1. Tea disamnim, jedna Israelant Raza nasle, êk Levit aslo; tachem ghor Efraimachea dongri prantant bhitôr aslem. Tannem Judahchea Bethlehemantli ekê ostorek apli naikin kel'li.
2. Rag toklek marun ostoren taka sanddlo. Judachea Bethlemant aplea bapaichea ghora porot geli, ani thoim ti thoddo kall ravli- char mhoine.
3. Ticho poti tichê sôdik gelo, tika fuslavn porot haddunk, eka aplea sevokak ani don gaddvam gheun. To ostorêchea bapaichea ghora lagim pavlo tedna, bapain taka pollelo ani khuxalkaien taka ievkar dilo.
4. Tachea sasupain, ostorechea bapain, taka thoim dovorlo; to tachea sangata tin dis ravlo; te jevle, piele ani thoim rati sarleô.
5. Chovthea disa, fantear te utthle, ani Levit vochpachi toiari kortalo tedna cheddvachea bapain zanvoiak mhollem, 'Ghottai gheunk kiteim khavpak ghe, uprant tujean vochum ieta.'
6. Mhonnttôch te dog-ui bosle ani jevunk ani pieunk suru kelem, tedna cheddvachea bapain tea tornnea dadleak mhollem, 'Aiz ratii hangasor ravunk ani dhadoxi zaunk kobul za.'
7. Ani vochunk to uttlo tedna, sasupain taka ravunk porot nêtt kelo ani tannem anik êk rat thoim sarli.
8. Panchvea disa, Levit vochpak vegim uttlo punn cheddvachea bapain taka mhollem, 'Poili ghottai ghe!' Mhonnttôch to dis darer poddo-sor te ravle ani dogaimnim sangata jevonn kelem.
9. To aplê naikini ani sevoka sangata vochunk utthtalo tedna, tachea sasupain, tea cheddvachea bapain mhollem, 'Polle, dis poddot ailo, Upkar korun, rat hangasoruch sarat. Polle dis sompot ailo. Rat hangasor sarat ani khuxal zaiat. Magir, faleam sokallim, tumchean tumchea ghora vochpachê vattek lagunk zata.'
10. Punn tannem, rat thoim sarunk nakarlem, to utthlo ani aplê vattek laglo, 'Jebus' hachê nodrek pavosor- mhonngê Jerusalem. Tachê lagim boska ghal'lim don gaddvam, tachi naikin ani tacho sevôk aslim.
11. Te Jebus pavlim mhonnosôr kallok zait ietalo. Sevokan aplea dhoniak mhollem, 'Chol-ia, ami hea Jebusitanchea xarant bhitôr sorum-ia ani rat thoim sarum-ia.'
12. Tachea dhonian zobab dilo, 'Na ami porkheanchea, Israelit nhoi, tanchea xarant vechem nhoi, ami Gibeah vochum-ia.'
13. Uprant tannem aplea sevokak mhollem, 'Chol ia, Gibeah vô Ramah hantuntlê khoinchê êk svater ami pavunk proitn korum-ia ani thoim rat sarum-ia.'
14. Mhonnttôch te cholot ravle ani aplê vatten vochot asle. Benjaminachea Gibeah pavtam, vêll poddlo.
15. Mhonnttôch tim Gibeahchê vatten gelim thoim rat sarunk. Xarant bhitôr sorlea uprant, Levit xarachea chovkear boslo, punn tankam rat sarunk aplea ghora gheunk konnuch fuddem sorlona.
16. Xekim, kallôk zatôch, ek zantto monis, xetantlo aplo vavr korun porot ailo. To-i Efraimachea dongri prantantlo aslo, punn to Gibeahnt ravtalo; thoim ravpi Benjaminachea kullache asle.
17. Provas korun xarachea chowkar asloleak tannem pollele. 'Tum khoim vetai?' Zanttean vicharlem 'Ani tum khoim thaun ailai?'
18. Ami amchê vatter asanv; Judachea Bethlehemant thaun Efraimchea dongri prantant bhitorlea bhagant ami vetanv. Hanv thoincho. Hanv Judachea Bethlehemant gel'lom ani atam Hanv ghora vetam; punn konnech mhaka aplea ghorant apounk na.
19. Mhojea gaddvam khatir mhojê lagim tonn ani khavôdd asa, toxench mhojê lagim unddo ani soro asa, mhaka hê bailek ani tujea sangata veta tea mon'xak tujea sevokachea sangatiak, kainch unnem na.'
20. Ievkar tuka,' zanttean mhollem, 'Tuka goroz tem mel'lum mhonn Hanv polletolom Tujean hea chovkar rat sarunk zaina.'
21. Mhonnttôch tannem taka aplea ghora vhelo ani gaddvank khavôdd dili. Cholun ailolim tãnnim aple paim dhule, ani jevle ani piele.
22. Tim movjen vêll sartana, thodde xarantle bodmas monis, ghora bhonvtonim ube zale, dar boddoilem ani tea zantteank, ghorachea dhoniak mhollem, ''Tujea ghorant bhitôr gela tea mon'xank bhair dhadd. Tachê lagim amkam ekvôtt korum di.'
23. Ghoracho dhoni tanchê sorxim bhair gelo ani mhollem, 'Naka bhavamnô, itle vaitt zai nakat. To monis mhojea ghorant asa mhonnttôch, oslim vaitt kortubam tachê sovem kori nakat.
24. Polle mhoji dhuv hanga asa; ti ankvar, Hanv tumkam ti ditam. Tumkam zai tem tichê sovem korat punn hea mon'xa sovem kainch vaitt korinakat.'
25. Punn te monis tachem aikona zale.Mhonnttôch Levitan aplê naikinik hatak dhôrun tanchê-xim bhair haddun dili. Tãnnim tichê lagim kuddichem dhadosponn bhôglem ani ak'khi rat sokallim porian, tika piddapidd dili, ani dis udelo tedna tãnnim tika vochonk dilem.
26. Dis udetam, cheddum ailem ani ticho poti aslo tea dhoniachea ghorachea umbrear poddlem ani uzvadd zai-sor thoim urlem.
27. Sokallim, ticho poti utthlo ani dar ugddun, apli vatt dhôrcho aslo tedna tannem tê bailek, ghorchea darachea umbrear, aple hat ghalun zomnir poddloli polleli.
28. Utth' tannem mhollem 'ami vochunk zai.' Kaim zobab naslo. Tannem tedna tika ubarun aplea gaddvacher ghatli ani aplê vattek laglo.
29. Aplea ghora pavona fuddem, tannem suri ghetli, aplê naikinichi kudd dhôrli ani tiche kuddiche sandhean-sandho bara kuddke kele, ani Israelachea bara kullank ti dhaddun dili.
30. Aplea pattoilolea sondexkarank tannem oxem sanglem, 'Israelitank tumi oxem mhonnchem, 'Israel porza Ejiptantli bhair sorloli tea disa thaun aiz porian oxem kedna tori ghoddlam? Hacher lokx ghalat, tumchê modem tacher vichar korat ani uprant tumcho nirnnoi diat.' Ani tem pollelea uprant, soglleamnim jahir kelem, 'Israelkar Ejiptantle bhair sorlole tea disa thaun tem aiz porian ami oslem ghoddlolem vô pollelolem na.'
