1. Tedna Samson Gaza gelo, ani thoim êk naikin taka distôch, to tichê-xim gelo.
2. Samson hanga aila' oxem Gazachea mon'xank kollona fuddem, tãnnim char-ui vattamnim veddho ghatlo ani xarachea darvonttea-xim pahro korun taka ak'khi rat ravle. Tôr sogllê ratri te anink kainch korunk sôdi nasle, oxem chintun, 'Dis udeum pasun ami ravum-ia, uprant taka jivexim marum-ia.'
3. Punn, Modianir porian Samson, antrunnar ravlo, uprant modianir utthlo, xarachea darvonttea-xim daram toxench donui khambe ghôtt dhôrle, te môddle, addambe ani sogllem bhuzancher ubarlem, ani Hebronak fuddo korun aslolea dongra voir pasun vhelem.
4. Hachê uprant, Sorek-chea falkeant ostorechea mogant poddlo; tichem nanv Delilah.
5. Filistini fuddariamnim tika bhett keli ani mhollem 'Taka fulam mall ani tachi edi vhoddli xokti khoinchi ieta ani taka ghôtt bandunk ani taka amchea khal korunk, ani taka koso amchê adhin korunk zait, hachi khobor kadd. Hachê khatir ami dôr-eklo tuka ikraxim rupeache nanne ditole.'
6. Delilahn Samsonak mhollem, 'Upkar korun mhaka sang, tuji vhôdd xokti khoim thaun ieta ani tuka bandunk ani domaunk kitem korunk zai.'
7. Samsonan zobab dilo, 'Mhaka zôr sat sukho-naslolea ghôtt dôriamnim bandlolo zalear, mhoji xokti bigôddtoli asli ani konnui mon'xa porim Hanv zatolom aslom.'
8. Filistini fuddareamnim sat novim sukho naslolim dhoram haddlim, ani tinnem tim ghetlim ani taka bandlo.
9. Tichea kuddan Filistevkar ravlole ani tinnem bobatt marli, 'Samson, Filistinikar tujea angar ietat!' Tedna tannem tim ghôtt doram uzo lagtanch, dhoram tutton toxim tôddun vetat. Mhonnttôch tachê xoktecho gutt ozun kollonastana urlo.
10. Tedna Delilahn Samsonak mhollem, 'Tum mhojim fokanddam kortai ani mhaka fotti martai. Tor atam mhaka sang, tuka bandunk kiteachi goroz?'
11. Tannem zobab dilo, 'Zori mhaka kednach vaprunk naslolea novea razvamnim ghôtt bandlolo, zalear mhoji xokti vetoli asli ani konnai mon'xa sarkho Hanv zatolom aslom.'
12. Delilahn tedna, nove razu ghetle, taka bandlo, ani bob marli, 'Samson, Filistinikar tujer akromonn kortat.' Tinnem aplea kuddant monis lipoun dovorlole, punn tannem hatak bandlole razu sutam zalolê porim tannem môddle.
13. Tedna Delilahn Samsonak mhollem, 'Atam porian tum mhojim fokanddam korit ailai ani mhaka fotti marleai. Sang mhaka tuka ghôtt bandunk kitem gorjek poddtolem.' Tannem zobab dilo, 'Zôr tunvem mhojea kensacheô sat fanteô lugttan bandleô zalear ani teô ghôtt ektthãim korunk danddean boddoiloleô zalear, mhoji xokti vetoli asli ani konnacheai mon'xa porim Hanv zatolom aslom.'
14. Tinnem fuslavn taka nhidoilo, uprant tachea kensacheô sat fanteô lugttan bandleô, teô boddien ghôtt boddoileô ani bobatt marli. 'Samson, Filistinikar tujer akromonn kortat!' To aplê nhidentlo utthlo ani boddi toxem vinn voddun bhair kaddlem. Mhonnttôch tachê xoktecho gutt kollo nastana urlo.
15. Delilahn Samsonak mhollem, 'Jedna tujem kalliz mhojea vangdda na, tujean mhozo môg kortai mhonn koxem sangunk zata? Tin pavtti tunvem mhojim fokannam kelim ani tuji vhôdd xokti khoim thaun ieta ti sangunk na.'
16. Ani disachea disa ti taka sotanvk lagli, tachê pattik lagli ani to aikun-aikun thoklo ani mornnachê piddent pavlolo koso zalo.
17. Xekim, tannem sogllem tika sanglem; tannem tika mhollem, 'Katôr mhojê toklek kednach lagonk na, karonn Hanv mhojê avoichea kusveant thaun Devak sonvskarlolo zalam. Mhoje kens taslear, mhoji xokti vetoli ani mhoji ghottai na zatoli ani konna-i her mon'xa sarkho zatolom.'
18. Tannem khorench tika sot sanglam mhonn Delilahk atam gomlem.Tinnem Filistini kunvrank ho sondêx diun, apounk dhaddle: 'Ekuch pavtt porot ieiat; tannem mhaka sogllem sanglam.' Ani Filistini fuddari aplea hatamnim duddu gheun tichê sorxim aile.
19. Tinnem fuslaun aplê unttient Samsonak nhidoilo, eka mon'xak apoilo ani tachê toklecheô kensancheô sat fanteô katrun uddoileô. Oxem poilech pavtt tinnem taka domailo, ani tachi xokti geli.
20. Tinnem bob marli, 'Samson, Filistinikar tuka akromonn kortat!' To nhidentlo utthun tannem chintlem, 'Pavttichê-pavtti hanvem kelam toxem, Hanv sarko mekllo zatolom.' Punn Sorvesporachi xokti tachê veli koddsorli mhonn to nokllo aslo.
21. Filistinikaranim taka dhôrlo, tache dolle umttun kaddle ani taka Gaza vhelo. Dupett sankllimnim tache hat-paim bandle ani bondkonnint danteacho fator bhonvddaunk, to aplo vêll sartalo.
22. Tache katorlole kens porot vaddonk lagle.
23. Filistini fuddari Dagon aplea devak vhoddlo iodn bhettounk zomle. Ani aplea somorombha somoiar tãnnim mhollem: Amchea hatamnim amchea Devan Samson amchea dusmanak sompun dila.
24. Ani aplea devak pollena fuddem, lokan taka marlo ani arddun tachi vakhannnni keli. Amchea devan, amchea hatamnim, Samson amchea dusmanak sompun dila. Tannem amcho dês padd ghalo ani amchê modlea puskoll zannank tannem jivexim marle.
25. Ani tanchim kallzam khuxalkaien bhôrlolim astana, tãnnim bob marli, 'Samsonak haddat, mouz marunk.' Mhonnttôch bondkhonnint thaun Samsonak haddunk lailo ani tannem tanchê mukhar zaite khell kele; uprant khambeam modem taka ubo dovorlo.
26. Tedna Samsonan tachea hatak dhôrun vhortalo tea bhurgeak mhollem, 'Hi imarôt samballtat tea khambeank hat launk mhaka lagim vhor, Hanv tankam tenkun ravonk sôdtam.'
27. Ti imarôt dadlea ani bailamnim bhôrloli. Soglle Filistini fuddari thoim asle, sumar tin hozar dadle ani bailô dhabear thaun Samsonache khell polletalim.
28. Samsonan Sorvesporak ulo marlo ani arddun mhollem, 'Sorvespora Deva, Hanv prartham, mhozo ugddas kôr; hê pavtti Deva, mhaka novean xokti di, ani mhojea donui dolleanchem sudd ekech farak mhaka gheum di.'
29. Ani imarôt samballtolea modlea don khambeank Samsonan dhôrle. Aplea uzvea hatan ekak ani dhavea hatan dusreak veng marli ani arddun mhollem,
30. Filistinikaram vangdda mhaka-i morum di.' Aplea sogllea bollan tannem ghôtt dhôrun imarôt haloili, ani fuddareancher ani thoim aslolea lokacher imarôt poddli. Aplea mornna vorvim tannem moronn haddlem tanchi sonkia aplea jivitant jivexim marlole tachê-von chodd asli.
31. Tache bhav ani tachea bapaichem ak'khem kuttumb ailem ani taka uklun vhelo. Tãnnim taka vhelo ani Manoah tachea bapaichea fonddant, Zorah ani Eshatol hanchê modem purlo. Tannem Israelachem fuddarponn vis vorsank choloilolem.
