1. Jim raxttram Sorvesporan urunk nirmilim ani zanchê udexim Kanaankaram kodde zhuzacho onnbhov mellunk naslo tea sogllea Israelkaranchi porikxa korunk nirmilem, tim him
2. (Hem Israelachê sonstek, adim tori xikunk pavunk nant tankam, zhuzachi vidia xikunk Sorvesporan nirmilem).
3. Filistinanche panch sardar, ani te soglle Kanaankar, Sidonkar ani Lebanonachea dongrancher Baal-Hermonachea dongri pranta thaun Hamathachea ghola porian ravtale te Hittit.
4. Israel porjek kosak launk ani je Sorvesporan Moizesa vorvim tanchea purvozank hukum' dil'le te palltat ki na tem polleunk, tankam sonvoi asli.
5. Tea bhair Israelkar, Kanaanitam, Hittitam, Amoritam Perezzitam, Hivitam ani Jebusitam modem ravtale.
6. Te tanchea dhuvank logn korun ghetale ani apleô dhuvô tanchea putank logn korunk ditale ani tanchea devanchi seva kortale.
7. Israelkaramnim Sorvesporachea dolleam mukhar vaitt tem kelem. Te Sorvespora aplea Devak visorle ani tãnnim Baalanchi ani Asherahanchi seva keli.
8. Tedna Sorvesporacho rag Israelacher pettlo. Tannem tankam Kushan-Rishathaim, Edomachea razachê adhin kele ani Israelkar atth vorsam Kushan-Rishathaimache gulam' zale.
9. Israelkaramnim Sorvesporak bob marli ani Sorvesporan tankam êk tarôk upzoilo; to mhollear Othniel, Kalebachea dhakttea bhava Kenazacho put.
10. Sorvesporacho atmo tacher aslo, to Israelant fuddari zalo ani zhuzunk bhair sorlo. Sorvesporan Kushan-Rishathaim, Edomachea Razak tachea hatant dilo ani Kushan-Rishattaimacher to zoitivont zalo.
11. Desant challis vorsam sovostkai asli; uprant Othniel Kenazacho put melo.
12. Israelkaramnim Sorvesporachea dolleam mukhar vaitt tem novean kelem ani Sorvesporan Eglom', Moabachea Razak, Israelache add ghôtt kelo, karonn Sorvespora hujir vaitt tem te korit asle.
13. Amonitam ani Amalekitanchea adaran Eglonan Israelitancher akromonn kelem, tankam haroile, ani khazur maddanchem xar apnna adhin kelem.
14. Israelkar Eglon, Moabachea Razache otthra vorsam gulam' zale.
15. Israelkaramnim Sorvesporak ulo marlo tedna, Sorvesporan tankam êk tarôk upzoilo, To Benjaminachea kullacho Ehud, Geracho put; to davkuro aslo. Israelkaramnim aplo dhondd Moabachea raza Eglonak pavounk taka nemlo.
16. Ehudan don-ui vattamnim dhar asloli dedd futt lamb êk tolvar apnnak keli ani ti angvostra khal aplea uzvea zangttak lamboili.
17. Tannem dhondd Moabachea razak, Eglonak bhettoilo; Eglon ekdom mottho aslo.
18. Dhondd ghetlea uprant, to haddloleank Ehudan porot dhaddle;
19. Punn Gilgal aslolea murteam-xim pavona fuddem, to porot gelo ani mhollem: 'raza, hanvem tuka êk gupit sondêx diuncho asa.' Ogi ravat oxem razan mhollem tedna, soglle tache sevôk koddsorle.
20. Ehud tachê sorxim gelo; to ekloch aplea khasgi thondd voilea kuddant bosun also. Ehudan taka mhollem: 'raza Devacho êk sondex tuka diunk mhojê lagim asa.' Raza aplê kodelivelo rokddoch utthlo.
21. Tedna Ehudan dhavea hatan aplea uzvea zangddacher lamboiloli ti tolvar bhair kaddli ani Eglonachea pottant topli.
22. Tolvarichi mutt tolvari soit bhitôr geli ani chorbent rigli; Ehudachean ti tolvar aplê kuddintli anink bhair kaddunk zali na.
23. Voilea kuddachim daram dhamplim ani tim bond kelea uprant, to bhair sorun gelo.
24. Ehud gelea uprant, sevôk aile ani tãnnim pollelem, voilea kuddachim daram khilliô ghalun bond kel'lim aslim. Tãnnim oxem chintlem: 'Ghoddiêk thondd kuddachê bhitorlê vatten to bhair bosla zait.'
25. Te thoim ravun ravun, goddboddak sampoddle; tori to unchlea kuddacho dar ugddi naslo. Xekim, tãnnim chavi ghetli ani dar ugoddlem; thoim morun poddlolo, tancho doni zomnir aslo.
26. Itlea mhonnosor Ehudan pollapôll kaddli, ani murteanchê vattentlean vochun, Seirah ganvant xeronna gelo.
27. Thoim pavona fuddem, tannem Efraimachea dongri soddear thaun xing vazoilem ani taka apnna fuddem gheun Israelkar dongrar thaun denvun aile.
28. Ani tannem tankam mhollem: 'Mhojê pattlean ieiat, karonn Sorvesporan tumchea dusmana Moabak tumchea hatant dila.' Mhonnttôch tãnnim tacho pattlav kelo, Moabak utrunk, Jordan nodiche par aplea tabeant kele ani konnakuch te utrunk dile nant.
29. Tea somoiar torvarin Moabachea sumar dha hozar mozbut ani zhuzant ghoddlole monis tãnnim marun uddoile ani eklo porian suttlo na.
30. Tea disa, Israelan Moabak haroilo ani desak oixim vorsam sovostai mell'lli.
31. Tachê pattlean, Anathacho put, Shamgar ailo. Tannem boilank ambuddpachea konkean soixim Filistinikarancho nas kelo. To-i Israelacho êk tarok.
