1. Soglle Israelkar bhair sorle ani êk monis zal'lê porim ak'khi sonstha, Gilead soit Dan thaun Beersheba porian, Sorvespora mukhar Mizpahnt ektthovli.
2. Ak'khê porjeche fuddari Israelachea sogllea kullanche fuddari hê Devachê porjechê zomatik hajir asle, charxim hozar paimdollache monis.
3. Israelkar Mizpahnt geleat mhonn Benjaminitamnim aikolem. Israelkaramnim tedna mhollem 'Ho opradh koso ghoddlo tem amkam sangat?'
4. Levit, jivexim marlolê ostorechea potin zobab diun mhollem,
5. Gibeahntle monis, zomean mhojea angar aile, ani ratchea vellar Hanv ravtalom tea ghorak sorvbhonvtim veddho ghatlo. Te mhaka jivexim marunk sôdtale.Tãnnim ti moro-sor mhojê naikinicher bolatkar kelo.
6. Magir hanvem mhojê naikiniche kuddiche kuddke kele ani Israelachea daizachea ak'khea desant te dhaddun dile, karonn hea mon'xamnim Israelant ek lojechem ani beabruchem kam' adarlolem.
7. Atam, tumi soglle Israelkar hachê vixim bhasabhas korat ani tumcho nirnnoi atanchea-atam diat.'
8. Sogllo lôk êk monis zal'lê porim ubo ravlo ani mhollem, 'Ami konnek ghora veche nanv, konn-êktachea ghora porot vechona!
9. Ani Gibeahk atam ami oxem kortoleanv. Ami sorti ghaltoleanv
10. ani ak'khea Israelachea kullantle' ek xemborantle dha monis, êk hozarantle xembor, ani dha hozarantle êk hozar monis, venchun kaddtoleanv, tãnnim porjek jevonn-khann ekttãim korunk, ani te ailea uprant, tãnnim Benjaminantlea hanga Gibeahk tannem Israelant kelolea lojechea opradhak favo ti xikxa dinvchi.'
11. Oxem, êk monis zal'lê porim soglle Israelkar tea xaracher add zomle.
12. Israelachea kullamnim Benjaminachea ak'khea kullan toxem mhonnonk, sondêxkar pattoile, 'Tumchea prantant koslem mhonn khotteponn adarlam?
13. Tôr atam, Gibeahnt ravtolea tea bodmaxeank, amchea tabeant korat, ami tankam jivexim marunk ani Israelantlem odruxtt pois kaddunk.' Punn Benjaminitamnim Israelkarank aplea bhavanchem, kanar ghetlem na.
14. Benjamin aplea xarantle bhair sorle ani Gibeahnt Israela add zhuzunk ube zale.
15. Tea vellar, zaitea xarantle ailolea Benjaminitanchem oxem mezop zalem; sovis hozar tolvari gheun aslole; Gibeahnt ravtoleank sôddun hem mezop zalem.
16. Hê vhoddlê foujent satxim uxar dhavkure asle. Tantlo dôr-eklo, chukoi-nastana, gofinn gheun eka kensak mokunk zatalem.
17. Tech porim Benjamin kulliek sôddun, Israelkaranchem mezop oxem zalem: charxim hozar tolvari vaprunk onnbhov aslole.
18. Te Bethel porian fuddem gele, Devacho prosad mellun gheunk. Israelkaramnim ho vichar ghatlo, 'Benjaminitam add zhuz korunk amchê modlea konnem poilo vochunk zai?' Ani Sorvesporan zobab dilo, 'Judan poilo vochonk zai.'
19. Sokallim Israelkar fuddem gele ani aple tombu Gibeah lagim tannle.
20. Israelache monis Benjamina add zhuz korunk fuddem sorle; Gibeah hachea samkar zhuzak te ube zale.
21. Benjaminitanchi fouz Gibeah thaun bhair sorli ani tea disa bavis hozar Israelitank jivexim marle.
22. Israelkar gele ani sanz zai porian Sorvespora mukhar roddle; tãnnim tedna Sorvesporak oso vichar kelo, 'Amchea bhava Benjaminachea putam add ami porot zhuz manddchem?' Sorvesporan zobab dilo, 'Tachea angar vochat.'
23. Novi kallji gheun Israelachi fouz porot fuddem geli ani adlea disachea zagearuch ubi zali.
24. Hea dusrea disa, Israelkar Benjaminitam add zhuzunk fuddem geli.
25. Ani hea dusrea disa, Benjaminit tanchê lagim zhuzunk Gibeahntle bhair sorle ani anik otthra hozar Israelkarank, onnbhovan torvar vapurtoleank, nixtturaien jivexim marle.
26. Tedna soglle Israelkar ani soglli porza Bethelak geli; tim roddlim ani Sorvespora mukhar boslim; sanz porian tãnnim upas kelo ani Sorvesporak hom' ani xanticheô boliô bhettoileô.
27. Tedna Israelkaramnim Sorvesporak vichar kelo. Tea disamnim Sorvesporachea korarachi Arkpett thoim asli.
28. Ani Finehas, Eleazaracho put, Aaronacho put, tea kallar ticho sevôk aslo. Tãnnim vicharlem, 'Mhojea bhava Benjaminachea putam add porot zhuzunk hanvem vochonk zai vô hanvem bond korchem?' Sorvesporan zobab dilo, 'Fuddem chol! Karonn faleam Hanv taka tujea hatant ghaltolom.'
29. Tedna Israelkaramnim aple soinik Gibeahchê sorvbhonvtim doddeak manddle.
30. Tisre disa Israelkaramnim Benjaminitancher akromonn kelem ani adlê porim, Gibeah samkar zhuzak ube zale.
31. Benjamini lokancher atak korunk bhair sorle ani xara bhair pavunk tãnnim dilem. Adlê porim, rosteancher aslolea lokak jivexim marunk tãnnim suru kelem; êk rosto Bethel porian veta, ani dusro ukttea mollar thaun Gibeahk veta; thoim sumar tis zonnank jivexim marle.
32. Benjaminit oxem chint'tale, 'Ami poilê pavtti kel'lea bhaxen ami tankam atam-i haroile' punn Israelkaramnim oso tharav ghetil'lo, 'Ami dhanvun fuddem vetoleanv ani tankam xarantle bhair kaddun, rosteancher ietoleanv.'
33. Tedna soglle Israelkar portole ani Baal-Tamarant porot zomle, ani lipun ravlole Israelache soinik aponn asle tea zagear thaun Gibeahchê ostomtik thaun fuddem sorle.
34. Ak'khea Israelantle venchun kaddlole, dha hozar mon'xamnim Gibeahcher akromonn suru kelem. Zhuz marekar zalem; ani ienvchem aslem tea odruxtta vixim dusre kainch nokllo asle.
35. Israelachea dolleam mukhar Sorvesporan Benjaminitancher har ghali, ani tea disa Israelkaramnim ponchvis hozar ani xembor Benjaminachea mon'xank(te soglle onnubhovi torvarin zhuzpi) jivexim marle. Apnnak har poddlea mhonn Benjaminitamnim pollelem.
36. Israelkaramnim Benjaminitank fuddem soronk dilolem, karonn Gibeaha lagim doddeak ravlolea mon'xancher te patievn asle.
37. Doddeak ravlolê foujen, sogllê takitin Gibeahcher akromonn kelem; modd-fodd korun, tãnnim ak'khem xar torvarik lailem.
38. Doddeak ravlolea soinikamnim sogllê takitin, Gibeahcher akromonn kelem, doddeak aslolea soinikamnim xarant thaun dhunvrachi khunna divunk koblat kel'li.
39. Ti khunna polletanch zhuzachea mazant aslole Israelkar portotole asle. Benjaminan thoddea Israelitank, sumar tis zonnank, jivexim marle ani oxem chintlem, 'Ami poilê pavtt tankam haroilole toxe atam tankam jerul haroile.'
40. Punn ti khunna, dhunvracho khambo, xarant thaun voir soronk laglo, ani Benjaminitamnim pattlean vollon ak'khem xar lasun, tachem ujeachem agttem mollbak pavta tem pollelem.
41. Tedna Israelkar portole, ani Benjaminit bhirantin bhorle, karonn aplem nisontton zalolem tãnnim pollelem.
42. Israelkaramnim aple kuddkean-kuddke korchê adim te pollun oronneant gele, punn zhuzareamnim tankam damun dovorle ani xarant thaun ailolea soinikamnim tanchi patthlean thaun maramari keli.
43. Tãnnim Benjaminitank revaddo ghalo, tanchi tambonastana patth ghetli ani Gibeachea samkhar, udenti vatten tankam mostun uddoile.
44. Benjaminache otthra hozar monis morun poddle, soglle kalljidar monis.
45. Tedna tãnnim, porot vollon oronneant Rimmonachea Khoddpa vattentlean pollapôll kaddli. Panch hozar zonnank rostear marle, ani heranchi thambonastana Gideona meren patth ghetli ani don hozar zonnank jivexim marle.
46. Tea disa, jivexim marle tea Benjaminitanchi sonkia ponchvis hozar torvari vapurpi soinik, soglle kalljidar monis.
47. Punn soixim mon'xamnim porton oronneant pollapôll kaddli Rimmonachea Khoddpa lagim, ani char mhoine te thoim ravle.
48. Israelache monis, tedna porot Benjaminitam sorxim gele, ani tankam torvarik laile mon'xank, zonnavorank ani jem sogllem xarant vetana tanchê vatter mell'lem. Ani tankam mell'lim titleam-i xarank tãnnim uzo lailo.
