1. Ani tedna promannik monis vhodd dhir gheun ubo ravtolo ani apleak piddapidd ditoleank ani aplea koxttanchi beporva kortoleank to fuddo kortolo.
2. Ani taka polleun, tim bhirantin thorthortolim, ani oso ravonastana to vattoulolo tem polleun ojaptolim.
3. Ani apnnem adarlolea kortubancho tankam poschatap zatolo ani koxttanchea porvonneamnim tim eka-mekak mhunnttolim,
4. `Adim ami moskoreô kortaleanv to monis ho, ani taka opman korunk, kosle mhonn pixe ami! Tachem jivit eka pixeachem oxem ami somzoleanv tacho xevôtt bhovman naslolo oxem amkam dislem.
5. Devachea bhurgeam modem taka koso zago mell'lla? Ani bhagevontam modem tanchea daizant taka vantto koso?
6. Khoreponnim ami sotachea rostea vele koddsorleanv; Neai-niticho uzvadd amcher fankonk na, ani suria amcher udeunk na.
7. Ami bekaideache ani nisonttonache roste dhôrle, Vattô naslolea oronneamnim ami chol'le, Punn Sorvesporachea rosteachi ami kednach vollôkh gheunk na.
8. Amchê boddaiecho koslo mhonn faido zalo? Urmottaien ektthailolê girestkaiecho koslo mhonn upeôg zalo?
9. Atam teô soglleô vostu sorun geleô, Teô ekê savllê ani voilea-voir aikololea khobram bhaxen ubun vetat.
10. Uchamboll lharam kapun vetolea eka tarva bhaxen, khoinchean gelam ti khunna dakoinastana, nhoi mhunnon lharancher aplea maghachi nixanni dovorinastana na zata.
11. Apunn khoinchean gelam tacho marg varear dovrinastana; aplea paktteanchea bollan patoll varem katrit aplo rosto ugddun, apunn fuddem gelam tea rosteachi matui khunna dakhoinastana, tea varear uddtolea suknnea bhaxen.
12. Vô zoso apleak moklolea zagear vetana êk bann varo tôpit veta, punn, eka khinnant to varo portun tachea fattlean ektthaim zata, ani to khoinchean gelolo ti khunna matui urona toso.
13. Tech bhaxen ami: zolmotanv mhunnosor, ami rokddinch nattak zatanv, xegunnachi ekui khunna dovri nastana, amchem sogllem jivit ami amcheach khotteponnant sarlem!'
14. Eka noxtteacho bhorvanso varean ublolea pola bhaxen, vô tufanan fapxilolea somdirachea fennea bhaxen; varear ubtolea dhunvra bhaxen to ximpoddta, eka disachea soireachê iadi bhaxen tacher visôr poddtta.</p>
15. Punn, promannik monis sasnnak jietat, Dhonia sovem tanchem inam' ani Bhov Vorto tanchi rakhonn kortolo.
16. Hea khatir Dhoniachea hatantlo êk mhoimevont mukutt ani êk sobit kurov te ghetole; Aplea uzvea hatan to tankam samballtolo ani aplea bavlean tanchi rakhonn kortolo.
17. Aplea dusmanank khast launk To aplê premaxen zhuzak nhestolo, ani ak'khê rochnnek ek hatiar koxem manddtolo;
18. Chhat'tek promannikponn nhestolo, ani khori nit tachem xirstrann zatolem;
19. Kodinch harounk na tosli povitrtai aplo ddhal koso To ghetolo
20. Aplea khôr ragachi to êk dharechi torvar kortolo ani pixea mon'xam add zhuzunk, tachea vangddak ak'khi rochnna zhuztoli.
21. Kupancho dhonnux korun êk bann marlolea bhaxen, nemlolea zagear viz poddtolem;
22. Nixttur ragan, sogllea nettan tancher kupantlean korveancho pavs poddtolo. Somdirachem udok ani nodi tancher porton kaklut dhôrinastana, buddtti haddun tankam girastoleô,
23. Tancher ek vorixtt vadoll modd uprastolem ani eka tufana porim bonvrean ximpddaitolem. Noxtteponn sogllo sonvsar padd ghaltolem ani vikottai podvedaranchim xinvasonam portun umtun khala xevttitoli. Ovesvor
