20. Vô hanv boro aslom, dekhun hanv nirmôll kuddint bhitôr sorlom zait;
21. Punn, Devan dilea xivai Zannvai mhaka mellunk xokchina, mhunnon somzolea uprant - ani konnachea danan ti asta tem sarkem somzop, mhonngê êk gineanachi khunna. Hanvem Deva lagim maglem taka poratun ulo marlo, ani sogllea mhojea kallzan hanvem mhollem:
