1. Hachê uprant thoddea kallant, gonvachê luvnnê somoiar, Samson bokuddlo ghevn aplê potinik mellunk gelo; tannem mhollem, 'Hanv mhojê potini sorxim tichê kuddint vochonk sôdtam.' Punn ticho bapui taka bhitôr sorunk dina zalo.
2. Tannem mhollem, 'tuka samkich mandvona mhonn, mhaka dislem. Mhonnttôch hanvem tika tujea sangateak dili. Punn tichi dakhtti bhoinn tuka odik bori sobchi nasli? Bodlek tika ghe.'
3. Punn Samsonan tankam zobab dilo, 'Filistinikarank nuskann diun fokot atam mhojean tancho sudd gheunk zata.'
4. Mhonnttôch Samson thoinsorlo gelo ani tin'xim koleank dhôrle, uprant ujeacheô chuddeô ghetleô, don-don koleanchea xempddeank xempddiô bandleô ani don bandlolea xempddiam modem chuddeô ghaleô.
5. Tedna chuddiank uzo lailo ani Filistinikaranchea gonvanchea xetanim koleank sôddle. Hachê vorvim tannem konnsam toxench ubim aslolim gonvachim zhaddam tannem lasun uddoilim, toxinch dakveli ani zoitunachim zhaddam.
6. Filistinikaramnim vicharlem, 'Hem konnem kelem?' ani oso zobab mell'lo, 'Samsonan, Timnatachê mon'xanchê dhuvê lagim logn zal'lo tannem; tachea sasrean tachê potinik porot vheli ani tika tachea sangateak dili.' Filistinikaramnim tedna tê bailek ani tichea bapaichea kuttumbak uzo laun jivexim marlim.
7. Samsonan tankam mhollem, 'Tumi oxe vagtat zalear, Hanv soputa khal sangtam, hanvem tumcho sudd ghetlea bogor visôv ghenvchona.'
8. Ani to tancher porot-porot akromonn kortalo ani khub dexvat haddtalo. Tedna to Ethamachem khoddop mhollolea bhuianrant gelo ani thoim ravlo.
9. Filistinikar aile ani Judan aple tombu tannle ani Lehicher akromonn kelem.
10. Judachea mon'xamnim tankam mhollem, 'Tumi amcher kiteak akromonn kortat?' Tãnnim zobab dilo, 'Ami Samsonak dhôrunk ani tannem amchê sovem kelam toxench, tachê sovem korunk ami aileanv.'
11. Tedna Judache tin hozar monis Ethamchea khoddpa sorxim aslolea bhuimara-xim gele ani taka mhollem 'Filistinikaramnim amkam aplea odhikara khal dovorleat mhonn tum noklloi bi? Tôr atam tunvem amkam kitem mhonn keleim?' Tannem zobab dilo, 'tãnnim mhojê sovem kelam toxench, tanchê sovem hanvem kelam.'
12. Tãnnim tedna mhollem, 'Ami tuka dhôrun Filistinikaranchea adhin korunk aileanv.' Tannem mhollem, 'Tumi mhaka jivexim marchena mhonn mhaka soput diat.'
13. Tãnnim zobab dilo, 'Na, ami tuka fokot ghôtt bandun tanchê adhin diunk sôdtanv; ami khoreanich tuka jivexim marunk sôdinanv.' Tedna, tãnnim don novea dhoramnim taka bandlo ani tea khoddpar thaun vhelo.
14. To Lehi lagim pavot astana ani Filistinikar tachê sorxim, zoitacheô hueli marit dhanvun aile tedna Sorvesporacho svas tacher denvlo; tachea bavlleank bandlolim dhoram laslolê lhonvê porim zalim ani toxinch hatank bandlolim dhoram suttlim.
15. Gaddvache daddmonneachem tajem hadd taka mell'llem, tannem tem chopkean dhôrlem ani ubarlem ani tem gheun tannem hozar mon'xank jivexim marle.
16. Ani Samsonan mhollem: Gaddvachea daddmoneachem hadd gheun hanvem tankam raximnim marun uddoile. Gaddvache daddmoneachem hadd ghevn hanvem hozar mon'xank jivexim marle.
17. Ani itlean tannem tem daddmoneachem hadd xevttun bhair marlem. Ani dekhunuch tê svatek Ramath-Lehi mhonn nanv poddlem.
18. Ani taka chôdd tan laglolean, tannem Sorvesporak ulo marlo ani mhollem, 'Tunvenuch tujea chakrachea hatant hi vhoddli suttka haddli, ani atam hanvem tanen morchem ani sunôt korinasloleanchea hatant poddchem?'
19. Tedna Devan zomnint ek bhuianr ugoddlem, tem bhuianr Lehi sorxim asa, ani tantuntlean gosgoxit udok vhanvlem. Samson udok pielo; tachi xokti porot aili ani to jivan bhorlo. Dekhun tê zorik Enha-kore nanv poddlem; ti ozun Lehi sorxim asa.
20. Filistinikaranchea kallar Samson vis vorsam Israelant fuddari aslo.
