1. Gilgal thaun Bethel porian Sorvesporacho dut gelo ani tannem mhollem: 'Tumchea purvozank soput gheun Hanvem bhasailolo tea desant tumkam Ejiptantlim bhair kaddun pavoileant. 'Tumchê kodde kel'lo korar Hanv kednach moddchona mhonn Hanvem tumkam sanglam.'
2. Tumi tumchê pallien, hea desant ravtoleam kodde korar kori nakat; tancheô vedi moddun uddoiat.' Punn, tumi Mhojea utrak pallo diunk na. Oxem korunk tumkam karonn koslem?
3. Borem tôr, Hanv tumkam sangtam: 'Tumchê fuddean hea raxttrank Hanv dhanvddaichona, tim tumkam piddapidd ditolim ani tanche dev tumkam fas ghaltole. ' '
4. Jedna Israelachea lokak Sorvesporachea dutan osli dhomki dili, lôk vhoddlean bob marun roddlo;
5. dekhun, tê suatek tãnnim Bokim' mhonn nanv dilem ani thoim Sorvesporak iodn bhettoile.
6. Joshuan tankam dhaddlea uprant, Israelacho lôk- dôr-êk Israeli ap-aplea daizant-akho dês apnna adhin korunk gelo.
7. Joshuachea ak'khea jivitant, lokan Sorvesporachi seva keli, toxench, Joshua mortôch jietale ani Israela khatir Sorvesporan kellim vhôdd kortutvam pollel'lim tea fuddarianchi jivit-bhôr, lokan Sorvesporachi seva keli.
8. Joshua Nunacho put, Sorvesporacho sevôk, melo tedna, to ekxem dha vorsancho aslo.
9. Gaash porvotachê ut'torik Efraim' kullachea dongri prantant, Timnath-Heresant taka aplem daiz koxem mell'llolea bhattant taka purlo.
10. Jedna tê pinddkechim sogllim aplea purvozam vangdda ekvottlim, anink êk pinddka tichê pattlean aili; hi Sorvesporak, nhoi mhonn Israela pasot Sorvesporak kel'lim kortutvam ti vollko nasli.
11. Tea disamnim Sorvesporak vaitt distalem tem Israelachea putam-dhuvamnim kelem, ani Baal devanchi tim seva korunk laglim.
12. Tankam Ejipt desantlim bhair kaddlolim tea Sorvesporak, tanchea purvozanchea Devak, tãnnim sôddlo ani apnna sorbhonvtim jietolea lokanchea devancho pattlav kelo. Tanchê mukhar tim sorpottlim: tãnnim Sorvesporak rag haddlo,
13. tãnnim Sorvesporak sôddlo ani Baalachi ani Astartichi seva keli.
14. Tedna Israelacher Sorvesporacho rag pettlo. Tannem tankam nagovnneanchea hatant dilim ani hãnnim tankam luttlim; tanchê sorbhonvtim aslolea dusmananchea hatant tannem tankam ghalim ani tanchean tankam fuddo korunk zalem na.
15. zoxem Sorvesporan tankam xiddkavnni dil'li ani soput gheun tankam sanglolem, tim zhuz korunk bhair sortalim titlê-i pavtti tankam vaitt korunk Sorvesporacho hat tancher aslo ani oxem Tannem tankam sarkim sonkoxttant ghalim.
16. Uprant Sorvesporan fuddari nemle ani Israelitank nagovnneanchea hatantlim nivarlim.
17. Punn fuddareanchem-i aikunk tim toiar naslim. Naikinim bhaxen tim dusrea devam pattlean gelim ani tanchê mukhar sorpottlim. Tancheapurvozamnim Sorvesporacheaadniank pallo diun rosto dhôrlolo totãnnim rokddoch sôddlo; tanchidêkh tãnnim gheunk na.
18. Sorvesporan tankam fuddari nemle tedna, Sorvespor fuddariam sovem aslo ani, to fuddari jivo aso porian, tankam dusmananchea hatantlim nivartalo; kiteak piddapidd ditoleanchea bharan tim pinrgotalim dekhun, Sorvesporak tanche churchure distale.
19. Punn fuddari melea uprant tim adleach vaittant poddtalim ani tanchea purvozam-von odik paxtt kortalim. Dusrea devancho pattlav korun, tim tanchi seva kortalim ani tanchê mukhar sorpott'talim ani aplea purvozancheô khotteô chali ani vattô tim koxinch sôddinaslim.
20. Tedna Sorvesporacho rag Israelacher pettlo ani tannem mhollem: 'Tanchea purvozam kodde Hanvem sthaplolo korar hê porjen môddlo ani Mhozo tallo aikunk na dekhun,
21. Joshua melo tedna, jim tannem raxttram ravunk dovorlim tantlem ek punn tanchê mukhar Hanv fuddarak anink dhanvddaichona;
22. hachê vorvim Hanv Israelachi porikxa kortolom ani tanche purvoz Sorvesporacheô vattô tankle toxem tim choltat ki na tem polletolom.'
23. Hea pasot, Sorvesporan hea raxttrank thoim ravunk dovorlim; tankam dhanvddaunk Taka takit zali na, nhoi mhonn Joshuachea hatant tankam Tannem dilim nant.
