1. Israelachea mon'xamnim Mizpahnt ho soput ghetlolo, 'Amchê modlo konnuch apli dhuv Benjaminachea kullantlea dadleak logn korunk dinvchona.'
2. Lôk Bethelak gelo ani sanz zaisor thoim ravlo; Deva mukhar bosun ani aple talle ubarun,
3. tãnnim vhoddlean oxem rudon kelem, 'Sorvespora Israelachea Deva, Israelant oxem kiteak ghoddunk pavlem, mhonngê aiz Israelachea kullantlem ek kull na zanvchem? '
4. Dusrea disa, lôk borê sokallim utthlo ani thoim êk vedi bandhli; tãnnim hom', sovostaiechim bolidanam bhettoilim.
5. Tedna Israelkaramnim mhollem, 'Israelachea sogllea kullantlim, tis aichê zomatik, Sorvespora mukhar konn ieunk nant?'- karonn zo konn Mizpahnt Sorvespora mukhar iena zait, to jerul mortolo mhonn tãnnim sobhêmazar soput ghetlolo.
6. Atam aplea bhava Benjamina vixim Israelkar dukhi zal'le. 'Aiz' tãnnim mhollem, 'Israelantlem ek kull kapun gelem.
7. Urleat tankam potini diunk ami kitem korum-ia, karonn Deva mukhar ami amcheô dhuvô tankam lognant dinvcheo nanv mhonn soput ghetla?'
8. Tedna tãnnim vicharlem, 'Israelachea kullantle konn Sorvespora mukhar, Mizpahnt ieunk na?' Tedna Gileadachea Jabeshantle konnuch zomatik hajir zaunk na mhonn gomun ailem.
9. Karonn lokachi meznni kelea uprant Gileadachea Jabeshant ravpi konnuch hajir nasle.
10. Tedna ekttãim zal'leamnim apnna modlea bara hozar soglleam-von chodd kalljidar mon'xank thoim dhaddle, oso hukum' diun, 'Vochat ani Gileadacher Jabeshantlea sogllea ravpeank, bailam ani bhurgeam soit jivexim marat,
11. tumi oxem korchem: sogllea dadleank ani kedna tori eka dadlea-xim nhidleant tea ostoriank tumi nisontonnachea xirapa khal ghalchim punn ankvarincho jiv tumi vattauncho.'
12. Gileadachea Jabeshant ravpeam modem tankam kednach dadleam-xim nhidunk nant tosleô charxim tornneô ankvari mell'lleô, ani tãnnim tankam aplea mollar vhelim (Shilohant, hanga Kanaanachea prantant)
13. Tedna zomlolea sogllea lokan Rimmonachea Khoddpa-xim aslolea Benjaminitank xanticho nirôp diunk sondêxkar dhaddle.
14. Tedna Benjamin ghora portolo; Gileadachea Jabeshantleô ostriancho jiv vattailolo, tankam teô dileô, punn soglleank teô pavleô nant.
15. Lokak Benjaminitanche churchure disle, karonn Sorvesporan Israelachea kullam modem futt ghatloli.
16. Ani ektthovlolea modlea zantteamnim mhollem, 'Urleat tankam bailô diunk, ami kitem korum-ia, karonn Benjaminichea kullacheô bailô marun kobar zaleô?'
17. Tãnnim fuddem mhollem, 'Koxê porim amchea Benjamin kullachea urlolea mon'xam vorvim ek kull nopoit zanvchem vattaum-ieta?'
18. Amchean amcheô dhuvô tankam lognant diunk zainant- karonn Israelitamnim oso soput ghetlolo, 'Benjaminachea kullantlea mon'xank potin diit, tacher xirap poddum.'
19. Tori', tãnnim mhollem, 'Sorvesporachea manak dôr vorsa Shilohant êk porob kortat' (Bethelache ut'torik, Bethel thaun tem Shekem vetolea mukhel rosteachê udentik ani Lebonahchê dokxinnik hem xar urta.)
20. Mhonnttôch tãnnim Benjaminitank hê porim korunk sanglem, 'dakvalinchea molleant doddeak ravat.
21. Pahro kôr: Shilohchim cheddvam nachunk zomeamnim bhair sortat tedna, tumi dakvalinchea molleantle bhair sorat, Shilohchea cheddvam modlim tumchi potin zaunk dôr-eklo dhôrat ani Benjaminachea prantant vochat.
22. Tanche bapui vô bhav ieun amkam garannem kortit zalear, ami mhonntoleanv, 'Amkam teô asum di, karonn soglleank pavtat titleô potini amkam zhuzant mell'leô nant, ani tumchean tankam diunk zalemna, vô tedna tumi opradhi zate asle.' '
23. Benjaminitamnim oxem kelem, ani nachtalim cheddvam tankam tãnnim dhôrlim, ani dadle asle titleô potini vheleô ani uprant, danvun, aplea ganv-ghora gele, xaram porot bandlim, ani thoim thikann kelem.
24. Tedna Israelkar xipoddle, dôr-eklo aplea kullak ani aplea ghoranneak porot ekttovlo, dôr-eklean ti svat sôddli ani aplea purvozanchea daizachea zageak gelo.
25. Tea disamnim Israelant Raza naslo, ani dôr-eklo apnnak zai toxem kortalo.
