1. Israelkaramnim Sorvesporachea dolleam mukhar vaitt tem kelem; dekhunuch, Sorvesporan sat vorsam Midianachê adhin tankam kelim.
2. Midianan Israelak khôr piddapidd dili. Midianachea chopkeantle suttunk Israelkaramnim porvontanchea khanchimnim ani dholimnim asro ghetlo.
3. Jedna Israelkar bim roitale tedna Midianit, Amalekitam ani Kadmonitam vangdda, Israela add akromonn kortale.
4. Tanchea desant te tombu tanntale ani Gaza porian ganvchea pikacho ibadd kortale. Tanchea jevnna-khannak Israelak te kãich dovrinasle, zaum êk menddro, boil vô gaddum.
5. Karonn, tollanchea biream sarke, aplim gorvam ani aple tombu gheun tim ietalim; tim nhoi mhonn mezunk zainant titlim aplim unttam gheun padd ghalunk ganvant ieun poddtale.
6. Oxem Midianan Israelak vhodd trasant ghalo dekhun, Israelkaramnim Sorvesporak ulo marlo.
7. Jedna Midianak lagun Israelan Sorvesporak ulo marlo,
8. Sorvesporan Israelkarank êk provadi dhaddlo. Hannem tankam mhollem: 'Sorvespor, Israelacho Dev oxem sangta, 'Hanvem tumkam Ejiptantlim bhair kaddlim, gulamponnachê vavrachê suvatê voilim, Hanvem tumkam bhair kaddlim.
9. Hanvem Ejiptkaranchea odhikarantlim ani her sogllea piddapid ditoleanchea hatantlim tumkam nivarlim. Hanvem tankam tumchea dolleam mukhavoilim dhanvddailim ani tancho dês tumkam dilo.
10. Hanvem tumkam oxem sanglem: Hanv Sorvespor, tumcho Dev. Tumi Amoritanchea desant atam ravtat, punn tanchea devank tumi bhozchem nhoi, tori, tumi Mhojem aikunk na. ' '
11. Sorvesporacho dut ailo ani Ofra ganvant eka xindur rukha ponda boslo. Ho rukh Abiezarantlea Joasacho. Gideon, tacho put, aplo gonv Midian'karank dakhoina zaunk to bhattient môlltalo.
12. Tedna Sorvesporacho dut taka dixtti poddlo; tannem mhollem: 'Sorvespor tujê sovem asa, bollixtt zhuzarea!'
13. Gideonan zobab dilo: 'Mhojea dhonia, mhaka bhogôs, punn Sorvespor amchê sovem asa zalear, atam hem sogllem amkam kiteak ghòddta? 'Sorvesporan Ejiptantlim amkam bhair kaddunk nant?' oxem mhonnun amche purvoz vhodd-vhodd ojapanchi khobor amkam sangtale, tim sogllim ojapam atam khoim asat? Sorvesporan amkam atam sôddleant ani Midianachea tabeant keleant.'
14. Hem aikun Sorvesporan tacher nodor marun mhollem: 'Atam tuka mell'llolea bollan voch, ani Midianachea hatantlo tum Israelak nivartoloi. Tuka dhaddta to Hanvuch nhoi?'
15. Gideonan zobab dilo: 'Mhojea dhonia, mhaka bhogôs, punn mhojean koxi Israelachi soddvonn korunk zait? Manassechea sogllea kullam modem mhojem kull bhov osokt ani mhojea kuttumbant hanv nimanno mhonn Tum borem zannai.'
16. Sorvesporan taka oso zobab dilo: 'Hanv tujê borabor astolom ani Midian êkuch monis zal'lê porim tum tacho bhosm kortoloi.'
17. Ani Gideonan Taka sanglem: 'Hanv tuka manovlam zalear, Tunch mhojê kodde uloitai mhonn mhaka êk khunna di.
18. Hanv Tujê-xim porot ietam mhonnosôr tum pois vochum naka mhonn hanv Tujê kodde magtam. Mhojem dan haddun tujê mukhar dovortolom.' Ani Tannem zobab dilo: 'Tum porot ie porian Hanv ravtam.'
19. Gideonan vochun êk bokuddlo toiar kelo ani ek map-bhôr pitt gheun khomir-naslole undde kele. Tannem eka panttuleant mas ghalem ani eka aidonant sôp ghalo ani sogllem xindur rukha ponda haddun dovorlem. To lagim pavtam,
20. Sorvesporachea dutan taka mhollem: 'Hem mas ani khomir-naslole undde ghe ani khoddpacher dovor ani tancher sôp ôt.' Gideonan toxem kelem.
21. Sorvesporachea dutan aplea hatant boddi asli ti gheun tea masak ani khomir-naslolea unddeank laili. Tea khoddpantlo uzo bhair sorlo ani tem mas ani khomir-naslole undde ujean lasun uddoilim, ani Sorvesporacho dut tachea dolleam mukhavelo nanch zalo.
22. Tedna to Sorvesporacho dut mhonn Gideonak gomlem ani tannem mhollem: 'Ai Sorvespora mhojea Dhonia! Hanvem Sorvesporachea dutak rup-rup pollela!'
23. Sorvesporan taka zobab dilo: 'Xanti tuka; bhieum naka, tum morcho naim.'
24. Gideonan tê svater Sorvesporak êk vedi bandli ani 'Xanti-Datar Sorvespor' oxem tika nanv dovorlem. Hi vedi Abiezarantlea Oprarant aiz porian ubi asa.
25. Tech rati, Sorvesporan Gideonak mhollem: 'Tujea bapaicho sat vorsancho boil ghe, ani tujea bapain Baalak bhettoiloli vedi môddun uddoi,
26. ani hea kil'lea voir Sorvespora tujea Devak êk favo tosli vedi band. Uprant, to boil ghe ani xud'dh hom koso zo povitr khambo tunvem môddlai tachea lankddacher lasun to Devak bhettoi.'
27. Gideonan aplea sevokantle dha sevok ghetle ani Sorvesporan hukum' ghal'lo tê porim kelem. Punn, aplea ghorabeachea ani xarantlea lokachê bhirantin, tannem tem disachem nhoi punn ratchem kelem.
28. Dusrê sokallim xarantlo lôk utthlo tedna, tãnnim Baalachi vedi môddloli polleli, tichê bôglek aslolo povitr khambo katrun uddoilolo dekhlo, ani novê bandlolê vedicher boilacho hom' kelo mhonn tankam distti poddlem:
29. Hem konnem kelam?'- tãnnim eka-mekak vicharlem. Tãnnim sôd ghetli, vaspus keli ani khorench sanglem: 'Gideon Joashachea putan tem kelam.'
30. Tedna xarantlea lokan Joashak mhollem: 'Tujea putak bhair hadd; tannem Baalachi vedi môddlea ani tichê boglek aslolo povitr khambo katorla dekhun, to morunk zai.'
31. Punn apnna bhonvtim aslolea lokak Joashan zobab dilo: 'Baalachi rakhonn korunk hem tumchem kam?' vô tachê khatir zhuzunk tumi raji asat kitem? (konn-ui Baala khatir zhuzunk sôdta taka sokallchê adim marun uddoitole) Gideonan tachi vedi môddli mhonnttôch, to êk dêv zalear tannem aplich rakhonn korchi.'
32. Tea disa, Gideonak Jerubbaal nanv dilem, kiteak tãnnim oxem mhollem: 'Baal atam tachê add zhuzcho, karonn tannem tachi vedi môddun uddoili!'
33. Tedna Midianit, Amalekit ani Udenticho lôk ektthaim zale ani Jordan nôd utrun Jezreel mollacher aple tombu tannle.
34. Sorvesporachea atmean Gideonak bhôrlo. Tannem xing vazoilem ani Abiezeran tacho pattlav kelo.
35. Tannem sondexkar sogllea Manassek dhaddle ani Manasse taka ektthovlo. Asher, Zebulun ani Naftali hankam tannem toxech sondexkar dhaddle ani him kullam taka mellunk fuddem ailim.
36. Gideonan Devak mhollem: 'Tunvem sanglam tea pormannem, khoreponnim mhojê udexim Tum Israelak nivarunk vetai zalear,
37. Hanv hem lonvechem chambddem hea follar dovortam. Zôr dhôv lonvecheruch asot ani her soglli zomin suki asot zalear, tedna tum mhojê udexim, Tunvem bhasailam toxem, Israelachi soddvonn kortoloi mhonn hanv zanno zatolom.'
38. Tôr oxench ghoddlem. Dusrê sokallim fanttear to utthlo, tannem lonvechem chambddem ghetlem ani pill'lem ani êk kanso-bhôr tantlem udok bhair kaddlem.
39. Tedna Gideonan Devak mhollem: 'Hanv anink êk pavtt uloin zalear, mhojer ragar zai naka tea chambddeachi anink êk porikxa mhaka korum-di: Tem chambddench sukem urum-di ani sorvbhonvtim zomnnicher dhôv asum di.'
40. Tê rati, Devan toxem kelem. Chambddench sukem urlem, punn her sogllê zomnicher dhôv aslo.
