1. Abimelekan, Jerubbaalachea putan, aplea avoichea bhavank Shekemant rup-rup mell'llo ani aplê avoiche vatten xapaichea gotrak oxem mhollem:
2. Shemachea mukhel mon'xank ho prosn ghalat: Tumkam hea donam bhitôr kitem odik borem dista: Tumchê voir sot'tôr zannamnim, mhonngê Jerubbaalachea sogllea putamnim razvôtt choloil'li, vô ekleach mon'xan ti tumcher choloil'li? Hanv tumchea hadda-masacho mhonn ugddas dhôrat.'
3. Tachê avoichea bhavamnim tachê vatten Shekemachea sogllea mukhel mon'xank hem sanglem ani tanchim bhavnnam Abimelekacho pattlav korunk oddlim, kiteak 'To amcho bhav' oxem te torkitale.
4. Baal-Beerithachea mondirantle tãnnim taka sot'tôr rupeache shekel dile; te gheun Abimelekan apnnachi pang dhôrunk, addkam-naddkam korpachea zobordost mon'xank farik kele.
5. Uprant, to Ofrahant, aplea bapaichea ghora gelo ani aplea bhavank, Jerubbaalachea sot'tôr putank, ekach fatracher jivexim marle. Tori Jothan, Jerubbaalacho nimanno put pollun liplo.
6. Shekemachea sorv mukhel nagrikam borabor Beth-Millo-k sogllo lôk zomlo ani Shekemak aslolea khambea-xim, xindur rukha mullim, Abimelekak raza mhonn porgôtt kelo.
7. Hi khobor Jothamak pavli. To ailo ani Gerizim' dongrachê tokxer ravun tannem vhoddlean mhollem: Devan tumchem aikunchê khatir, Sikhem'chea vhoddilamnô, mhojem aikat!
8. Apnnancher raj cholounk eka razak makhunk mhonn êk dis zhaddam bhair sorlim. Tãnnim zoitunak mhollem: 'amcho raza za!'
9. Zoitunan tankam zobab dilo: 'Hanvem zhaddancher raj cholounk Devank ani mon'xank man dita tem Mhojem tel Hanv sôddun dium?'
10. Tedna zhaddamnim anjirak mhollem: 'Tum tori ie, ani amcho raza za!'
11. Anjiran tankam zobab dilo: 'Sogllea zhaddancher raj cholounk mhoji gôddsann sôddchi hanvem ani mhojem foll-ui sôddun diunchem?'
12. Tedna zhaddamnim dak-valik mhollem: 'Tum tori ie ani amcho raza za.'
13. Dak-valin tankam zobab dilo: 'Sogllea zhaddancher raj cholounk devanchem ani mon'xanchem kalliz dhadoxi korta to mhozo rôs Hanv sôddun dium?'
14. Tedna sogllea zhaddamnim jhilkuttak mhollem: 'Tum tori ie ani amcho raza za!'
15. Ani jhilkuttan tankam zobab dilo: 'Borea monan tumcher raj cholounk tumi mhaka makhunk sôdtat zalear, ieiat ani mhojê savllê ponda ravat. Na zalear, Jhilkuttantlo uzo bhair sortolo ani Lebanachea devdarank girastolo.'
16. Tumi Abimelekak sorôll ani borea monan tumcho raza kela zalear,, tumi Jerubbaal-a ani tachea kuttumba sovem manan vagleat ani tachea kornneank favo tê porim tumi tachê lagim vevhar kela zalear,-
17. tôr tumkam Midianachea hatantlim nivarunk mhozo bapui aplo jiv sonkottant ghalun tumchê pasot zhuzlo,
18. punn tachea kuttumba add tumi aiz ube ravleat, tachea sot'tôr putank ekach fatracher jivexim marleat ani Abimelekak tache gulam-chakornichea putak, to tumcho bhav mhonn Shekemantlea mukhel mon'xamnim apnnacher razvôtt cholouncheak nemla!-
19. hôi, zori sorôll ani borea monan Jerubbaal-a ani tachea kuttumba sovem tumi vagleat, tôr Abimelek tumchem dhadosponn zauncho ani tumi tachem.
20. Punn, oxem nhoi zalear Shekemantlea ani Beth-Milloantlea mukhel mon'xank girasunk Abimeleka thaun uzo bhair sorum, ani Shekemantlea ani Beth-Milloantlea mukhel mon'xam thaun Abimelekak girasunk uzo bhair sorum!'
21. Tedna Jothanan pollapôll kaddli ani Beerachi vatt dhôrli; Abimeleka, aplea bhavachea hata pois asunk, to thoim ravlo.
22. Abimelekan Israelacher tin vorsam raj choloilem.
23. Tedna Devan Abimeleka ani Shekemachea fuddaream modem vegllocharacho svas ghalo ani Shekemachea fuddareamnim Abimelekak ghat kelo.
24. Jerubbaalachea sot'tôr putancher kel'lea opradak farikponn mellchê khatir ani zankam Abimelekan jivexim marlole tanchem rogot tanchea bhava Abimelekak buzchê khatir ani zankam jivexim marunk taka adar dil'lea Shekemachea fuddareancher tem buzonk, oxem ghoddon ailem.
25. Shekemachea fuddareamnim taka fas ghalun dhôrunk monis dongrachea tonkxeancher dovorle ani hannim tê vatten ietea-veteank luttoile mhonn Abimelekak khobor mell'loli.
26. Gaal, Obedacho put, aplea daijeam borabor, Shekemantlean pavun sorlo ani Shekemachea fuddareancho tannem visvas zôddlo.
27. Tea bhair, kheddea ganvamnim dakanchem pik punzaunk gele, teô paiamnim moll'leô, uprant utsôv pall'lo ani aplea devachea mondirant gele; thoim te jevle, piele ani Abimelekacher xirap ghalo.
28. Gaal, Obedachea putan, mhollem: 'Ami tachi seva korcheak, Abimelek konn ani Shekem kitem? Jerubbaalacho put ani tacho adari Zebul, Shekemachea bapai, Hamorachea mon'xam khal ascho nhoi tôr? Kiteak mhonn ami tache gulam' zaunche?
29. Konn hea lokak mhojê sardarkê khal haddit, ani Hanv Abimelekak bhair uddoitolom? Hanv oxem mhonntolom aslom, 'Tuji fouz odik ghôtt kôr ani fuddem ie! ' '
30. Gaal-an, Obedachea putan, oxem mhonnlolem ti khobor Zebulak, xarachea razpalak pavli ani to zobor ragar zalo.
31. Tannem oxem sangunk Abimelekak dut dhaddle: 'Polle, Gaal, Obedacho put, ani tache daiji Shekemant aileat ani xar tujê add uskaitat.
32. Tôr tum ani tujea sangata asat te monis kallkê ratint fuddem vochat ani kheddea ganvamnim lipun pahro korun ravat;
33. Uprant, dis udetam, sokallim bhair sorat ani xaracher akromonn korat. Gaal ani tachê pangik dhôrpi tuka mellunk ietat tedna, tujê lagim ghoddta toxem tankam fuddo kôr.'
34. Mhonnttôch, ratchea vellar, Abimelek, aplea sogllea mozot-darank gheun, fuddem sorlo ani char zomeamnim Shekemacher akromonn korunk guptim toiar ravlo.
35. Gaal, Ebedacho put, bhair sorta ani xarachea darvonttea-xim ravta mhollear, Abimelek ani tache soinik aplea doddeantle bhair sorun ube zale.
36. Gaalan tankam pollele ani Zebulak mhollem, 'Polle kãi monis dongrachea tonkxam thaun ietat.' Punn Zebulan taka zobab dilo, 'Dongracheô savlleô tuka monis koxe distat.'
37. Punn Gaal-an bhasun mhollem: 'Kãi monis Tabbun-Haares thaun denvun ietat ani êk zomo Eton-Meonenimachê dixentlean ieta.'
38. Zebulan taka mhollem: ' 'Ami tache gulam' zaunk Abimelek konn?' Atam khoim asa tuje bobke ani tuji boddai? Tunvem zanchi beporva kel'lii te he monis nhoi? Utth tôr ani tanchê add zhuz kôr.'
39. Shekemachea fuddarian mukhar ravun, Gaalan Abimeleka add zhuz manddlem.
40. Abimelekan Gaalak dhanvddailo, ho tachê mukhar pollun gelo ani tache zaite monis darvonttea-xim pavchê adim zokmi zale ani morun poddle.
41. Tedna Abimelek Arumant ravlo ani Zebulan Gaalak ani tachea daijeank bhair ghale ani tankam Shekemant ravunk dilem na.
42. Dusrea disa, jedna lôk kheddea ganvamnim vetalo, Abimelekak hi khobor gomli.
43. Tannem aplea mon'xank tin zomeamnim vanttle ani xetamnim ravun pahro kelo. Lôk xar sôddun veta to polleun, to tanchea angar gelo ani tankam jivexim marlim.
44. Jedna Abimelek aplea zomea borabor taktin gelo ani xarachea darvonttea-xim zhuzak toiar ravlo tedna dusre don zome xetant aslolea soglleanchea angar gele ani tankam jivexim marle.
45. Tea ak'khea disa, Abimelekan xaracher akromonn kelem, bollan tantunt bhitôr sorlo, ani thoim ravtoleank dharunnaien jivexim marlim, xar môddun uddoilem ani tacher mitt ximpddailem.
46. Hem aikun, Migda- Shekemantlea mukhel mon'xamnim El-Birithachea mondirachea bhuianrant asro ghetlo.
47. Migdal-Shekemantle mukhel monis thoim ektthaim zaleat mhonn Abimelekan aikona fuddem,
48. to aplea sogllea mon'xank gheun Zalmon dongrar gelo. Tedna êk kuradd aplea hatamnim ghetli, eka rukacho khando katorlo, to dhôrlo ani aplea khandar marlo, ani apnna vangdda aslolea monxank mhollem: 'Hanvem kel'lem tumi pollelam toxench vegim korat.'
49. Mhonnttôch tachea dôr eklea mon'xan êk khando katorlo tedna, Abimelekachea pattlean vochun tãnnim bhuianrachea tea khandeanchi ras keli ani khala aslolea voir tika uzo lailo; haka lagun Migdal-Shekemant sogllo lôk melo, sumar êk hozar dadle ani bailo.
50. Abimelek Thebezacher choddun gelo taka tannem veddho ghalo ani tem apnna adhin kelem.
51. Tea xara modem ek kott-gopur aslem; thoim sogllea dadleamnim ani bailamnim ani xarantlea mukhel mon'xamnim asro ghetlo. Tãnnim dar damplem ani gopurachea pattosa porian voir gelim.
52. Abimelek tea gopura-xim ailo ani tacher akromonn kelem. Gopur laschê khatir tachea dara-xim to pavona fuddem
53. ekê ostorên ek danteachem pedd voir thaun Abimelekachê tokler uddoilem ani tachem korttem foddlem.
54. Thoinchê thoim aplim zhuza-angvostram gheun aslolea sevokak ulo marlo ani taka mhollem: 'Tuji torsad bhair kadd ani mhaka jivexim mar; 'Mhaka ekê ostorên jivexim marlo' oxem mhonnop zaina zauncheak.' Mhonnttôch, tachea sevokan torsadin taka aspas tôplo ani to melo.
55. Abimelek melo mhonn Israelkaramnim pollelem tedna, te ap-aplea ghora ximpoddle.
56. Oxem Abimelekan aplea sot'tôr bhavank jivexim marun aplea bapaik kel'lem vaitt Devan farik kelem,
57. ani jem sogllem vaitt Shekemantlea mon'xamnim kel'lem tem Devan tanchea mathear denvoilem ani oso Jotham, Jerubbaalachea putacho xirap tankam khoreponnim laglolo dixtti poddlo.
