1. Hôi, tuje nirnnoi mahan ani somzonk kotthin, Dekhun, nennarponnant aslole atme vankddê vatten vetat.
2. Jedna tuji povitr porza aplea hatant asa oxem noxtte somzotat, tedna te eka lamb kallokhi ratichea chopkeant svota kallkhache koidi zatat, Apleach pattosa khal legit te tujê sasnnik sasaientle bhairailole zatat.
3. Jedna te, aplea gupit patkamnim, ani visor ghaltolea kallokhachea podd'ddea kuxik, liplole mhunnon somzotale tedna, tankam bhirankull akantan ximpddaile ani dixttaveamnim bhensddaile.
4. Tankam asro ditolea liplolea kuddan legit tankam tê bhirantintle vattaunk zalemna; Bhirankull avaz tanchê bhonvtim gazonk lagle; toxench dukhest ani bhirankull mukhamollacheô savlleô tanchea dolleam mukar ieupak lagleô.
5. Khoincheach ujeachean tankam uzvadd diunk zalemna, Nhoi mhunnon chok-chokit porzolltolea noketranchean ti bhirankull rat uzvaddaunk zalemna.
6. Tankam ekuch uzvadd mhollear to vhoddlo, bhirankull, apxinch pett'tolo uzo - Ani tanchea thorthorean, to dixttavo nanch zatôch, tannim pollelam tem tannim chintlolem, tachê poros odik bhirankull mhunnon tankam somzolem.
7. Tanchi jaduvachi bhul atam podvi nasloli zali, ani urmottaien apnnak asa mhonnttale ti zannvai khênn'neam modem gondhollak sampoddli;
8. Kiteak apnnachean aplea piddest monantleô soglleô bhiranti ani pidda pois korpak zatat mhonnttale tech lôk, murkh bhirantin piddest zalet.
9. Tankam bhesddaitoli koslich vost nasta, tedna pasun êk kidd cholon vochpi avaz, ani eka jivanneachi fivnni legit tankam bhirantin bhôrta;
10. Tê bhirantin koddkoddun mele, Konnak polleunk chukona tea uktea mollbak legit te polleunk sôdina zalet.
11. Noxtteponn svota bhizudd ani svotak guneanvkari thoroita; Thir ontoskornnachea bollan vostu ghôddtat tanchea poros odik vaitt mhunnon somzota.
12. Khorem mhollear, gineanan dilole upai vaprinastana ravop mhongê bhirant;
13. Ani jitlo tum tujê bhitôr tancher unnem patietai, titlench tujea koxttanchem karonn vollkhona zaunk, odik bhirankull.
14. Punn khorench nirbhêl patallachê kholaientli utpon zal'li toxich nirbhêl rat - tê ratichea kallokhant te soglle ekech nhident bhormelet.
15. Bhirankull rupnnim atam tanchê fattik laglim, tanche otme niraxi zaun asle, karonn eka ravonaslolea ani okosmat ailolea thorthorean; tancher ghuri ghatli.
16. Ani oxê porim, thoinsor konnuim poddlolo asum Tea varanvamnim bond korunk naslolea koidikanneant poddon urtale.
17. Kheddeantlo xetkamti vô gonvlli vô soddear vavr korpi, he soglle konnak chukonaslolea noxiban xevttoleat ani koxttovleat, Kiteak tankam soglleank tê ekêch kallkhachê sankllen bandleat.
18. Vareacho modhur avaz, vistarlolea khandeanvelean bhonvtolea suknneanchim suadik gitam, vhanvtolea ghogheacho thoravik udkan denvtolea, khoddpancho kan bheravpi avaz,
19. Uddkeô marun dhanvtolea zonavoranche dixtti poddonaslole roste, bhov krur ran'votti zonavoranchim gorjonam, ani dongrantlea dholintlean portovtolea avazan, tankam bhirantin thorthorun ar zalolea porim dovorlim.
20. Ak'kho sonvsar disachea uzvaddan porzoll'lo ani, koslich addkhôll nastana, to aplem kam' korit ravlo;
21. Fokt tancheruch dhatt kallôkh posorlo, Tankam ravlolea kallokhachi savlli koxi. Punn tea kallôkha poros svota tech apnnak odik bharadik zaunk lagle.
